Արմինֆո. Բջջային հավելվածի միջոցով հնարավոր կլինի վերահսկել խաղողի մթերումն ամբողջությամբ։ Այս մասին փետրվարի 18-ին կառավարության նիստում հայտարարել է ՀՀ էկոնոմիկայի նախարար Վահան Քերոբյանը։
Վահան Քերոբյանը հավելել է, որ խնդիրն իսկապես լուրջ է և մի շարք մեծ հարցեր են առաջացել մթերումը վերահսկելու կամ մթերման գործընթացին հետևելու ժամանակ։ Նախարարի գնահատմամբ՝ հարցը անհրաժեշտ է լուծել թվային մեթոդների կիրառմամբ, որպեսզի շատ աշխատուժ չներգրավվի այդ գործընթացում: Վահան Քերոբյանը հայտնել է նաև, որ 3 մարզում արդեն ավարտվել են խաղողի տնկարկների քարտեզագրման գործընթացը, այս տարի նախատեսվում է ևս 2 մարզում այդ աշխատանքներն իրականացնել: «Արդյունքում մենք կունենանք ամբողջական պատկեր խաղողի այգիների մասով և բջջային հավելվածի միջոցով հնարավոր կլինի վերահսկել խաղողի մթերումն ամբողջությամբ»,-ասել է նախարարը
Անդրադառնալով կոնյակի սպիրտի արտահանման տուրքի փոխհատուցման հարցին՝ Նիկոլ Փաշինյանը հետաքրքրվել է, թե արդյոք կոնյակի սպիրտի այդ ծավալներն արդեն արտահանվե՞լ են, և հիմա տուրքի փոխհատուցո՞ւմ է իրականացվում: Վահան Քերոբյանը ի պատասխան նշել է, որ այո, սա նախորդ տարվա արտահանվածի տուրքի փոխհատուցումն է. «Այս տարվա համար 900 մլն դրամ ենք հատկացրել, որը 9 մլն լիտր կոնյակի սպիրտի արտահանման խթանմանն ուղղված ծրագիր է: Սա շատ կարևոր ծրագիր եմ համարում, որը նաև շղթայական էֆեկտ ունի մինչև խաղողագործություն և գյուղատնտեսության զարգացում»:
Նախարարի խոսքով, հաշվի առնելով անցած տարվա խիստ ծանր վիճակը կոնյակի և գինու արտահանման հարցում, այդ 2 կատեգորիաներում ունեն էական անկում. «Կոնյակի սպիրտի այս ծրագիրը հույժ կարևոր է եղել, որ կարողանանք մթերման ամբողջականությունն ապահովել և չթողնել, որ գյուղատնտեսները լուրջ խնդիրների առջև կանգնեն»:
Արձագանքելով՝ փոխվարչապետ Տիգրան Ավինյանը նշել է, որ այդ կարևոր որոշումը կայացվել է ճգնաժամային տարում։ «Այս գործընթացում նաև շատ կարևոր է, որ խաղողի մթերումների և խաղողի այգիների իրական պատկերը սկսենք ստանալ Հայաստանում, որպեսզի նաև հստակ լինեն այն ծավալները, որոնք մթերվում են։ Այս գործիքով, որով խթանում ենք տնտեսվարողներին, նաև մեկ այլ բան ենք ասում տնտեսավարողներին, որ այնուամենայնիվ այս գործընթացը պետք է լինի մաքսիմալ թափանցիկ, և խաղողի իրական ծավալների հետ կապված մեր բոլոր մտահոգությունները պետք է փարատված լինեն»,- ասել է փոխվարչապետը։
Նշենք, որ 2020 թվականը Հայաստանի ալկոհոլային արդյունաբերության համար բարդ տարի էր. նվազել են Հայաստանում արտադրվող գրեթե բոլոր ալկոհոլային խմիչքների արտադրության ծավալները՝ բացառությամբ շամպայնի։ Այսպես, Վիճակագրական կոմիտեի տվյալների համաձայն, հաշվետու ժամանակահատվածում Հայաստանում արտադրվել է 39 191 հազար լիտր կոնյակ, ինչը տարեկան վաղեմության ցուցանիշից ցածր է 9,9% – ով (2019թ. - ի 41,5% աճի դիմաց), 5 105,5 հազար լիտր օղի ՝ 14,6% տարեկան անկումով (2019-ի 18,6% աճի փոխարեն), 23 483,3 հազար լիտր գարեջուր ՝ տարեկան 10,6% անկումով (նախորդ տարվա 11,4% աճի դիմաց): Ընդ որում, վիսկիի արտադրությունն արագացրել է տարեկան նվազման տեմպերը 2019 թվականի 11,6 տոկոսից մինչեւ 51,1 տոկոս 2020 թվականի արդյունքներով ՝ ապահովելով 348,6 հազար լիտր ծավալով: Բացասական թրենդի մեջ է հայտնվել նաև գինին, որի արտադրության ծավալները նախորդ տարվա ընթացքում նվազել են 13,1 տոկոսով (2019թ. - ի 31,1 տոկոս աճի փոխարեն)՝ կազմել են 11 013,8 հազար լիտր։ Ընդ որում, 2020 թվականին հաջողվել է ավելացնել շամպայնի արտադրության ծավալները, որոնք տարեկան հաշվարկով աճել են 11 տոկոսով (2019թ. 34,2 տոկոս աճի փոխարեն) ՝ ապահովելով 1 222,2 հազար լիտր ծավալ: Նման միտումը պայմանավորված էր կորոնավիրուսի պատճառով լոքդաունի և զբոսաշրջային կոլապսի հետ կապված սպառման էական նվազմամբ, ինչն ազդեց ոչ միայն ներքին սպառման ակնկալվող ծավալների, այլև ՝արտահանման մատակարարումների վրա։
