Ի ուրախություն հայ հարկատուների՝ հարկայինն ավելին է ակնկալում  

Արմինֆո.Հարկայինները նախատեսում են 2021 թվականի առաջին կիսամյակի արդյունքներով հարկատուներից հավաքագրել 2.7 մլրդ դրամով ավելի հարկեր, քան նախորդ տարվա նույն ժամանակահատվածում:

Այդ մասին ապրիլի 27-ին լրագրողներին ասել է ՊԵԿ նախագահ Էդվարդ Հովհաննիսյանը։ Նրա հավաստմամբ, Հայաստանի պետական գանձարանի փաստացի հարկային հավաքագրումները 2020 թվականի առաջին կիսամյակում կազմել են 680,3 մլրդ դրամ։ Ընթացիկ տարվա նույն ժամանակահատվածում հարկային-մաքսային կոմիտեն նախատեսում է պետական գանձարան ուղղորդել 683 մլրդ դրամ: Դա, ինչպես նշել է Հովհաննիսյանը, կարվի, գլխավորապես, հարկային վարչարարության բարելավման հաշվին։

ՊԵԿ նախագահը հիշեցրել է, որ պետական գանձարանի փաստացի հավաքագրումները առաջին եռամսյակում հասել են 332,9 մլրդ դրամի՝ նախատեսված 305 մլրդ դրամի փոխարեն: Ինչպես պարզաբանել է գլխավոր հարկայինը, հաշվի առնելով, որ նշված գումարից 5,6 մլրդ դրամը կազմում է ակցիզային վճարումների գծով մուտքերը, ապա փաստացի գերակատարումը կազմել է 22,3 մլրդ դրամ: Հաշվի առնելով այս հանգամանքը՝ ֆինանսական իշխանությունները հարկային սպասումների նշաձողը բարձրացրել են մինչև 40 մլրդ դրամ տարվա արդյունքներով՝ 1 տրլն 440 մլրդ դրամից հասցնելով 1 տրլն 480 մլրդ դրամի։ Այդպիսով, ինչպես պարզաբանել է գլխավոր հարկայինը, այս տարվա հունվար-հունիս ամիսներին հարկայիններն ստիպված կլինեն հավաքել ավելին, քան ի սկզբանե ամրագրվել է պետբյուջեում։

Նշենք, որ չնայած այն հանգամանքին, որ ավելի վաղ կառավարության նիստի ընթացքում ՀՀ կառավարության եւ ՊԵԿ ղեկավարները հայտարարել են հարկային հավաքագրումների նախատեսված ցուցանիշը 22 մլրդ դրամով գերազանցելու մասին, գործնականում, ինչպես պարզվել է, այս տարվա առաջին եռամսյակում Հայաստանը "հավաքել է" 16,1 մլրդ դրամով կամ 4,6 տոկոսով պակաս, քան 2020 թվականի նույն ժամանակահատվածում: Այսպես, 2021 թվականի հունվար-մարտ ամիսներին պետական բյուջեի հարկային եկամուտները կազմել են 332,9 մլրդ դրամ ' նախատեսված 305 մլրդ դրամի դիմաց, հաշվի առնելով 5,6 մլրդ դրամի ակցիզային վճարումները, հարկային պլանը գերազանցվել է 22,3 մլրդ դրամով: Մինչդեռ նախորդ տարվա նույն ժամանակահատվածում պետբյուջեի հարկային դրամապանակը կազմել է 349 մլրդ դրամ։