Արմինֆո. ԵԱՏՄ շրջանակներում անցկացվող հետազոտության արդյունքները հիմք են տալիս կանխատեսելու ցորենի հավելուրդը, որի ծավալը 2020 թվականի արդյունքներով կկազմի 46 մլն տոննա, եւ դրա գրեթե 90 տոկոսը բաժին է ընկնում ռուսական շուկային: Այդ մասին ապրիլի 22-ին Հայկական միասնական տեղեկատվական կենտրոնում մամուլի ասուլիսի ժամանակ հայտարարել է ՀՀ էկոնոմիկայի փոխնախարար Արման Խոջոյանը։
Խոսելով Հայաստանի մասին՝ փոխնախարարը նշել է, որ Հայաստանում ցորենի ցանքատարածությունը կազմել է 52.5 հազար հա, որի բերքահավաքը մեկնարկելու է արդեն մայիսին։ Վկայակոչելով հետազոտության արդյունքները՝ Խոջոյանն ընդգծել է նաև, որ եվրասիական տարածքում շաքարի հավելուրդը սպասվում է 510 հազար տոննա ծավալով:
Ընդ որում, նա հայ արտադրողների ուշադրությունը հրավիրել է այն հանգամանքին, որ ԵԱՏՄ-ում առկա է 1.3 մլն տոննա բանջարեղենի և 8 մլն տոննա պտղատու մշակաբույսերի լրացուցիչ պահանջարկ, ինչը վերջիններիս համար հնարավորություն է իրենց արտադրանքի արտահանման ծավալների մեծացման համար:
Հիշեցնենք, որ ավելի վաղ ՀՀ էկոնոմիկայի նախարարությունը հայտարարել էր, որ 2020 թվականին աշնանացան ցորենի բերքը կկազմի 155 հազար տոննա: Հավելենք, որ գյուղատնտեսական արտադրանքի առյուծի բաժինը Հայաստանն արտահանում է ԵԱՏՄ շուկա, մասնավորապես՝ ՌԴ։
