Կանխատեսում. Հայ սպառողի համար գազի արժեքի հնարավոր բարձրացումը չի գերազանցի 4-4,5 տոկոսը

Արմինֆո. Հայ սպառողի համար գազի արժեքի հնարավոր բարձրացումը, իմ հաշվարկներով, չի գերազանցի 4-4,5 տոկոսը։ ԱրմԻնֆո-ին այդպիսի կարծիք է հայտնել "Իմ քայլը" դաշինքից Ազգային ժողովի պատգամավոր Հայկ Գևորգյանը։

"Մեկ տարի առաջ սահմանին գազի արժեքի 1000 խմ դիմաց 150-ից մինչև 165 դոլար ավելացումը "Գազպրոմ Արմենիա" ընկերությունը կլանել է սեփական շահույթի կրճատման հաշվին։  Հիմա այնտեղ մտածում են ՀԾԿՀ-ին սպառողի համար գազի սակագնի բարձրացման հայտ ներկայացնել-չներկայացնելու մասին։  Եթե դա, այնուամենայնիվ, տեղի ունենա, այդ հարցի շուրջ բոլոր քննարկումները բացառապես հրապարակային կլինեն։  Եվ գազի գինը կաճի բացառապես "Գազպրոմ Արմենիայի" կողմից դրա համար հստակ հիմնավորումներ ներկայացնելու դեպքում", - ընդգծել է նա։

Հունվարի 22-ին ԱԺ-ում կառավարական ժամի ընթացքում պատասխանելով գազի գնի բարձրացման հավանականության մասին պատգամավոր Արման Բաբաջանյանի՝ վարչապետ Նիկոլ Փաշինյանին ուղղված հարցին, փոխվարչապետ Մհեր Գրիգորյանը նշել է, որ այդ թեմայով արդեն եղել են և լինելու են բազմաթիվ քննարկումներ:

"Գազպրոմը պնդում է ներդրումային ծրագրի վրա։ Հաշվարկները կատարվում են 10 տարվա համար։  Տարաձայնություններ, իհարկե, կան։  Մենք չենք բացառում, որ ապրիլի 1-ից հետո հայտ կներկայացվի։  Բոլոր հարցերի պատասխանները կստացվեն, երբ հայտը ներկայացվի, եւ այդ ժամանակ մենք կներկայացնենք մեր փաստարկները։  Եթե պարզվի, որ սահմանի գնի եւ սակագնի միջեւ մարժան ուռճացված է կամ հիմնավորված չէ, դժվար թե սակագինը հաստատվի", - հայտարարել է փոխվարչապետը։

Մինչդեռ, ըստ Գեւորգյանի, այն, որ գազը հայաստանցի սպառողին հասնում է սահմանի գինը գրեթե կրկնակի գերազանցող գնով, նույնպես խնդիր է: Նրա հավաստմամբ, այդ խնդիրը գտնվում է կառավարության ուշադրության կենտրոնում եւ, համապատասխանաբար, քննարկման առարկա է։  Պատգամավորի խոսքով ՝ խնդիրը բազմաթիվ անկյուններ ունի, այդ թվում ՝ քաղաքական։

Նրա կանխատեսմամբ՝ արդեն 2025 թվականին Հայաստանը կսկսի գազ ստանալ ԵԱՏՄ միասնական էներգետիկ շուկայի մասնակից բոլոր երկրների համար նախատեսված  միասնական գներով: Այս լույսի ներքո՝ նա Հայաստանի կառավարության գերակա խնդիրն է համարում գների իրավիճակի  պահպանումը առաջիկա տարիների ընթացքում։

"Իրականում գազի գնի հնարավոր բարձրացումը մեր սպառողի համար ոչ մի կերպ չի համապատասխանում այն աղմուկին, որն այդ հեռանկարի շուրջ բարձրացնում են որոշ, բոլորին հայտնի, շրջանակներ։  Գազի հնարավոր թանկացումը շատ չնչին ազդեցություն կունենա երկրում գնաճային գործընթացների վրա։  Այլ հարց է, թե որքանով է, ընդհանրապես, հիմնավորված գազի արդեն իսկ առկա ներքին գինը։  Պետք է հասկանալ, որ Հայաստանի ներսում առկա գազի գինը հիմնավորված է անցյալում անիմաստ ծախսերով։ Խոսքն ամեն նախընտրական շրջանից առաջ հեռավոր գյուղեր գազի փոխադրման մասին է, ինչը հետագայում ինքնըստինքյան ամրագրվել է ապագա սակագնի մեջ։  Մինչդեռ, հեռավոր բնակավայրերում էներգաապահովման հարցն անհրաժեշտ էր լուծել բացառապես էներգիայի այլընտրանքային աղբյուրների օգնությամբ", - ամփոփել է խորհրդարանականը։