Արմինֆո.Հայաստանի Կենտրոնական բանկը ինտերվենցիաներ չի իրականացրել (նկատի ունի 2020թ. մայիսից - խմբ.): Այս մասին հոկտեմբերի 27 - ին մամուլի ասուլիսի ժամանակ հայտարարել է Հայաստանի Կենտրոնական բանկի նախագահ Մարտին Գալստյանը։
"Կենտրոնական բանկի հիմնական գործառույթներն են ֆինանսական կայունության եւ շուկայում գների կայունության ապահովումը, եւ արժույթը մեզ համար հետաքրքիր է բացառապես այն տեսանկյունից, թե որքանով է այն ասոցացվում այս երկու երեւույթների հետ", - ընդգծել է նա:
Միաժամանակ, Մ. Գալստյանը նշել է, որ ԿԲ-ն այս պահին նպատակահարմար չի գտնում միջամտել արժութային շուկայում տիրող իրավիճակին: "Քանի որ արտարժույթի տեղի ունեցող տատանումները, մեր գնահատականներով, բնական են, եւ միջամտություն չեն պահանջում", - պարզաբանել է նա:
Նշենք, որ ըստ ԿԲ-ի տվյալների, 2020թ.հունվար-օգոստոսին ԿԲ-ն արտարժույթի շուկայում կատարել է ընդհանուր առմամբ 217.9 մլն դոլարի ինտերվենցիաներ, որից 90.9 մլն դոլարի (հունվար-փետրվար եւ ապրիլ) առքի գծով եւ 127 մլն դոլարի (մարտ-ապրիլ) վաճառքի գծով, եւ այդ ժամանակահատվածում 1 դոլարի նկատմամբ դրամը հունվարի 479,09 դր/1դոլարից ապրիլին հասել է 493,1 դր/1դոլարի (առք/վաճառք): Եվ եթե հունվար-փետրվար ամիսներին արտարժույթի շուկայում ինտերվենցիաները բացառապես առքի գծով էին, իսկ մարտին՝ միայն վաճառքի գծով, ապա ապրիլին ԿԲ-ն կատարել է գործարքներ թե առքի, թե վաճառքի գծով, ընդ որում վաճառքի ծավալը գրեթե 2 անգամ գերազանցել է առքի ծավալը, ինչը առքի փոխարժեքը ձեւավորել է 481,66 դր/1դոլարի մակարդակում, եւ վաճառքի փոխարժեքը՝ 504,45 դր/$1-ի մակարդակում: Մայիս-օգոստոս ամիսներին Կենտրոնական բանկը արտարժույթի շուկայում գործարքներ չի կատարել։
RUB | 4.19 | 0.00 |
USD | 394.07 | -1.03 |
EUR | 420.75 | 0.36 |
GBP | 491.72 | -0.42 |
CAD | 286.47 | 0.33 |
JPY | 25.52 | -0.03 |
CNY | 54.44 | -0.14 |
CHF | 433.66 | 0.15 |