Երկուշաբթի, 6 Ապրիլի 2020 11:30

Արմինֆո.Քաղաքացիական ավիացիայի գլխավոր վարչությունը /ՔԱԳՎ/ հերքում է լիցենզիայից զրկվելու մասին տեղեկատվությունը։

 

<Երեկ որոշ ԶԼՄ-ներում տարածված այն տեղեկատվությունը, ըստ որի՝ Հայաստանի Քաղաքացիական ավիացիայի կոմիտեն զրկվել է լիցենզիայից, չի համապատասխանում իրականությանը: Հայաստանն ինքնիշխան պետություն է և որևէ կառույց չի կարող զրկել ՀՀ օրենքով գործող պետական կառույցին իր լիազորությունները կատարելու իրավունքից:

 

2020 թվականի փետրվարի 3-ից 7-ն ընկած ժամանակահատվածում Թռիչքային անվտանգության եվրոպական գործակալության (այսուհետ՝ Գործակալություն) և Եվրոպական Միության (այսուհետ՝ ԵՄ) մասնագետների կողմից իրականացվել է Կոմիտեի և թվով երկու ավիաընկերությունների գնահատման այց: 2020 թվականի մարտի 6-ին Կոմիտեն և գնահատում անցած երկու ընկերությունները ստացել են Գործակալության կողմից նախնական գնահատման արդյունքները, որի վերաբերյալ Գործակալությունն ակնկալում է ստանալ Կոմիտեի կարծիքը գնահատման արդյունքների վերաբերյալ զեկույցը վերջնական տեսքի բերելու նպատակով: Այսպիսով, Գործակալությանն ուղղված դիտարկումները Կոմիտեն ուղարկելու է ապրիլի 6-ին:

 

Ինչպես արդեն տեղեկացրել էինք ամիսներ առաջ, Եվրոպական Հանձնաժողովը նախատեսում է 2020 թվականի մայիսի 12-ից 14-ն ընկած ժամանակահատվածում Բրյուսել քաղաքում անցկացվելիք Եվրոպական անվտանգության թիմի նիստի լսումներին ներկայացնել Գործակալության արձանագրած դիտարկումները և Կոմիտեի պարզաբանումները, որին հրավիրված է նաև Կոմիտեն: Միաժամանակ, նախկինում արդեն բազմիցս տեղեկացրել ենք, որ Կոմիտեն ունի լուրջ խնդիրներ, որոնք նոր չեն, ունեն շատ երկար տարիների պատմություն, որոնք պահանջում են բավական ժամանակ և ռեսուրսներ կառույցը արդիականացնելու համար: Այդ ուղղությամբ արդեն իսկ արվում են և արվելու են լուրջ և կտրուկ քայլեր:

 

Իսկ ինչ վերաբերվում է այն երկու ավիաընկերություններին, որոնք ժամանակավորապես զրկվել են երրորդ երկրի շահագործման վկայականներից, ապա կարևոր է նշել, որ նրանք զրկվում են միայն ժամանակավորապես, միայն եվրոպական ուղղություններով կատարվող չվերթների իրավունքից և կարող են իրենց թռիչքները շարունակել այլ պետություններ: Ավելին, այս որոշումը միայն վերաբերվում է Հայաստանում գրանցված ավիաընկերություններին, որոնք իրականացնում են սակավաթիվ թռիչքներ դեպի Եվրոպական ուղություններ, և այս որոշումը որևէ ազդեցություն չի ունենա այլ միջազգային ընկերությունների կողմից իրականացվող թռիչքների վրա: Ի հավելումն, պետք է նշենք, որ Կոմիտեն սերտորեն համագործակցում է ավիաընկերությունների ղեկավարությունների հետ ստեղծված իրավիճակում լուծումներ գտնելու ուղղությամբ>,- նշվում է ՔԱԳՎ հաղորդագրությունում։

 

Ավելի վաղ Հայաստանի մի շարք ԶԼՄ-ներում տեղեկություններ էին շրջանառվում այն մասին, որ Քաղաքացիական ավիացիայի միջազգային կազմակերպությունը չեղյալ է հայտարարել Հայաստանի քաղաքացիական ավիացիայի պետական կոմիտեի լիցենզիան, ինչը կարող է շատ ցավալի հետեւանքներ ունենալ Հայաստանի ամբողջ քաղաքացիական ավիացիայի, մասնավորապես՝ օդաչուների համար, որոնց կարող են ուղղակի արգելել նստել ղեկին: Ըստ հրապարակումների ՝ խոսքը փաստացի լիցենզիայից զրկելու մասին է ։ Խիստ քննադատության տակ է հայտնվել առաջին հերթին ՔԱԳՎ երիտասարդ ղեկավար Տաթևիկ Ռևազյանը, ով ավիացիոն ոլորտում փորձառու մարդ չէ ։

 

Փորձագետների կարծիքով, իրականում ՔԱԳՎ-ի հետ կապված տհաճ պատմությունը նոր չէ։ Այն դարձել է ավիացիոն ոլորտի հետևողական փլուզման տրամաբանական արդյունքը, որը սկսվել էր ավելի քան 15 տարի առաջ <Արմավիա> ազգային ավիաընկերության <փլուզումից> և <բաց երկնքի> հայեցակարգի իրականացումից, որի պայմաններում պետությունը հրաժարվում էր տեղական փոքր ավիաընկերություններին աջակցելուց և հրաժարվել է իր հայկական ազգային փոխադրողի վերաստեղծումից ։