Արմինֆո. Երեւանում շարժական առեւտուրը կարգավորվելու է օրենսդրական մակարդակով։ Ազգային ժողովը հունվարի 24-ի նիստում երկրորդ եւ վերջնական ընթերցմամբ փոփոխություններ է կատարել "Առեւտրի եւ ծառայությունների մասին" օրենքում եւ հարակից օրենքների փաթեթում:
Օրինագծի հեղինակ, ԱԺ "Իմ քայլը" խմբակցության պատգամավոր Սիսակ Գաբրիելյանի խոսքերով, վերջին շրջանում նկատվում է շարժական առևտրի աճ մայրաքաղաքի կենտրոնում ' ավտոմեքենաների և կցորդների օգտագործմամբ: Սակայն այս ոլորտը դեռևս որևէ օրենսդրական կարգավորում չի ստացել, հետևաբար, Երևանի քաղաքապետարանը չի կարող միջամտել այդ գործընթացին։ Օրենքի նախագիծն ուղղված է առեւտրի կազմակերպման եւ ծառայություններ մատուցող շարժական կետերի հետ ոլորտի իրավական հարաբերությունների կանոնակարգմանը: "Մենք շատ հաճախ տեսնում ենք նման շարժական առևտրային կետեր։ Նեղ փողոցներում, բանուկ հատվածներում, որտեղ նրանք կարող են առաջացնել խցանումներ: Նման կետեր մենք տեսնում ենք նաև Հանրապետության հրապարակի հարակից փողոցներում, մշակութային կենտրոնների հարևանությամբ՝ օրվա ամենատարբեր ժամերի։ Նոր օրենքով կկարգավորվեն և վայրերը, և ժամերը, կհստակեցվեն նաև շարժական կետերի արտաքին ձևավորումը", - ասել է Սիսակ Գաբրիելյանը։
Երևանի քաղաքապետին և ավագանուն վերապահվելու են լիազորություններ՝
որոշելու վայրերը, որտեղ կարելի է իրականացնել շարժական
առեւտուր, դրա իրականացման կարգը եւ պայմանները: Տեղի համար կսահմանվի
ամսական 50 հազար դրամի չափով տուրք: Ընդ որում, խոսքը
ոչ թե նման առևտուրն արգելելու, այլ իրավական հարաբերությունների կարգավորման մասին է։ Ինչ վերաբերում է ժամանակային սահմանափակումներին, ապա դա նույնպես որոշելու է ավագանին, սակայն, նախնական տվյալներով, հնարավոր է մինչեւ ժամը 23: 00-ն:
Ավելի վաղ տարածքային կառավարման եւ ենթակառուցվածքների նախարարի տեղակալ Վաչե Տերտերյանը, կարեւորելով ներկայացված փաթեթը, չի բացառել այն հանրապետության ողջ տարածքում տարածելու հնարավորությունը: "Տեսնենք, թե ինչպես է աշխատելու օրենքը Երևանում, և հաջողության դեպքում դրա ուժի մեջ մտնելուց հետո երեքից հինգ ամսվա ընթացքում, կներկայացնենք այն ամբողջ Հայաստանում տարածելու մասին օրինագիծը",- նշել է փոխնախարարը:
