ՀԱԷԿ-ի երկրորդ էներգաբլոկի շահագործման ժամկետի երկարաձգման ծրագրի իրականացման ժամկետները կերկարացվեն մինչեւ 2021 թվականի դեկտեմբերի 31-ը

Արմինֆո.ՀԱԷԿ-ի երկրորդ էներգաբլոկի շահագործման ժամկետի երկարաձգման ծրագրի իրականացման ժամկետները կերկարացվեն մինչեւ 2021 թվականի դեկտեմբերի 31-ը: ՀՀ կառավարությունը դեկտեմբերի 12-ի նիստում հավանություն է տվել 2015 թվականի փետրվարի 5-ի հայ-ռուսական համաձայնագրի արձանագրության ստորագրմանը։

Ինչպես իր ելույթում նշել է ՀՀ տարածքային կառավարման եւ ենթակառուցվածքների նախարար Սուրեն Պապիկյանը, այդ փաստաթղթի հիման վրա նախատեսվում էր ծրագիրն ավարտել մինչեւ 2019 թվականի դեկտեմբերի 31-ը: Այդ նպատակով Ռուսաստանի Դաշնության կառավարության կողմից Հայաստանի կառավարությանը տրամադրվել է 270 մլն դոլարի վարկ և 30 մլն դոլարի դրամաշնորհ: Սակայն նախագծի շրջանակներում իրականացված հիմնական և լրացուցիչ սարքավորումների համալիր հետազոտությունների արդյունքում նախատեսված աշխատանքների ցանկը զգալիորեն ընդլայնվել է, և անհրաժեշտություն է առաջացել երկարացնել ինչպես աշխատանքների ժամկետները, այնպես էլ վարկի վճարումները:  Ծրագրի շրջանակներում մնացած միջոցները կօգտագործվեն Հայկական ԱԷԿ-ի անվտանգության բարձրացման աշխատանքներն ավարտելու համար:

Դեկտեմբերի 10-ին ՀԱԷԿ կատարած այցի շրջանակներում, պատասխանելով ԱրմԻնֆո-ի թղթակցի հարցին, ՀՀ-ում ՌԴ արտակարգ և լիազոր դեսպան Սերգեյ Կոպիրկինը նշել է, որ

Հայկական ԱԷԿ-ի համար վարկի մնացած մասի ներգրավման հարցը կքննարկվի դեկտեմբերի վերջին:  <Դեկտեմբերի 26 -ին նախատեսվում է համատեղ համակարգող կոմիտեի նիստ, որտեղ քննարկման առարկա կդառնա նաև այդ հարցը>, - պարզաբանել է նա: Ավելի վաղ ԱրմԻնֆո-ն՝ վկայակոչելով ՀՀ տարածքային կառավարման եւ ենթակառուցվածքների նախարարի տեղակալ Հակոբ Վարդանյանին, հայտնել էր, որ երկարաձգման ծրագրի շրջանակում օգտագործվել է վարկային միջոցների 90%-ը (270 մլն դոլարից) եւ 30 մլն դոլար դրամաշնորհի 10%-ը։ Հայկական կողմը տոկոսային վճարումներ կիրականացնի ոչ թե ամբողջ վարկի, այլ դրա միայն իրացված գումարի գծով, քանի որ նախագիծն ամբողջությամբ ավարտված չէ: Արդեն 2020 թվականի հունվարի 1-ից Հայաստանը պետք է սկսի վճարել ինչպես տոկոսադրույքների, այնպես էլ վարկի հիմնական գումարի գծով։  Իսկ բլոկի լիակատար արդիականացումը կհանգեցնի դրա արդյունավետության ավելի քան 10%  աճի, ինչը հնարավորություն կտա վարկն սպասարկել առանց որևէ խնդրի։ Հիշեցնենք, որ վարկը տրամադրվել է ՌԴ կառավարության կողմից 15 տարի ժամկետով ՝ առաջին երեք տարիներին վճարումների արտոնյալ ժամանակահատվածով: Այդ ժամկետը լրանում է 2019 թվականի դեկտեմբերի 31-ին։   Ընդ որում, վճարման տարեկան տոկոսադրույքը կազմում է 3%:  ՀԱԷԿ - ի 2-րդ էներգաբլոկի շահագործման ժամկետի երկարաձգման ծրագրի հիմնական խնդիրներն են ռեսուրսի վերականգնումը եւ կայանի աշխատանքի երկարաձգումը մինչեւ 10 տարի (մինչեւ 2026 թվականը), ԱԷԿ-ի անվտանգության եւ արդյունավետության մակարդակի բարձրացումը: