Արմինֆո.Կորոնավիրուսի առնչությամբ ստեղծված իրավիճակն ազդել է ֆիզիկական եւ իրավաբանական անձանց եկամուտների վրա, ինչը, անկասկած, չէր կարող չանդրադառնալ վարկավորման գործընթացի վրա: Այդ մասին մայիսի 26-ին կայացած առցանց մամուլի ասուլիսի ժամանակ հայտարարել է Հայաստանի բանկերի միության (ՀԲՄ) գործադիր տնօրեն Սեյրան Սարգսյանը՝ պատասխանելով ԱրմԻնֆո գործակալության հարցին:
"Բնականաբար, բանկերն այժմ ի վիճակի չեն վարկավորել այն նույն ծավալներով, որոնք նախկինում կային կորոնավիրուսին առնչվող իրավիճակից առաջ։ Ֆինանսավորման գործընթացը կշարունակվի, սակայն հաճախորդների վճարունակության վատթարացումը կանդրադառնա վարկավորման ծավալների վրա", - պարզաբանել է նա։
Միաժամանակ, Սարգսյանը ուշադրություն է հրավիրել այն հանգամանքին, որ արտակարգ դրության ժամանակ ֆիզիկական եւ իրավաբանական անձանց տրամադրված վարկային արձակուրդներից հետո որոշ հաճախորդներ կբախվեն վարկային պարտավորությունների մարման դժվարությունների: "Դա, բնականաբար, լավագույն ձևով չի ազդի չաշխատող վարկերի ծավալի վրա։ Նշեմ, որ մինչև կորոնավիրուսը Հայաստանի բանկային համակարգի վարկային պորտֆելում չաշխատող վարկերի մասնաբաժինը կազմում էր 4-5% (չհաշված անհուսալի վարկերը - խմբ.), և պատմականորեն միշտ ավելի ցածր է եղել, քան այլ երկրներում։ Նույնիսկ այն դեպքում, եթե այդ ցուցանիշը մի քանի անգամ ավելանա, միևնույն է, այլ երկրների համեմատ այն կլինի թույլատրելի սահմաններում և միանգամայն կառավարելի։ Եվ սա այն հիմնական ազդեցություններից մեկն է, որին մենք բախվելու ենք հետկորոնավիրուսսսյան շրջանում ", - ընդգծել է Ս. Սարգսյանը:
Նշենք, որ մարտի 13-ից Հայաստանի բանկերը հայտարարել են 2-3 ամսվա վարկային արձակուրդի մասին
ֆիզիկական և իրավաբանական անձանց համար, որոնք ենթադրում են վճարումների հետաձգում
վարկի մայր գումարի և տոկոսագումարների մարումներ: Ընդ որում, հետաձգված
վճարումները կփոխանցվեն հետագա ամիսներին: Փորձագետների կարծիքով՝ դա մեծացնում է մարումների ամսական ծանրաբեռնվածությունը, ինչը կորոնավիրուսի համաճարակի պատճառով բարդ իրավիճակում հայտնված վարկառուի եւ այդ կապակցությամբ ձեռնարկված սահմանափակող միջոցների առնչությամբ բարդացնում է վարկային պարտավորությունները կատարելու հնարավորությունը: