Արմինֆո. Հայաստանի խոշորագույն բազմապրոֆիլ ընկերություններից մեկը՝ <ՍԻԼ Կոնցեռնը> (SIL Concern) ձեռք է բերել Հայաստանում բենզալցակայանների լայն ցանց ունեցող RAN OIL ընկերությունը:Այս մասին հայտնել է ընկերության պաշտոնական ներկայացուցիչ Աննա Մկրտչյանը։ Նա նշել է, որ գործարքը փակման վերջին փուլում է, գործարքի պայմանները չեն հրապարակվում:
Նշենք, որ 2019 թվականից SIL Concern-ի բազմապրոֆիլ բիզնեսը համալրվել է եւս մեկ ուղղությամբ. ընկերությունը սկսել է ավիակերոսին ներկրել երկիր, կոնցեռնը սկսել է զբաղվել նաեւ ավտոմոբիլային վառելիքի փոքր մատակարարումներով, ստեղծել է իր սեփական վառելիքային բազաները:
Ինչպես կարծում են շուկայի անկախ փորձագետները, RAN OIL ընկերության ձեռքբերումը թույլ կտա կոնցեռնին էապես ընդլայնել այդ ուղղության հնարավորությունները, քանի որ RAN OIL-ը, որն աշխատում է վառելիքի շուկայում 1993 թվականից, կառուցել է Հայաստանի համար տպավորիչ ենթակառուցվածք՝ բաղկացած մեծածախ մատակարարումներից, տեխնոլոգիապես հագեցած վառելիքային բազայից, բենզալցակայանների տպավորիչ ցանցից, մեքենայի յուղերի եւ նույնիսկ պահեստամասերի ներմուծումից : Ըստ ընկերության կայքի ՝ 2012թ-ից Ran Oil ընկերությունը դարձել է ռուսական Գազպրոմնեֆտ և Ռուս-Իտալական G-Energy ընկերությունների պաշտոնական ներկայացուցիչը ՀՀ-ում՝ ընդլայնելով ռուսական և իտալական շարժիչային և ինդուստրիալ յուղերի, քսայուղերի և հակասառեցնող հեղուկների ապրանքատեսականին ՀՀ-ում: 2014-ից Ran Oil-ը դարձել է Denckermann ապրանքանիշի միակ պաշտոնական ներկայացուցիչը Հայաստանում:
Նշենք, որ SIL Concern բազմապրոֆիլ ընկերությանն են պատկանում ֆինանսական ոլորտի ակտիվներ. այն վերահսկում է <Հայէկոնոմբանկ> ԲԲԸ-ն, <Սիլ Ինշուրանս> ապահովագրական ընկերությունը, տուրիստական ոլորտում տնօրինում է inLOBBY GmbH հյուրանոցների ամրագրման առցանց հարթակին, հյուրանոցային բիզնեսի, հանքային և խմելու ջրի (SIL), ինչպես նաև Maaza հյութերի արտադրության ոլորտում: Ընկերության ակտիվների թվում են՝ TransService - ը և Poliplast-ը ։ Ընկերությունը զբաղվում է դևելոփերական բիզնեսով․ նրան է պատկանում Երեւանի <Ռոսիա Մոլ> առեւտրի խոշոր համալիրը։
SIL Concern-ի սեփականատերերն են՝ Սուքիասյան եղբայրները ։ Հատկապես հայտնի է ավագ եղբայր Խաչատուր Սուքիասյանը՝ որպես քաղաքական գործիչ և մի քանի գումարման խորհրդարանի պատգամավոր։ 2008-ին Խաչատուր Սուքիասյանը բացահայտ հանդես եկավ և առաջիկա նախագահական ընտրություններում պաշտպանեց ՀՀ առաջին նախագահ Լևոն Տեր-Պետրոսյանի թեկնածությունը։ Մարտի 1-ի դեպքերից հետո (զանգվածային անկարգություններ) Սուքիասյանը ստիպված էր հատուցել քաղաքական հայացքների համար ։ Նա զրկվեց պատգամավորական անձեռնմխելիությունից, նրա դեմ քրեական գործ հարուցվեց, որն այնուհետեւ փակվեց ։ Սակայն, նա ստիպված եղավ հրաժարվել մի քանի բիզնեսներից, որոնց թվում է <Բջնի> հանքային ջրերի գործարանը, եւ պետության այդ գործողությունների իրավազորությունը մինչ օրս վիճարկվում է իրավական ատյաններում:
Նշենք, որ որոշ ընդդիմադիր լրատվամիջոցներ գործարքի հետ կապված նոր <վառելիքային մենաշնորհի> ստեղծման կասկածներ են հայտնել։ Ինչպես Facebook-ի իր էջում նշել է ընկերության պաշտոնական ներկայացուցիչ Աննա Մկրտչյանը, շուկայում ոչ թե մենաշնորհ է ստեղծվում, այլ հակառակը՝ ստեղծվում է մրցակցություն, որից կարող են օգտվել ՀՀ քաղաքացիները՝ ստանալով ավելի լավ որակի վառելիք` ավելի մատչելի գնով: <Տնտեսության զարգացումը մրցակցության արդյունքում է լինում, այլ ոչ նախկին տարիների նման` ստեղծված և քարացած մենաշնորհների: Հասկանալի է, որ այս շուկայում ստեղծվող մրցակցությունից կարող են նեղսրտել տարիներ շարունակ գերշահույթներ ստացած մոնոպոլները: Քաղաքական մանիպուլյացիաներ պարունակող հերյուրանքներին անդրադառնալու կարիք չեմ տեսնում, որովհետև մեր հասարակությունը վաղուց արդեն գիտի որն է իրականությունը, որը` սուտը: Խիստ մտահոգներին խնդրում եմ դիմել «ՌԱՆ ՕԻԼ» ընկերության նախկին սեփականատերերին և տեղեկություններ ստանալ գործարքի մասին>,- նշել է Մկրտչյանը։
Ներկայումս Հայաստանում ավտոմոբիլային վառելիքի շուկայում (բացառությամբ գազի՝ մեթանի եւ պրոպանի) գերիշխող դիրք է զբաղեցնում 2 ընկերություն ՝ <Ռոսնեֆտ Արմենիա> - ն եւ <Ֆլեշ> - ը, որոնց բաժին է ընկնում բոլոր ծառայությունների գրեթե 80 տոկոսը: