Հայաստանը հակաճգնաժամային դրամաշնորհի համար դիմել է ԿԶԵՀ

Արմինֆո. Հայաստանը հակաճգնաժամային դրամաշնորհի համար դիմել է Կայունացման և զարգացման եվրասիական հիմնադրամին (ԿԶԵՀ)։ Այդ մասին մայիսի 4-ին հաղորդել է էկոնոմիկայի փոխնախարար Վարոս Սիմոնյանը՝ ԱԺ տարածաշրջանային եւ եվրասիական ինտեգրման հարցերի մշտական հանձնաժողովի նիստի ժամանակ։

Նրա խոսքով՝ դրամաշնորհային միջոցները կուղղորդվեն Հայաստանի երեք մարզերում հիվանդանոցների եւ լաբորատոր հնարավորությունների վերազինմանը՝ համավարակի դեմ պայքարի պայմաններում:

"Այս պահին մշակվում է հիմնադրամի քաղաքականությունը դրամաշնորհների, վարկերի տոկոսադրույքների վերաբերյալ, որը շուտով կհրապարակվի", - հավելել է փոխնախարարը:

Հիշեցնենք, որ ԵԱԶԲ-ի ներդրումային պորտֆելը Հայաստանում 01.04.2020 դրությամբ կազմում է 223,5 մլն դոլարի 14 նախագիծ, որն ընդգրկում է ընդհանուր ծավալի 2,6% - ը: ՀՀ-ում ԿԶԵՀ-ի ներդրումային պորտֆելը նույն ամսաթվի դրությամբ կազմում է 490 մլն դոլարի 3 նախագիծ ( ընդհանուր ծավալի 9%): Հայաստանի Հանրապետությունը Եվրասիական զարգացման բանկի լիիրավ անդամ է դարձել 2009 թվականի ապրիլին: Հայաստանի ներդրումը բանկի կապիտալում կազմում է 100 հազար դոլար:

Նշենք, որ Կայունացման եւ զարգացման եվրասիական հիմնադրամը (ԿԶԵՀ) 8,513 մլրդ դոլարի չափով ստեղծվել է 2009 թվականի հունիսի 9-ին Հայաստանի Հանրապետության, Բելառուսի Հանրապետության, Ղազախստանի Հանրապետության, Ղրղզստանի Հանրապետության, Ռուսաստանի Դաշնության եւ Տաջիկստանի Հանրապետության կառավարությունների կողմից: ԿԶԵՀ-ի նպատակներն են աջակցել մասնակից պետություններին գլոբալ ֆինանսական ճգնաժամի հետեւանքների հաղթահարման, դրանց տնտեսական եւ ֆինանսական կայունության ապահովման եւ տարածաշրջանում ինտեգրացիոն գործընթացներին աջակցության գործում: ԿԶԵՀ-ի մասնակից պետությունները ԵԱԶԲ-ին օժտել են Հիմնադրամի միջոցների կառավարչի գործառույթներով եւ բանկի հետ կնքել են ԿԶԵՀ-ի միջոցների կառավարման համաձայնագիր: