Արմինֆո. Օգոստոսի 13-ին Երևան քաղաքի առաջին ատյանի ընդհանուր իրավասության դատարանը բավարարել է «Յուքոմ» փակ բաժնետիրական ընկերության հայցի ապահովման միջնորդությունը մասնակի՝ այն մասով, որ արգելել է «ԹԻՄ» ՍՊ ընկերությանը կնքել «Վեոն Արմենիա» ՓԲ ընկերության բաժնետոմսերի ձեռք բերման գործարք և գրանցման ներկայացնել գործարքից ծագող իրավունքները: Այդ մասին հաղորդել է «Յուքոմի» մամուլի ծառայությունը:
«Յուքոմ» ՓԲԸ-ն հայցադիմում էր ներկայացրել Երևան քաղաքի առաջին ատյանի ընդհանուր իրավասության դատարան ընդդեմ «ԹԻՄ» սահմանափակ պատասխանատվությամբ ընկերության՝ խնդրելով հաստատել, որ առկա պայմաններում «ԹԻՄ» ՍՊԸ կողմից «Վեոն Արմենիա» ՓԲԸ բաժնետոմսերի ձեռքբերման բանակցային գործընթացում «Յուքոմ» ՓԲԸ պատկանող չբացահայտված տեղեկատվության օգտագործումը և «ԹԻՄ» ՍՊԸ հիմնադիրների կողմից «Յուքոմ» ՓԲԸ հանդեպ ունեցած ֆիդուցիար պարտավորությունների խախտումը հանդիսանում է անբարեխիղճ մրցակցություն, ինչպես նաև պարտավորեցնել «ԹԻՄ» ՍՊ ընկերությանը դադարեցնել անբարեխիղճ մրցակցությունը:
Նշենք, որ «Յուքոմ»-ը միջնորդել էր կիրառել հայցի ապահովման միջոց, մասնավորապես, «ԹԻՄ» ՍՊԸ-ին արգելել վարել բանակցություններ «Վեոն Արմենիա» ՓԲԸ-ի բաժնետոմսերի ձեռքբերման վերաբերյալ գործարքի կնքման շուրջ, ինչպես նաև կնքել «Վեոն Արմենիա» ՓԲԸ բաժնետոմսերի ձեռքբերման բանակցվող գործարքը (ստորագրել գործարքը և գրանցման ներկայացնել գործարքից ծագող իրավունքները):
Հաշվի առնելով գործի առանձնահատկությունները՝ «Յուքոմ»-ը ձեռնպահ է մնում հետագա տեղեկատվության տրամադրումից, սակայն գործի հետագա փուլերում, ըստ անհրաժեշտության, հավելյալ պարզաբանումներ կներկայացվեն հանրությանը», - ասվում է հաղորդագրությունում:
Հիշեցնենք, որ "Թիմ" ՍՊԸ-ն ստեղծվել է բոլորովին վերջերս՝ "Յուքոմ" ընկերության նախկին թոփ մենեջմենթի կողմից ։ Մինչև "Յուքոմ"-ում կադրային փոփոխությունները խոսք էր գնում հենց այդ ընկերության կողմից "Վեոն Արմենիա"-ի հնարավոր ձեռք բերման, ինչպես նաև "Յուքոմ"-ի հետգնման մասին։ Սակայն այդ գործարքներից ոչ մեկը չի կայացել, եւ, ինչպես կարծում են շուկայի մասնակիցները, որոնք մեկնաբանում են "Թիմի" նոր հայտը, գործարքը միանգամայն կարող է կայանալ: Իսկ Հայաստանից «Վեոն»-ի հեռանալը կապված է ցածր եկամտաբերությամբ փոքր շուկաներում չաշխատելու եւ գլոբալ դաշտում կենտրոնանալու ընկերությունների այս միջազգային խմբի որոշման հետ։
