Արմինֆո. ՙՄիջազգային էներգետիկ կորպորացիա» փակ բաժնետիրական ընկերությունը, որը շահագործում է Սևան-Հրազդան ՀԷԿ կասկադը, դիմել է Հայաստանի Հանրապետության հանրային ծառայությունները կարգավորող հանձնաժողով՝ խնդրելով համաձայնություն տալ իր կանոնադրական կապիտալի 90 տոկոսը կազմող՝
1000 դրամ անվանական արժեքով 527085 հատ հասարակ (սովորական) բաժնետոմսերի, ինչպես նաև Ընկերությանը սեփականության իրավունքով պատկանող՝ Ընկերության հայտով ներկայացված գույքի՝ «Էյչ-Էս-Բի-Սի Բանկ Հայաստան» փակ բաժնետիրական ընկերությունում և (կամ) Եվրասիական զարգացման բանկում գրավադրման գործարքի կնքմանը:
ՀԾԿՀ հաղորդման համաձայն, Հանձնաժողովը դիմել է ՀՀ վարչապետի աշխատակազմ՝ գործարքի վերաբերյալ կառավարության դիրքորոշումն ստանալու նպատակով: Հաշվի առնելով այն հանգամանքը, որ ՀՀ տարածքային կառավարման և ենթակառուցվածների նախարարության, ՀՀ էկոնոմիկայի նախարարության, ՀՀ ազգային անվտանգության ծառայության, ՀՀ անվտանգության խորհրդի կողմից գործարքի մասով առարկություններ չկան, ՀԾԿՀ կողմից գործարքին համաձայնություն տալը չի խախտում էներգետիկ համակարգի հուսալիությունը, անվտանգությունը և ներքին շուկայի սպառողների շահերը, չի սպառնում ազգային անվտանգությանը և պետական շահերին, իսկ անհրաժեշտ փորձ ունեցող անձի վերաբերյալ դրույթը Գործարքի նկատմամբ կիրառելի չէ: Ուստի, ՀԾԿՀ մտադիր է բավարարել ՄԷԿ ՓԲԸ հայտը: ՀԾԿՀ որոշման նախագծում նաև սահմանվում է, որ վերը նշված գործարքի կնքման ժամկետը չի կարող գերազանցել սույն որոշումն ուժի մեջ մտնելու պահից վեց ամիսը, և գործարքը կնքելուց հետո անհրաժեշտ է երկշաբաթյա ժամկետում ՀԾԿՀ ներկայացնել դրան վերաբերող փաստաթղթերի պատճենները
ՀԾԿՀ-ի հաղորդման մեջ չեն նշվում գրավային ապահովման պատճառները, սակայն, ԱրմԻնֆո-ի ունեցած տվյալներով, "Տաշիր" ընկերությունների խումբը մտադիր է «Էյչ-Էս-Բի-Սի Բանկ Հայաստան»-ից և Եվրասիական զարգացման բանկից ներգրավել վարկային ռեսուրսներ՝ ՄԷԿ-ի պարտքերը մարելու համար, ինչը խմբին հնարավորություն կտա լիովին ստանձնել ՄԷԿ սեփականատիրոջ իրավունքը:
Հիշեցնենք, որ դեկտեմբերի 5-ին "Հիդրոինվեստ" ԲԸ-ն՝ "Ռուսհիդրոյի" 100% - անոց "դուստրը", պայմանագիր է կնքել "Տաշիր" խմբի մեջ մտնող "Հրազդանի էներգետիկ ընկերություն" ԲԲԸ-ի հետ "Միջազգային էներգետիկ կորպորացիա" ՓԲԸ-ի փաթեթի վաճառքի շուրջ: "Ռուսհիդրոյին" պատկանում էր ՄԷԿ-ի բաժնետոմսերի 90%-ը։ Ավելի վաղ "Ռուսհիդրոն" հաղորդել էր, որ ընկերության տնօրենների խորհուրդը հավանություն է տվել ՄԷԿ-ին մասնակցության դադարեցմանն ու առուվաճառքի պայմանագրի կնքմանը: Գործարքին թույլտվություն է տվել ՀՀ հանրային ծառայությունները կարգավորող հանձնաժողովը։ Կողմերի պայմանավորվածություններին համապատասխան՝ ՄԷԿ-ի 527 085 սովորական անվանական ոչ փաստաթղթային բաժնետոմսերի արժեքը կազմել է 172,96 մլն ռուբլի: Կնքված պայմանագրին հնամապատասխան, գնորդն ամբողջությամբ կմարի Վերակառուցման եւ զարգացման եվրոպական բանկի եւ Ասիական զարգացման բանկի հանդեպ ՄԷԿ-ի վարկային պարտավորությունները, ինչից հետո Սեւան-Հրազդանի ՀԷԿ կասկադի սեփականատիրոջ բաժնետոմսերը կփոխանցվեն գնորդի սեփականությանը, իսկ "ՌուսՀիդրո"-ից կհանվեն տվյալ վարկերի գծով երաշխիքները եւ խմբի համախմբված պարտքը կնվազի 55 մլն դոլարով:
"ՄԷԿ" ՓԲԸ-ն Հայաստանի տարածքում էլեկտրաէներգիայի խոշորագույն արտադրողներից մեկն է: Ընկերության ՀԷԿ-երի սահմանված հզորությունը 561,4 ՄՎտ է, կամ Հանրապետության էլեկտրակայանների սահմանված հզորության ընդհանուր ծավալի մոտ 14% - ը: Ընկերությունը տնօրինում է 7 ՀԷԿ-երի, որոնք արտադրում են երկրի էլեկտրաէներգիայի 8-10 տոկոսը։ ՀԷԿ-ի կասկադը օգտագործում է Հրազդան գետի բնական հոսքը եւ Սեւանա լճից ոռոգման ջրի բացթողումները: