Իրանի եւ Հայաստանի միջեւ էլեկտրաէներգիայի հաղորդման նախագիծը իրագործման փուլում է

Արմինֆո. Իրանում Հայաստանի դեսպան Արտաշես Թումանյանը հայտարարել է, որ երկու երկրների միջեւ էլեկտրաէներգիայի հաղորդման համատեղ նախագիծը գտնվում է իրագործման փուլում ՝ չնայած կորոնավիրուսի համավարակին:

"Իրանի եւ Հայաստանի միջեւ համատեղ նախագծերը փակ չեն, եւ պատրաստվում են Իրանից Հայաստան 60 մարդու ուղարկել երկու երկրների միջեւ էլեկտրահաղորդման երրորդ գծում աշխատելու համար", - ասել է Թումանյանը՝ տարածաշրջանում COVID-19-ի բռնկման հետեւանքներին նվիրված առցանց հանդիպման ժամանակ, հաղորդում Է Mehr News-ը:

Իրանը և Հայաստանը տարիներ շարունակ համագործակցում են գազի և էլեկտրաէներգիայի փոխանակման ոլորտում, և երկկողմ տնտեսական ու քաղաքական կապերն աճել են առևտրի աճին զուգընթաց։ Հայաստանը բազմիցս հայտարարել է Իրանի հետ սվոպ-համաձայնագրեր կնքելու պատրաստակամության մասին։

Դեռեւս 2019 թվականի հուլիսին երկու երկրները Թեհրանում փոխըմբռնման հուշագիր են ստորագրել տնտեսական համագործակցության ընդլայնման շուրջ, հատկապես՝ էներգետիկայի ոլորտում:

Հուշագրից ելնելով՝ երկու կողմերը պայմանավորվել էին մինչև 2020 թվականը ավարտել Իրանից Հայաստան էլեկտրահաղորդման երրորդ գծի շինարարությունը, որպեսզի Հայաստան էլեկտրաէներգիայի արտահանումը հասցվի 1000 մեգավատի (ՄՎտ):

Հուշագիրը ներառում էր նաև համագործակցություն տարբեր ոլորտներում՝ ավտոմոբիլային և երկաթուղային փոխադրումներ, մաքսատուն, ստանդարտացում, ազատ առևտրի գոտիների ստեղծում, ինչպես նաև արդյունաբերություն, օգտակար հանածոների արդյունահանում և առևտուր:

Իրանն ու Հայաստանն օգտագործում են բարտերային համակարգը էլեկտրաէներգիայի դիմաց գազի և այլ հիմնական ապրանքների փոխանակման համար։