Հինգշաբթի, 4 Փետրվարի 2021 18:50

Արմինֆո.  Համավարակով պայմանավորված սահմանափակումները բացասաբար են ազդել ԵԱՏՄ-ում փոխադարձ առեւտրի ծավալների վրա, ինչը կապված էր ամենից առաջ տրանսպորտային հաղորդակցության խափանումների հետ: Այս մասին Նուր Սուլթանում Եվրասիական տնտեսական հանձնաժողովի Կոլեգիայի անդամների (նախարարների) մամուլի ասուլիսի ժամանակ՝ նվիրված <Եվրասիական տնտեսական ինտեգրացիա.նոր հնարավորություններ քաղաքացիների և բիզնեսի համար> թեմային, հայտարարել է  ԵՏՀ ինտեգրման և մակրոտնտեսության հարցերով Կոլեգիայի անդամ (նախարար) Սերգեյ Գլազևը:

 

Այդ համատեքստում նա հայտնել է, որ 2020 թվականի 11 ամիսների արդյունքներով ԵԱՏՄ-ում ապրանքաշրջանառությունը կրճատվել է 11 տոկոսով ՝ կազմելով 44 մլրդ դոլար: Գլազեւն ընդգծել է, որ արտաքին առեւտրի մասով ավելի խոր անկում է գրանցվել։ <Ակնկալում ենք, որ ռազմավարական ուղղությունների միջոցառումների իրականացման շնորհիվ մենք արագ կվերականգնենք ծավալները>, - ասել է նախարարը ՝ նշելով, որ փոխադարձ առեւտրի վրա ազդել են նաեւ փոխարժեքների տատանումները:

 

Արդյունաբերության և ագրոարդյունաբերական համալիրի հարցերով  Կոլեգիայի անդամ Արտակ Քամալյանն իր հերթին նշել է, որ չնայած կորոնաճգնաժամին՝ կան ոլորտներ, որտեղ դրական միտումներ են արձանագրվել: Մասնավորապես, նա այդ համատեքստում նշել է դեղագործությունը, որտեղ հաշվետու ժամանակահատվածում աճի տեմպերը գրանցվել են 22-23 տոկոս մակարդակում, քիմիական արդյունաբերությունը ՝ 5 տոկոս աճ, տեքստիլ արդյունաբերությունը ՝ 10-12 տոկոս: Դրա հետ մեկտեղ նա նշել է, որ աճի բավականին բարձր տեմպեր են արձանագրվել սննդի արդյունաբերության ոլորտում, այդ թվում ՝ գյուղատնտեսության առանձին ուղղություններով, ինչպես՝ մսի եւ պանրի արտադրությունը:

 

ԵԱՏՄ երկրների հետ Հայաստանի արտաքին առևտրաշրջանառությունը 2020թ. հունվար-նոյեմբերինմ, 2019թ. նույն ժամանակահատվածի համեմատ, կրճատվել է 2%-ով (նախորդ տարվա 12,8% աճի դիմաց) ՝ կազմելով 2.03 մլրդ դոլար ։

 

ԵԱՏՄ երկրների հետ Հայաստանի արտաքին առեւտրի բացասական սալդոն կազմել է 773.2 մլն դոլար ՝ 11 ամսում աճելով 16,6 տոկոսով (նախորդ տարվա 17,5 տոկոս աճի փոխարեն), ներմուծման 2,5 տոկոսով աճի ֆոնին՝ մինչեւ 1.4 մլրդ դոլար, արտահանման 10,7 տոկոսով անկման դեպքում՝ մինչեւ 627.9 մլն դոլար (մեկ տարի առաջ ներմուծման 13,9 տոկոս եւ արտահանման 10,7 տոկոս աճի փոխարեն): Այս մասին են վկայում ՀՀ Վիճակագրական կոմիտեի տվյալները։

 

Ըստ վիճակագրական տվյալների ՝ ԵԱՏՄ երկրների հետ Հայաստանի արտաքին առևտրաշրջանառության նվազման միտումը պայմանավորել են Ռուսաստանն ու Ղրղըզստանը, իսկ Բելառուսն ու Ղազախստանը աճ են գրանցել ։ Մասնավորապես՝  Ռուսաստանի հետ Հայաստանի արտաքին առեւտրային շրջանառությունը կրճատվել է տարեկան 2,8 տոկոսով (մեկ տարի առաջ 12,6 տոկոս աճի դիմաց), իսկ Ղրղըզստանի հետ ՝ 44,5 տոկոսով (մեկ տարի առաջ 3,3 անգամ աճի դիմաց)։ Ընդ որում, Բելառուսի հետ Հայաստանի արտաքին առեւտրաշրջանառության տարեկան աճը 28,7 տոկոսից դանդաղել է մինչեւ 17,5 տոկոս, իսկ Ղազախստանի հետ 87,5 տոկոս անկումից  37,4 տոկոս աճ է գրանցել։

 

Ռուսաստանը պահպանում է առաջատարի դիրքը ինչպես արտաքին առեւտրաշրջանառության ընդհանուր ծավալով (1.9 մլրդ դոլար), այնպես էլ արտահանման եւ ներմուծման ցուցանիշով (համապատասխանաբար 604.3 մլն դոլար եւ 1.3 մլրդ դոլար):

Արտահանումը Ռուսաստանի հետ 10,8% աճից 11,1% անկում է արձանագրել՝ ներմուծման աճի զգալի դանդաղման դեպքում ՝ 13,6% - ից 1,3%։

 

ԵԱՏՄ երկրների հետ Հայաստանի արտաքին առևտրաշրջանառության տեսակարար կշիռը արտաքին առևտրի ընդհանուր կառուցվածքում 2020թ. 11 ամիսների արդյունքներով կազմել է 31,9%՝ նախորդ տարվա 28,5% - ի դիմաց: Ընդ որում, Ռուսաստանի բաժինը աճել է 27,6 տոկոսից մինչեւ 30,6 տոկոս, Բելառուսի ՝ 0,8 տոկոսից մինչեւ 1,1 տոկոս, Ղազախստանի ՝ 0,1 տոկոսից մինչեւ 0,2 տոկոս, իսկ Ղրղըզստանի, ընդհակառակը, նվազել է 0,04 տոկոսից մինչեւ 0,03 տոկոս: ԵԱՏՄ երկրների հետ Հայաստանի արտաքին առեւտրի կառուցվածքում Ռուսաստանի մասնաբաժինը կազմում է 95,7%, Բելառուսի՝ 3,5%, Ղազախստանի՝ 0,7%, Ղրղըզստանի՝ 0,1%:

 

Նշենք, որ, ՀՀ Վիճակագրական կոմիտեի համաձայն, ԵԱՏՄ երկրների հետ Հայաստանի արտաքին առևտրաշրջանառությունը 2020թ.հունվար-նոյեմբերին կրճատվել է 2%-ով ՝ կազմելով 2.03 մլրդ դոլար։