Արմինֆո. Երկրորդ տարին անընդմեջ Հայաստանի ֆոնդային բորսան ճանաչվել է «Հարավային Կովկասի լավագույն ֆոնդային բորսա»` ըստ բրիտանական Global Banking and Finance Review հեղինակավոր ամսագրի։
Ինչպես ԱրմԻնֆո-ին հաղորդեցին AMX-ից, նորարության, զարգացման, որակավորման չափանիշներն հաշվի առնելով՝ Global Banking and Finance Review-ն առանձնացրել է տարվա լավագույն ֆինանսական կազմակերպությունների ցանկն ամբողջ աշխարհում։ «Նշենք, որ Հայաստանի ֆոնդային բորսան 2020 թվականի ընթացքում շարունակել է արդիականացման գործընթացը և հաջողությամբ ներդրել է պետական պարտատոմսերի աճուրդների նոր համակարգ։ Սրան հետևելու են արժեթղթերի երկրորդային շուկայի հետագա համալիր արդիականացումը, այդ թվում «DMA»` շուկայի ուղիղ հասանելիության առցանց հնարավորություն բորսայի մանրածախ ներդրողների համար։։
2020 թվականի ընթացքում Հայաստանի ֆոնդային բորսան արձանագրել է ընդհանուր շուկայական ծավալի (market value) աննախադեպ 47% աճ: Պարտատոմսերի շուկան 2020թ․-ին ավելի քան երբևէ եղել է ակտիվ թե՛ ցուցակված պարտատոմսերի քանակով, թե՛ իրականացված գործարքների ծավալով։ Բորսայական առևտուրը և մասնավորապես արտարժույթային կորպորատիվ պարտատոմսերով իրականացված առևտուրը ունեցել է վերջին տարիների ամենաբարձր ցուցանիշը», - ասվում է հաղորդագրությունում։
«Առավել քան երբևէ այս մրցանակը կարևոր է մեզ համար։ Նախորդ տարվա համավարակի ազդեցությունը և տնտեսական իրավիճակը ինչպես Հայաստանում, այնպես էլ ամբողջ աշխարհում թողեց իր հետևանքները, սակայն նպատակասլաց և նվիրված աշխատանքի շնորհիվ հնարավոր եղավ հաղթահարել մարտահրավերները։ Բորսայի զարգացումը լինելու է շարունակական` նպաստելով կապիտալի շուկայի զարգացմանը և տնտեսական աճին»,- նշել է Հայաստանի ֆոնդային բորսայի գլխավոր տնօրեն Հայկ Եգանյանը։
AMX-ը Հայաստանում գործող միակ ֆոնդային բորսան է, որը հանդիսանում է նաև Հայաստանի կենտրոնական դեպոզիտարիայի միակ բաժնետերը: AMX խմբի առաքելությունն է նպաստել Հայաստանում բարենպաստ ներդրումային միջավայրի ձևավորմանը՝ առաջարկելով արդյունավետ լուծումներ ու ծառայություններ, այդ թվում՝ արժեթղթերի առևտրի, քլիրինգի, վերջնահաշվարկի և կենսաթոշակային համակարգի կառավարման ոլորտում:
RUB | 4.22 | 0.00 |
USD | 388.08 | -0.52 |
EUR | 416.29 | -0.44 |
GBP | 485.57 | -0.41 |
CAD | 284.16 | 0.14 |
JPY | 24.75 | -0.24 |
CNY | 53.55 | -0.08 |
CHF | 425.34 | -0.20 |