Հայաստանում մեկնարկում է HSBC-ի և Ashoka-ի «Կանաչ հմտություններ և նորարարություն» մրցույթը

Արմինֆո.HSBC-ն սոցիալական ձեռներեցությունը խթանող Ashoka միջազգային կազմակերպության հետ համատեղ մեկնարկել է իր տեսակի մեջ առաջին «Կանաչ հմտություններ և նորարարություն» մրցույթը (չելենջը)։ Նորարարության զարգացմանն ուղղված միջազգային այս մրցույթին կարող են մասնակցել սոցիալական ձեռներեցներ 51 երկրներից՝ այդ թվում Հայաստանից։

Մրցույթի արդյունքում հաղթող կճանաչվեն 15 սոցիալական ձեռներեցներ՝ արժանանալով մինչև 20 000 ԱՄՆ դոլարի դրամական պարգևի։ Հաղթողները հնարավորություն կունենան նաև օգտվելու HSBC-ի և Ashoka-ի փորձառու մասնագետների խորհրդատվությունից իրենց նորարարական լուծումները զարգացնելու համար։

Մրցույթի մասին․ HSBC-ն և Ashoka-ն փնտրում են սոցիալական ձեռներեցների, ովքեր օգնում են տնտեսական հնարավորություններ չունեցող անձանց ձեռք բերել կանաչ տնտեսություն վարելու հմտություններ և  զարգանալ՝ միաժամանակ ապահովելով, որ անցումը դեպի կանաչ տնտեսություն օգտակար լինի բոլորի համար: Մրցույթին կարող են մասնակցել նորարարական առաջարկներ ունեցող բոլոր անձինք՝ այդ թվում և դիմորդներ երիտասարդական նախաձեռնություններից։

HSBC-ն և Ashoka-ն փնտրում են այն սոցիալական ձեռներեցներին, ովքեր

• օգնում են նախկինում տնտեսական հնարավորություններ չունեցող անձանց ձեռք բերել անհրաժեշտ հմտություններ կանաչ տնտեսության զարգացող ոլորտներում աշխատանք գտնելու համար,
• օգնում են էկոլոգիապես վնասակար աշխատանքներում ներգրավված համայնքներին անցնել աշխատանքի կանաչ տնտեսության ոլորտներում,
• գտնում են նորարարական մոտեցումներ, որոնք օգնում են երիտասարդներին կայանալ և ի վերջո դառնալ առաջնորդներ կանաչ տնտեսության ոլորտներում։

Հաղթող կճանաչվեն 15 սոցիալական ձեռներեցներ։ Մրցանակներից առնվազն 3-ը կտրամադրվեն երիտասարդական կազմակերպությունների։

Մրցանակներ և առավելություններ․ Նախաձեռնությունն իրականացնող թիմը կորոշի յուրաքանչյուր հաղթողին տրամադրվելիք մրցանակի չափը։ Ընդհանուր առմամբ, մրցանակները կշնորհվեն հետևյալ երկու թեմաներով՝  «Ամենանորարարական լուծումներ» և «Լավագույն լուծումներ սկզբնական փուլի համար»։ Առաջին թեմայի մրցանակների կարժանանան այն լուծումները, որոնք հստակ մոդելներ են առաջարկում դրանց  ազդեցությունը բարելավելու համար։ Հաղթողները կարժանանան մինչև 20 000 ԱՄՆ դոլարի դրամական մրցանակի, ինչպես նաև կստանան HSBC-ի և Ashoka-ի մասնագետների խորհրդատվությունից օգտվելու հնարավորություն՝ առաջարկվող լուծումները զարգացնելու համար։ Երկրորդ թեմայի մրցանակների կարժանանան առանձնահատուկ նորարարական գաղափարներով լուծումները, որոնք դեռ զարգացման վաղ փուլում են։ Հաղթողները կարժանանան մինչև 15 000 ԱՄՆ դոլարի դրամական մրցանակի, ինչպես նաև կստանան աջակցություն և խորհրդատվության հնարավորություն իրենց նորարարական լուծումները զարգացնելու համար։

Մրցույթին կարող են մասնակցել մինչև ս․թ․ հունիսի 5-ը՝ Հայաստանի Հանրապետության ժամանակով ժամը 03։00-ն։ 

Լրացուցիչ տեղեկատվության և մրցույթին մասնակցելու համար այցելել https://challenges.changemakers.com/challenge/greenskills։ Լրացուցիչ հարցեր ունենալու դեպքում դիմել «Էյչ-Էս-Բի-Սի Բանկ Հայաստան» ՓԲԸ-ին՝ 060 655000։