Արմինֆո. Գազի նոր սակագների կիրառումը չի կարող բավարարել <Գազպրոմ Արմենիա> ՓԲԸ-ն ։ Այս մասին հունիսի 19-ին լրագրողներին ասել է ընկերության գլխավոր տնօրեն Հրանտ Թադեւոսյանը։
Նրա խոսքով ՝ Հանրային ծառայությունները կարգավորող հանձնաժողովի կողմից որոշման ընդունմամբ ընկերությունն ստիպված կլինի ռեսուրսներ որոնել բնականոն կենսագործունեության ապահովման համար ։ Մասնավորապես, ստիպված կլինեն կրճատել հաստիքային միավորների քանակը հազարով։ Ընկերության 10 ղեկավարների աշխատավարձերը կնվազեն։ Ինչ վերաբերում է գլխավոր տնօրենի աշխատավարձին, ապա այն որոշում է <Գազպրոմ> ԲԲԸ-ն ։ <Ես նամակ եմ հղել <Գազպրոմի> ղեկավարությանը ՝ առաջարկելով կրճատել իմ աշխատավարձը, սպասում եմ ընկերության որոշմանը>, - ասել է Հրանտ Թադեւոսյանը: Նա նաև նշել է, որ <Գազպրոմ Արմենիա> - ն գազ է ձեռք բերում սահմանին 1000 խմ-ի դիմաց 165 դոլար գնով, իսկ ներքին շուկայում վաճառում է 255 դոլար գնով: 90 ԱՄՆ դոլար ընդհանուր տարբերությունից ընկերությունը վճարում է 43 դոլար ՝ ԱԱՀ-ի տեսքով, 12 դոլար կազմում են կորուստները, 19 դոլարը՝ աշխատավարձը։ Մնում է 16 դոլար, որով անհրաժեշտ է շահագործել համակարգը, իրականացնել վերանորոգման աշխատանքներ և այլ միջոցառումներ, ինչը ներկայիս սակագների պարագայում ուղղակի անիրատեսական է ։
Գլխավոր տնօրենը նաեւ հայտնել է, որ մինչեւ 2020 թվականը ընկերությունը մտադիր է գազի տնտեսության զարգացման համար ներդնել 230 մլրդ դրամ կամ 480 մլն դոլար: <Գազպրոմ Արմենիա> - ն այդ ժամանակահատվածում 60,8 մլրդ դրամի միջին մարժայի հույս ուներ, սակայն ՀԾԿՀ-ի այսօրվա որոշումը կհանգեցնի այդ մարժայի կրճատմանը։
Հայաստանի Հանրային ծառայությունները կարգավորող հանձնաժողովը հունիսի 19-ի նիստում հաստատել է գազի սակագների նոր դրույքաչափեր, որոնք կսկսեն կիրառվել հուլիսի 15-ից։
Հիշեցնենք, որ ՀԾԿՀ-ն առաջարկում է ֆիզիկական անձանց համար թողնել 1000 խմ երկնագույն վառելիքի դիմաց 139 հազար դրամ վերջնական սակագինը՝ "Գազպրոմ Արմենիա" ընկերության առաջարկած 135 հազարի փոխարեն: ՀԾԿՀ-ն անհրաժեշտ է համարում անփոփոխ թողնել սոցիալապես անապահով խավերի համար սահմանված սակագնի չափը՝ 1 հազար խմ դիմաց 100 հազար դրամ, միեւնույն ժամանակ, մի փոքր կավելանա ջերմոցային տնտեսությունների համար գազի սակագինը: Մասնավորապես, գազի մենաշնորհատիրոջ առաջարկած 283.14 դրամի փոխարեն ՀԾԿՀ-ն առաջարկում է սահմանել 224 դրամ սակագին՝ ներկայիս 212 դրամի փոխարեն։ Գյուղմթերքի վերամշակման ձեռնարկությունների համար ներկայում գործող 212 դրամի փոխարեն հանձնաժողովն ընդունելի է համարում ընկերության առաջարկած 224 դրամի տարբերակը' ընկերության առաջարկած 283.14 դրամի փոխարեն: Մինչեւ 10 հազար խորանարդ մետր ծավալով բնական գազի սակագինը, որը վաճառվում է ջերմային էլեկտրակայաններին, կմնա նույնը ՝ 139 հազար դրամ 1000 խմ դիմաց՝ ընկերության առաջարկված 135.9 հազար դրամի փոխարեն: Ամսական 10 հազար խորանարդ մետրից ավելի սպառողների համար սակագինը կսահմանվի 255,92 դոլար՝ "Գազպրոմ Արմենիա" ՓԲԸ-ի կողմից առաջարկվող 283,14 դոլարի փոխարեն: