Արմինֆո. Ռուսաստանի եւ Հայաստանի տրանսպորտային գերատեսչությունները կարգավորել են տարաձայնությունները Հարավկովկասյան երկաթուղու գործունեության ոլորտում: Համապատասխան արձանագրությունն այսօր ստորագրել են ՌԴ տրանսպորտի նախարարի տեղակալ, Երկաթուղային տրանսպորտի դաշնային գործակալության ղեկավար Վլադիմիր Տոկարևը և ՀՀ տարածքային կառավարման և ենթակառուցվածքների նախարարի տեղակալ Արմեն Սիմոնյանը: Այդ մասին տեղեկացնում է ՌԴ տրանսպորտային գերատեսչության պաշտոնական կայքը:
Այսպիսով, ինչպես նշում է աղբյուրը, կարգավորվել են բոլոր տարաձայնությունները "Ռուսական երկաթուղիներ" ԲԲԸ-ի դուստր ձեռնարկության՝ "Հարավկովկասյան երկաթուղի" ՓԲԸ - ի ֆինանսատնտեսական գործունեության վերաբերյալ: Մասնավորապես, փաստաթղթում ամրագրված է Ռուսաստանի եւ Հայաստանի պրոֆիլային նախարարությունների համաձայնությունը " ՀԿԵ " ՓԲԸ գործունեության անկախ աուդիտորական ստուգումների արդյունքների հետ, որոնք իրականացվել են 2008թ. կնքված կոնցեսիոն պայմանագրի գործողության ողջ ընթացքում: Հաստատվել է նաեւ ՀԿԵ-ի կողմից իր ներդրումային պարտավորությունների ամբողջական կատարումը եւ, որպես հետեւանք, կողմերի պահանջների բացակայությունը:
Չնայած կորոնավիրուսային վարակի տարածման առնչությամբ գործող սահմանափակող միջոցներին՝ Հարավկովկասյան երկաթուղու ֆինանսական և արտադրական մի շարք ցուցանիշներ շարունակում են աճել։ Դա թույլ է տալիս դրական գնահատել Ռուսաստանի և Հայաստանի փոխադրողների հետագա համատեղ աշխատանքի հեռանկարները։
Արձանագրության ստորագրումը կարևոր դեր է խաղում ՀԿԵ առջև ծառացած մի շարք խնդիրների լուծման գործում։ Խոսքը վեերաբերում է ինչպես բեռնափոխադրումների եւ ուղեւորափոխադրումների ծավալների ավելացման, այնպես էլ երկաթուղային շարժակազմի թարմացմանը։ Կողմերն ընդգծել են ստորագրված փաստաթղթի կարեւորությունը եւ նշել, որ այն կնպաստի երկրների տնտեսական համագործակցության հետագա զարգացմանը:
Հիշեցնենք, որ "Հարավկովկասյան երկաթուղի" ՓԲԸ-ն "Ռուսական երկաթուղիներ" ԲԲԸ-ի 100% դուստր ընկերությունն է եւ իրականացնում է Հայկական երկաթուղիների կոնցեսիոն կառավարումը: Հայաստանի երկաթուղային ենթակառուցվածքը հանձնվել է "ՀԿԵ" ՓԲԸ կոնցեսիոն կառավարմանը ' համաձայն 2008թ. փետրվարի 13-ին ստորագրված Կոնցեսիոն պայմանագրի: Հավատարմագրային կառավարման ժամկետը կազմում է 30 տարի՝ 10 տարի երկարաաձգման իրավունքով: