Արմինֆո.Փոխվարչապետ Մհեր Գրիգորյանն ընդունել է Եվրասիական տնտեսական հանձնաժողովի Կոլեգիայի նորանշանակ նախագահ Միխայիլ Մյասնիկովիչին:
Ողջունելով հյուրին՝ փոխվարչապետը շնորհավորել է նրան ԵԱՏՀ Կոլեգիայի նախագահի պաշտոնում նշանակվելու կապակցությամբ և մաղթել հաջողություններ իր հետագա գործունեության մեջ՝ նշելով, որ ուրախ է, որ պարոն Մյասնիկովիչի պես փորձառու պետական գործչին է վստահվել այդ պատասխանատու պաշտոնը: Փոխվարչապետը ներկայացրել է իր պատկերացումները ԵԱՏՄ ինտեգրման գործընթացի հետագա զարգացման վերաբերյալ:
Միխայիլ Մյասնիկովիչը նշել է, որ փոխվարչապետի հետ հանդիպմամբ սկսում է իր հանդիպումների շարքը ՀՀ բարձրաստիճան պաշտոնյաների հետ: Նա շնորհակալություն է հայտնել ԵԱՏՄ հետագա զարգացման ուղղությամբ փոխվարչապետի կողմից հնչեցված գաղափարների համար և բարձր գնահատել ՀՀ փոխվարչապետի ակտիվ մասնակցությունը ԵԱՏՀ խորհրդի աշխատանքներին:
Զրուցակիցները մտքեր են փոխանակել Եվրասիական տնտեսական միության առջև բացված հնարավորությունների, ծառացած խնդիրների, միության առանձնահատկությունների և դրա զարգացման հեռանկարի շուրջ:
Անդրադարձ է կատարվել ԵԱՏՄ անդամների օրենսդրությունների ներդաշնակեցման կարևորությանը, ներքին առևտրի խոչընդոտների վերացման և անդամ երկրների առանձնահատկությունների հիման վրա ընդհանուր կարգավորումների սահմանման անհրաժեշտությանը:
Երկուստեք արձանագրվել է, որ բավականին մեծ աշխատանք է տարվել Միության գործունեության ընթացքում, բայց դեռ շատ անելիքներ կան, որոնք հնարավոր է իրականացնել ԵԱՏՄ անդամ պետությունների համատեղ ջանքերով:
