Արմինֆո. ՀՀ էկոնոմիկայի նախարար Տիգրան Խաչատրյանը նախօրեին ընդունել է Համաշխարհային բանկի խմբի Doing Business բարեփոխումների թիմի անդամ Ալեխանդրո Էսպինոսա-Վանգին՝ քննարկելու «Գործարարություն» զեկույցի մեթոդաբանական հարցերը, ինչպես նաև Բանկի աջակցությունը Հայաստանի գործարար միջավայրին ուղղված բարեփոխումների հետագա աշխատանքներում։
Ինչպես ԱրմԻնֆո-ին հաղորդեցին գերատեսչության մամուլի ծառայությունից, Տիգրան Խաչատրյանը ողջունել է հանդիպման մասնակիցներին և գոհունակություն հայտնել զեկույցին առնչվող աշխատանքների հերթական փուլի մեկնարկի առթիվ, որի շրջանակում Համաշխարհային բանկի խմբի առաջատար փորձագետներն այս օրերին Հայաստանում անմիջական և հեռուստակապի միջոցով հանրային ոլորտի առանցքային շահագրգիռ կողմերի հետ քննարկումներ են անցկացնում: Նախարարը շնորհակալություն է հայտնել կազմված խորհրդատվական զեկույցի համար, որն օգտակար ուղեցույց է առկա ռեսուրսները հասցեական ուղղելու արդիական խնդիրների լուծմանը, ինչպես նաև հետագա աշխատանքների կազմակերպման համար:
Տիգրան Խաչատրյանը նշել է, որ Բանկի ամենամյա գնահատումը կարևոր է ոչ միայն այլ երկրների հետ համեմատության տեսանկյունից, այլև խիստ նշանակալի միջավայրային տեսանկյունից` ճիշտ և իրատեսական պատկեր ստանալու առկա խնդիրների վերաբերյալ` հաշվի առնելով աշխարհում ընդունելի համապատսխան կարգավորումները: Նախարարը տեղեկացրել է, որ զեկույցին համապատասխան բարեփոխման օրակարգը կկազմվի ոչ թե ամենամյա պարբերականությամբ, այլ միջնաժամկետ և երկարաժամկետ գործողությունների մշակման եղանակով:
Ալեխանդրո Էսպինոսա-Վանգը շնորհակալություն է հայտնել նախարարին հանդիպման և արդյունավետ քննարկումների համար, առանձնացրել այն հարցերը, որոնք այս փուլի օրակարգում են:
Հիշեցնենք, որ Հայաստանը 47-րդ տեղն Է զբաղեցրել Doing Business 2020 վարկանշային աղյուսակում 190 երկրների շրջանում, որն ամեն տարի հրապարակվում է Համաշխարհային բանկի կողմից: Զեկույցի համաձայն, Հայաստանը վեց կետով վատթարացրել է իր դիրքը. նախորդ Doing Business 2019 զեկույցում նա զբաղեցրել է 41 - րդ հորիզոնականը: Doing Business-ի ամենամյա հետազոտությունը գնահատում է ձեռնարկատիրական գործունեության վարման հարմարավետությունը տասը ցուցանիշների հիման վրա՝ ձեռնարկությունների գրանցման պարզությունը, շինարարության թույլտվությունների ստացումը, էլեկտրացանցերին միացումը, վարկերի ստացումը, մինորիտար ներդրողների իրավունքների պաշտպանությունը, հարկերի վճարումը, միջազգային առեւտուր, պայմանագրերի կատարման ապահովում, անվճարունակության որոշում (սնանկություն):
Նշենք, որ Համաշխարհային բանկի խմբի (ՀԲ) գործադիր տնօրենների խորհուրդը նախորդ տարվա մարտի 29 - ին հաստատել է Հայաստանի հետ "Երկրի գործընկերության շրջանակները" (Country Partnership Framework-CPF) 2019-2023 թթ. ծրագիրը' շուրջ 500 մլն դոլար' կայուն եւ ներառական աճին նպաստելու, ինչպես նաեւ երկրում կենսամակարդակի բարելավմանը նպաստելու համար: CPF-ի նոր ծրագիրն ամբողջությամբ համահունչ է կառավարության հնգամյա ծրագրին։ Այն հիմնված է 2018 թվականի ապրիլին "թավշյա" հեղափոխությունից հետո կառավարությունում ձեւավորված տեսլականի վրա եւ արտացոլում է կոռուպցիայի դեմ պայքարի, օրենքի գերակայության ամրապնդման եւ մարդկային կապիտալի ներդրումների միջոցով զարգացման սահմանափակումները հաղթահարելու եւ բարեփոխումների խորացման նոր քաղաքական կամքը:
Հայաստանի Հանրապետությանը, որը 1992 թվականից անդամակցում է Համաշխարհային բանկին և 1993 թվականից ' Զարգացման միջազգային ասոցիացիային, 2018 թվականի դեկտեմբերի դրությամբ տրամադրվել է 2,3 մլրդ դոլար գումար: