Արմինֆո. Հայաստանի խորհրդարանը ապրիլի 22-ի արտահերթ նիստում երկրորդ եւ վերջնական ընթերցմամբ փոփոխություններ է կատարել ՀՀ հարկային օրենսգրքում:
"Իմ քայլը" խմբակցության պատգամավոր Բաբկեն Թունյանի առաջարկած մեկ փոփոխության համաձայն՝ նախատեսվում է Հայաստանում ներդնել արագացված ամորտիզացիայի ժամանակավոր գործիք։ Օրինագիծն ուղղված է այն գործարարներին, ովքեր նախատեսում են հաջորդ տարիներին ներդրումներ կատարել Հայաստանում: Մասնավորապես, այն ներդրողները, որոնք ներդրումներ կկատարեն մինչեւ 2020 թվականի հոկտեմբերի 31-ը, հնարավորություն կստանան ամորտիզացիոն մասհանումներ կատարել ոչ թե սահմանված նվազագույն ժամկետներում, այլ սահմանել դրանք սեփական հայեցողությամբ (առնվազն մեկ տարվա ընթացքում):
Մյուս փոփոխությունների հեղինակ, ԱԺ "Բարգավաճ Հայաստան" խմբակցության պատգամավոր Միքայել Մելքումյանն առաջարկել էր հարկային արտոնություններ տրամադրել փոքր և միջին բիզնեսի ձեռնարկությունների համար: Մելքումյանի խոսքով ՝ առաջարկվող օրինագիծը կոչված է երկու հիմնական խնդիր լուծել տնտեսվարող սուբյեկտների համար COVID-19 համաճարակի պայմաններում: Խոսքը, մասնավորապես, վերաբերում է ժամկետանց հարկային վճարումների համար տույժ-տուգանքների կրկնակի նվազեցմանը՝ 0,075 տոկոսից մինչեւ 0,04 տոկոս: Բացի այդ, ներկայումս դատական ակտերի հարկադիր կատարումն ապահովող ծառայությունը (ԴԱՀԿ) 500 հազար դրամ և ավելի հարկային պարտավորություններ չկատարելու համար իրավունք ունի արգելանք դնել գույքի և հաշիվների վրա։ Նոր փաստաթղթով առաջարկվում է նվազագույն մակարդակը 500 հազարից հասցնել 1,5 մլն դրամի։
