Հայաստանի զբոսաշրջության ֆեդերացիան մարքեթինգի համար պետության ծախսերի ավելացման անհրաժեշտություն է տեսնում

Արմինֆո.Պետությունը պետք է ավելացնի մարքեթինգի եւ գովազդի ծախսերը զբոսաշրջության ոլորտում: Մամուլի ասուլիսի ժամանակ այդպիսի կարծիք է հայտնել Հայաստանի զբոսաշրջության ֆեդերացիայի նախագահ Մեխակ Ապրեսյանը:

Նա պարզաբանել է, որ 2019 թվականին Հայաստան է այցելել շուրջ 1.9 մլն զբոսաշրջիկ, իսկ դա նշանակում է, որ միայն զբոսաշրջության ոլորտն ապահովել է շուրջ 1.5 մլրդ դոլարի եկամուտ: Կոպիտ հաշվարկով, ըստ Ապրեսյանի, այդ գումարից պետբյուջե է ուղղորդվում 300 մլն դոլար: "Արդյո՞ք մենք չենք կարող այդ գումարի գոնե 1% - ն ուղղել զբոսաշրջության ոլորտում մարքեթինգային քաղաքականության զարգացմանը, ինչը, նույնիսկ, ավելի քիչ է, քան աշխարհում ընդունված է ծախսել: Չէ որ դա մեզ թույլ կտա տեսնել արդյունքները շատ ավելի արագ", - նշել է նա։

Այդ առնչությամբ Ֆեդերացիայի ղեկավարը վկայակոչել Է ՄԱԿ զբոսաշրջության համաշխարհային կազմակերպության հետազոտությունը, որի համաձայն, մեկ զբոսաշրջիկի համար մարքեթինգի տեսանկյունից անհրաժեշտ է ծախսել 4-6 դոլար: "Եթե մենք մոտ 2 մլն զբոսաշրջիկ ունեինք, մեր ծախսերը պետք է կազմեին մոտ 8-12 մլն դոլար: Բայց մենք դա էլ չենք խնդրում, գոնե 3 մլն դոլար հատկացրեք, որպեսզի հեղափոխություն անենք նաև այդ ոլորտում", - ասել է նա:

Բացի այդ, ֆեդերացիայի նախագահը կարևորել է միջազգային հեղինակավոր կազմակերպության երրորդ անձի այցը Հայաստան, ինչը թույլ կտար վկայել երկրում անվտանգ միջավայրի մասին հետպատերազմյան իրավիճակի տեսանկյունից: Ապրեսյանը նշել է, որ այդ առումով պետք է աշխատել նաև դիվանագիտական ուղղություններով, օգտագործել Սփյուռքի ներուժը, որպեսզի, ի վերջո, Հայաստանը չհայտնվի զբոսաշրջային այցելությունների համար չհանձնարարվող երկրների ցանկում: