Արմինֆո. Հայաստանում կստեղծվեն պետական գնումների գործընթացի վերահսկողության նոր մեխանիզմներ։ ՀՀ Ազգային ժողովը հունվարի 20-ի նիստում առաջին ընթերցմամբ փոփոխություններ եւ լրացումներ է կատարել <Գնումների մասին> օրենքում:
Ներկայացված փաստաթղթի համահեղինակ, ԱԺ <Իմ քայլը> խմբակցության պատգամավոր Գեւորգ Պապոյանի խոսքով, փոփոխություններով նախատեսված են մեխանիզմներ, որոնք նվազեցնում են կոռուպցիոն ռիսկերը, բարձրացնում են պետական գնումների գործընթացի թափանցիկության մակարդակը, ինչը, որպես հետեւանք, կհանգեցնի այդ գործընթացների նկատմամբ հասարակության վստահության մակարդակի բարձրացմանը: Օրինագծի հեղինակներն առաջարկում են ապահովել մրցույթում պարտություն կրած ընկերությունների ներկայացուցիչների մասնակցությունը պետական գնումների ընդունման ընթացակարգին: Դրա հետ մեկտեղ ընթացակարգին կմասնակցեն նաեւ շահագրգիռ հասարակական կազմակերպություններն ու ԶԼՄ-ները: Դրանք բոլորը հնարավորություն կունենան ստուգելու պետական գնումների շրջանակներում մատակարարվող ապրանքի համապատասխանությունը հայտում նկարագրված պարամետրերին։ Նման մեխանիզմները գործելու են ավելի քան 1 մլն դրամի պայմանագրերի դեպքում։ <Այլ կերպ ասած՝ ստեղծվում են պետական գնումների գործընթացի նկատմամբ հանրային վերահսկողության նոր մեխանիզմներ>, - եզրափակել է պատգամավորը:
Նշենք, սակայն, որ վերջին շրջանում Հայաստանում պետական գնումներն ավելի ու ավելի հաճախ են իրականացվում մեկ անձից, ինչը փորձագիտական հանրության կողմից արդարացի քննադատության է արժանանում։ Ավելի վաղ ԱԺ պատգամավոր Սերգեյ Բագրատյանը բազմիցս բարձրացրել էր մեկ անձից պետգնումների համակարգի կիրառման արատավոր պրակտիկան փոխելու անհրաժեշտության հարցը: Նրա խոսքով ՝ ներկայումս հայտամրցույթներին, որպես կանոն, մասնակցում են փոխկապակցված անձինք։ Պետության ներկայացուցիչը նախապես պայմանավորվում է տնտեսվարող սուբյեկտի հետ ապրանքների և ծառայությունների առարկայի վերաբերյալ, որից հետո հարցը մրցույթի է դնում՝ արդեն <համաձայնեցված> անվանացանկով։ Այս արատավոր պրակտիկայի կիրառման հետևանքով ավելի ու ավելի հաճախ են ի հայտ գալիս շուկայում գերիշխող սուբյեկտներ։
Նշենք, որ խորհրդարանական լսումների ժամանակ ՀՀ ֆինանսների նախարար Ատոմ Ջանջուղազյանը տեղեկացրել էր նորամուծությունների մասին, որոնցից մեկը կլինի պետության ներկայացուցչից գնումների հարցի՝ բանկային համակարգ տեղափոխումը։