Արմինֆո. Հայաստանի տնտեսության իրական հատվածում ընդհանուր օտարերկրյա ներդրումների ծավալը 2019 թվականին աճել է 17,7 տոկոսով՝ կազմելով 2.97 մլրդ դոլար, մինչդեռ մեկ տարի առաջ աճը համեստ էր՝ 7,9 տոկոս: Սակայն, դրանց կառուցվածքում ՕՈՒՆ կրճատվել է 2,5%-ով ՝ կազմելով 592 մլն դոլար՝ 2018-ի ավելի ծանրակշիռ 11,2% անկման դիմաց:
Այդ մասին են վկայում ներդրումների վերաբերյալ ՀՀ վիճակագրական կոմիտեի տվյալները 2019թ. համար: Ըստ վիճակագրական տվյալների ՝ ընդհանուր օտարերկրյա ներդրումներում ՕՈՒՆ մասնաբաժինը շարունակում է նվազել՝ 2016թ. 35,2 տոկոսից մինչև 20 տոկոս 2019թ.։
Ըստ երկրների՝ ընդհանուր ներդրումների եւ ՕՈՒՆ ծավալով առաջատարությունը պահպանում է Ռուսաստանը. 2019 թվականին՝ 1.02 մլրդ դոլար (տարեկան աճի դանդաղումով ՝ 23,5 տոկոսից մինչեւ 3,4 տոկոս), այդ թվում ՝ ՕՈՒՆ՝ 386,1 մլն դոլար (տարեկան դինամիկայի վատթարացմամբ ՝ 31,7 տոկոս աճից 8,4 տոկոս անկում): Երկրորդ դիրքում ամրապնդվել է Գերմանիան՝ 684.6 մլն դոլար (տարեկան աճի դանդաղումով ՝ 54,9 տոկոսից մինչեւ 16,1 տոկոս), որից 20,7 մլն դոլարը ՝ ՕՈՒՆ (տարեկան դինամիկայի շրջադարձով ՝ 41,6 տոկոս աճից 51,5 տոկոս անկում): Առռռաջատար եռյակը, ինչպես եւ նախկինում, եզրափակում Է Կիպրոսը, որտեղից 2019 թվականին ներդրումներ են կատարվել 75.7 մլն դոլար ընդհանուր ծավալով (տարեկան անկման դանդաղումով ՝ 71.5 տոկոսից մինչեւ 12.7 տոկոս), որից ՕՈՒՆ՝ 26.2 մլն դոլար (տարեկան աճի դանդաղումով ՝ 48.7 տոկոսից մինչեւ 15.1 տոկոս):
Ընդհանուր օտարերկրյա ներդրումների ծավալում Ռուսաստանի բաժինը 2019թ. կրճատվել է 38,1 տոկոսից մինչեւ 34,3 տոկոս, Գերմանիայինը՝ 23,4 տոկոսից մինչեւ 23,1 տոկոս, Կիպրոսինը՝ 3,4 տոկոսից մինչեւ 2,6 տոկոս: Իսկ ՕՈՒՆ ընդհանուր ծավալում Ռուսաստանի բաժինը 69,4 տոկոսից կրճատվել է մինչեւ 65,2 տոկոս, Գերմանիայինը՝ 7 տոկոսից մինչեւ 3,5 տոկոս, իսկ Կիպրոսինը, ընդհակառակը, աճել է 3,8 տոկոսից մինչեւ 4,4 տոկոս:
Իսկ ըստ տնտեսության ոլորտների ներարկումների առավել անկում է արձանագրվել հանքարդյունաբերության ոլորտում, որտեղ ներդրումների առյուծի բաժինը պատկանում է Ջերսիի օֆշորային գոտուն։ Մասնավորապես, 2019 թվականի դեկտեմբերի վերջի դրությամբ Ջերսիից կատարված ներդրումների ընդհանուր ծավալը (և դա ամբողջությամբ ՕՈՒՆ) պահպանվել է 138.7 մլրդ դրամի (289 մլն դոլար ՝ համախառն հոսք 1988 - 2019թթ.) մակարդակում ՝ 2018 թվականի ապրիլից ծավալներով չփոխվելով, ինչը նշանակում է ներարկումների բացակայություն։ Դա, ամենայն հավանականությամբ, պայմանավորված է Ամուլսարի ծրագրի փաստացի կասեցմամբ։
Ս. թ. մայիսին Համաշխարհային բանկի նորացված կանխատեսումներով՝ Հայաստանի ՀՆԱ-ի նկատմամբ ՕՈՒՆ-ի զուտ հոսքի հարաբերակցությունը 2020թ. կնվազի մինչև 1,8% ՝ 2019թ. փաստացի 2,2% - ից։
Նշենք, որ ՀՀ վիճակագրական կոմիտեն օտարերկրյա ներդրումների վերաբերյալ տվյալները հրապարակում է եռամսյակը մեկ' նշելով դրանց դրամային համարժեքով և համախառն հոսքի տեսքով' կուտակված ծավալով (առանց մարումների) 1988թ. - ից մինչև հաշվետու թվականը, տվյալ դեպքում մինչև 2019թ. դեկտեմբերի 31-ը: Այս նյութի պատրաստման համար Արմինֆո-ի մասնագետներն ինքնուրույն հաշվարկել են տարեկան տվյալները' հիմք ընդունելով համապատասխան դիտարկվող 2019 և 2018 թվականների համախառն հոսքի վիճակագրական տվյալները: (Դրամի հաշվարկային փոխարժեքը
31.12.2019 թ. կազմել է 479,70 դր./$1):