ՊԵԿ. Ապրիլի ցուցանիշները ցույց կտան  աշխատատեղերի դինամիկայի վրա արտակարգ դրության ռեժիմի ազդեցության իրական պատկերը

Արմինֆո.Ապրիլի 21-ի դրությամբ մարտ ամսին Հայաստանում աշխատատեղերի թիվը կազմել է 619.9 հազ., ինչը փետրվարի ցուցանիշը գերազանցում է 3.7 հազ. աշխատատեղով: Այդ մասին ապրիլի 23-ին Հայկական միասնական տեղեկատվական կենտրոնում մամուլի ասուլիսի ժամանակ հաղորդել է ՀՀ պետեկամուտների կոմիտեի նախագահ Դավիթ Անանյանը։

Նրա խոսքով ՝ 2020 թվականի փետրվարին աշխատատեղերի թիվը կազմել է 616.2 հազար, ինչը հունվարյան ցուցանիշներից ավելի է 14.4 հազարով: Այս առնչությամբ նա ընդգծել է, որ Հայաստանում աշխատատեղերի դինամիկայի վրա  արտակարգ դրության ռեժիմի ազդեցության իրական պատկերը հայտնի կդառնա մայիսի 21 - ին, երբ պատրաստ կլինեն ապրիլի տվյալները:

Նշենք, որ ըստ ՀՀ Վիճակագրական կոմիտեի տվյալների, 2020թ. հունվարի 1-ի դրությամբ զբաղված բնակչության թվաքանակը կազմել է 946.8 հազ. մարդ (տարեկան 4,3% աճով) կամ տնտեսապես ակտիվ բնակչության 46,8%-ը, իսկ գործազուրկներինը՝ 220.5 հազար, ինչը 5,8%-ով ցածր է նախորդ տարվա ցուցանիշից:

Հիշեցնենք, որ գործազրկության գծով ԿԲ-ն ակնկալում է հավասարակշռված մակարդակի աճ, բայց՝ թե ինչպիսի,  կախված կլինի կորոնավիրուսային ճգնաժամը մեղմելու համար ՀՀ կառավարության կողմից ձեռնարկվող միջոցների կոշտության աստիճանից ։ Իսկ միջնաժամկետ հեռանկարում ԿԲ-ն կանխատեսում է գործազրկության մակարդակի տարեկան նվազում 0,8-1,2 տոկոսային կետով՝ ժամանակահատվածի ավարտին  մոտենալով 17,3%-ի (նույն ցուցանիշն է նաեւ նախորդ կանխատեսման մեջ):