Արմինֆո. Այս տարվա առաջին ութ ամիսներին Հայաստանից Ռուսաստան են ներմուծվել 140,9 մլն դոլար ընդհանուր արժողությամբ թանկարժեք իրեր: Այդպիսի տվյալներ են հրապարակվել FinExpertiza միջազգային աուդիտորական-խորհրդատվական ցանցի վերլուծական ծառայության հաշվետվությունում:
Հաշվարկների համաձայն, թանկարժեք քարերի եւ մետաղների, ինչպես նաեւ դրանցից պատրաստված իրերի ներմուծումը Ռուսաստան 2019 թվականին ավելացել է գրեթե մեկուկես անգամ: "Հունվար-օգոստոս ամիսներին Ռուսաստան են ներմուծվել 658,8 մլն դոլարի թանկարժեք իրեր, ինչը 45,75 տոկոսով գերազանցում է նախորդ տարվա նույն ժամանակահատվածի ցուցանիշը", - հետեւում է ընկերության հաշվետվությունից, հաղորդել է ՌԲԿ-ն:
Ընդ որում, հեռավոր արտասահմանի երկրներից թանկարժեք իրերի ներմուծումն աճել է 37,9 տոկոսով (334,8 մլն դոլարից մինչեւ 461,7 մլն դոլար), իսկ ԱՊՀ երկրներից ՝ միանգամից 68,1 տոկոսով (117,2 մլն դոլարից մինչեւ 197,1 մլն դոլար): Թանկարժեք իրեր ներմուծողները Ռուսաստան են ներմուծում առավելապես թանկարժեք մետաղների թափոններ եւ ջարդոն, որոնց ընդհանուր արժեքը կազմել է գրեթե 123,5 մլն դոլար:
FinExpertiza-ում այս փաստը դրական են համարում Ռուսաստանի ոսկերչական արդյունաբերության համար։ FinExpertiza-ի գնահատմամբ՝ Ռուսաստան ոսկերչական իրերի խոշորագույն արտահանողն Իտալիան է։ 2019 թվականի առաջին ութ ամիսներին այդ երկրից Ռուսաստան են ներմուծվել 50,4 մլն դոլար ընդհանուր արժողությամբ ոսկերչական իրեր: Նույն ժամանակահատվածում Չինաստանից ներկրվել են 35 մլն դոլարի ոսկերչական իրեր, եւս 21,2 մլն դոլարի զարդեր:
Նախորդ երեք տարիների ընթացքում Չինաստանը, ինչպես հետեւում է FinExpertiza-ի հաշվետվությունից, անփոփոխ առաջատար էր թանկարժեք քարերի, թանկարժեք մետաղների եւ դրանցից պատրաստված իրերի ՝ Ռուսաստան ներմուծման ծավալներով: Սակայն 2019 թվականի արդյունքներով նա, հավանաբար, կզիջի այդ կարգավիճակը Հայաստանին։ Առաջին ութ ամիսների ընթացքում Հայաստանից ներմուծվել են 140,9 մլն դոլար ընդհանուր արժողությամբ թանկարժեք իրեր, մինչդեռ Չինաստանից՝ ընդամենը 61,8 մլն դոլարի: Հայաստանից ներմուծվում է, առաջին հերթին, թանկարժեք մետաղների ջարդոն (95,9 մլն դոլարի) եւ ալմաստ (33,2 մլն դոլարի):
2019 թվականին թանկարժեք իրերի խոշորագույն մատակարարների հնգյակում տեղ են գտել նաև Իտալիան (58,3 մլն դոլարի), Մեծ Բրիտանիան (49,8 մլն դոլարի, այդ թվում ՝ պլատին՝ 39 մլն դոլարի) եւ Գերմանիան (34,5 մլն դոլարի, այդ թվում ՝ թանկարժեք մետաղների ջարդոն՝ 27,6 մլն դոլարի):