Արմինֆո. Այսօրվա նիստում կառավարության որոշմամբ բավարարվել է «Նյուպլաստ» ՓԲԸ-ի ներկայացրած հայտը՝ գերակա ոլորտում իրականացվող ներդրումային ծրագրի շրջանակում ներմուծվող տեխնոլոգիական սարքավորումները, դրանց բաղկացուցիչ ու համալրող մասերը, հումքը և նյութերը ներմուծման մաքսատուրքից ազատելու արտոնությունից օգտվելու վերաբերյալ:
Ընկերությունը ներմուծվող ապրանքներն օգտագործելու է կաթիլային ոռոգման համակարգերի արտադրության համար (ք. Երևան)։ Արդեն իսկ իրականացվել է շուրջ 3 մլրդ դրամի ներդրում գործարանի հիմնադրման և հզորությունների ընդլայնման համար: Նախատեսվում է իրականացնել 200 մլն դրամի ներդրում հումքի և նյութերի ձեռքբերման համար: Ներկայումս առկա է 65 աշխատատեղ: Ներդրումային ծրագրի շրջանակում կստեղծվի 15 նոր աշխատատեղ` 200,000 դրամ միջին աշխատավարձով։ Ծրագրով նախատեսված արտադրանքի ընդհանուր ծավալը կկազմի 1 մլրդ դրամ, որն ամբողջությամբ կիրացվի ՀՀ տարածքում: Արտոնություն ստանալու համար ներկայացված ապրանքների արժեքը կազմում է 935.4 մլն դրամ: Մաքսատուրքի ազատման արտոնությունը կազմում է 63.7 մլն դրամ:
Տիգրան Ավինյանն ընդգծել է որոշման ընդունման կարևորությունը և նշել, որ այն միտված է գյուղատնտեսության ոլորտում արտադրողականության բարձրացմանը: «Գյուղատնտեսական մեր ծրագրերը միտված են Հայաստանի Հանրապետությունում ոռոգման համակարգերի արդիականացմանը: Նմանատիպ համակարգերի արտադրությունը կնպաստի այդ ոլորտում ավելի դրական արդյունք արձանագրելուն»,- նշել է փոխվարչապետը:
Ինչպես ԱրմԻնֆո-ին հաղորդեցին կառավարության տեղեկատվույթյան և հասարակայնության հետ կապերի վարչությունից, գործադիրի որոշմամբ մաքսատուրքի ազատման արտոնությունից կօգտվի նաև «Թրեյդ էքսպորտ» ՓԲԸ-ն: Ընկերությունը գործունեություն է ծավալելու Երևանում՝ էլեկտրոնային հաշվիչների արտադրության ոլորտում՝ իրականացնելով 500 մլն դրամի ներդրում: Ներկայումս առկա է 6 աշխատատեղ, նախատեսվում է ստեղծել ևս 50 նոր աշխատատեղ` 153,000 դրամ միջին աշխատավարձով։ Ծրագրով նախատեսված արտադրանքի ծավալը տարեկան կկազմի մոտ 16.4 մլրդ դրամ, որն ամբողջությամբ կիրացվի ԵԱՏՄ այլ անդամ երկրների տարածքում: Արտոնություն ստանալու համար ներկայացված ապրանքների արժեքը կազմում է 2.8 մլրդ դրամ: Մաքսատուրքի ազատման արտոնությունը կազմում է 285 մլն դրամ:
Նշենք, որ "Նյուպլաստ" ՓԲԸ - ի կայքում զետեղված տեղեկատվության համաձայն, NewPlast ընկերությունը հիմնադրվել է 2002 թվականին, իսկ արդեն 2007 թվականին Անդրկովկասում առաջինը հիմնել են մետաղապլաստե և պլաստմասե խողովակների սեփական արտադրությունը ՝ ամենաժամանակակից, գործնական և հարմարավետ տեխնիկական արտադրանք:
ԱրմԻնֆո"-ին չի հաջողվել գտնել" Թրեյդ Էքսպորտ "ՓԲԸ-ի մասին մատչելի տեղեկատվություն, իսկ Հայաստանի իրավաբանական անձանց էլեկտրոնային ռեգիստրի կայքում եղած տեղեկատվությունը միայն հուշել է, որ ընկերությունը հիմնադրվել է 2015 թվականի հոկտեմբերին' չնշելով ընկերության հիմնադիրների տվյալները: Որոնելով հարկ վճարողի նշված համարով՝ 02643141, ինչպես նաև պետական գրանցման համարով՝ 273.120.875782, Արմինֆո-ի աշխատակիցները այցելել են սերտիֆիկացման ազգային մարմնի կայք և "Թրեյդ Էքսպորտ"ՓԲԸ: Այդ աղբյուրի համաձայն, կազմակերպության իրավաբանական հասցեն գրանցված է Կենտրոն համայնքում, հենց այնտեղ էլ այն գործունեություն է ծավալում, իսկ ապրանքի անվանումը՝ տղամարդկանց և կանանց գլխարկներ՝ խառը մանվածքից: Հիմա հաշվիչներ են թողարկելու։