Ամերիաբանկն արդեն 8-րդ անգամ արժանացել է Euromoney ամսագրի գերազանցության մրցանակին՝ որպես տարվա լավագույն բանկը Հայաստանում

Արմինֆո. Ամերիաբանկը Euromoney  հեղինակավոր ամսագրի կողմից արժանացել է Հայաստանի 2021 թ. Տարվա լավագույն բանկ մրցանակին:

Ինչպես ԱրմԻնֆո-ին հաղորդել են բանկի մամուլի ծառայությւոնից, Ամերիաբանկը հաղթող է ճանաչվել մի շարք ուղղություններով գրանցած տպավորիչ առաջընթացի համար: Կազմակերպիչների խոսքով, հաշվի է առնվել Բանկի  շահութաբերության զգալի բարելավումը, կայուն աճը, նորարարական բանկային ծառայությունների շարունակական ներդրումը, ռազմավարական փոխհարաբերությունները և թվայնացմանն ուղղված ակտիվ գործունեությունը: Նշենք, որ Euromoney ամսագրի այս անվանակարգում Ամերիաբանկը հաղթող է ճանաչվում արդեն 8-րդ անգամ:

«Մենք շատ հպարտ ենք, որ այսպիսի դժվար ժամանակներում արժանացել ենք այս հեղինակավոր մրցանակին: Չնայած նախորդ տարվա մարտահրավերներին, մեզ հաջողվեց վերահաստատել մեր  դիմացկունությունն ու կայունությունը և պահպանել մեր բարձր ցուցանիշները: Մենք  մշտապես հավատարիմ ենք մեր ռազմավարական նպատակներին ու շարունակելու ենք անել առավելագույնը` մեր միասնական նպատակների իրագործման համար», - հայտարարել է  Ամերիաբանկի Տնօրինության նախագահ-գլխավոր տնօրեն Արտակ Հանեսյանը:

Հաղորդագրության մեջ նշվում է, որ այս տարին առանձնահատուկ էր այն առումով, որ մրցույթի մասնակցության համար ստացվել են ռեկորդային թվով դիմումներ (ավելի քան 1000): Euromoney-ի տարածաշրջանային և երկրի մրցանակները 2021 թվականի ակնառու նվաճումների համար հայտարարվել են հուլիսի 14-ին և հրապարակվել Euromoney ամսագրի հուլիսյան/օգոստոսյան համարում: Գլոբալ պարգեւները կհայտարարվեն սեպտեմբերի 10-ին եւ կհայտնվեն սեպտեմբերյան թողարկման մեջ:

Նշենք, որ մինչ այդ որպես Հայաստանում տարվա լավագույն բանկ Ամերիաբանկին Euromoney-ի կողմից  "Գերազանցության" մրցանակ է  շնորհվել  2011թ., 2012թ. և ամեն տարի 2014-2019 թվականներին: "Ամերիաբանկ" ՓԲԸ-ն ունիվերսալ բանկ է, որը ներդրումային, կորպորատիվ և մանրածախ բանկային ծառայություններ է մատուցում բանկային լուծումների համալիր փաթեթի տեսքով: Ամերիաբանկը պահպանում է առաջատարի դիրքը Հայաստանի բանկային շուկայում հիմնական ցուցանիշներով: 2021թ. ապրիլի 1-ի դրությամբ Բանկի բաժնետերերն են Իմաստ Գրուպը (Սի-Ուայ) Լիմիթեդը (նախորդ անվանումը 'Ամերիա Գրուպ (Սի-Ուայ) Լիմիթեդը)' 48,90%, ՎԶԵԲ-ը ' 17,74%, Ասիական զարգացման բանկը (ԱԶԲ)' 13,93%, ESPS Holding Limited - ը ' 11,92%, Afeyan Foundation For Armenia Inc.՝ 7,51%:

Հիշեցնենք, որ Euromoney ամսագիրը Լոնդոնում հրատարակվում է 1969 թվականից եւ համարվում է բանկային գործի, ֆինանսների եւ ներդրումների մասին ամենանշանակալի եւ հեղինակավոր պարբերականներից մեկը: Ամեն տարի նա ընտրում է լավագույն կազմակերպություններին ֆինանսների եւ ներդրումների ոլորտում: Հաղթողներին որոշում են երեք փուլով. սկզբում ուսումնասիրում են տարեկան հաշվետվությունները, հետո հարցում են անցկացնում բանկի գործընկերների շրջանում՝ երկրի ներսում եւ արտերկրում, ինչից հետո ամսագրի փորձագետները վերլուծում են ֆինանսական ցուցանիշները եւ գնահատում մասնակից բանկերի առանցքային ռազմավարական նախաձեռնությունները: Euromoney Awards for Excellence ամենամյա մրցանակը շնորհվում է աշխարհի լավագույն բանկերին: Կարեւոր են ոչ միայն ֆինանսական ցուցանիշները, այլեւ ղեկավարության եւ անձնակազմի պրոֆեսիոնալիզմը, գործարքների թափանցիկությունը եւ այլն: Աշխարհի լավագույն բանկերը Euromoney բրիտանական ամսագիրը ամեն տարի գտնում է 100 երկրներում ' Արգենտինայից մինչեւ Նորվեգիա: Euromoney Award for Excellence մրցանակը, որը հիմնվել է 1992 թվականին, դարձել է առաջին նման պարգեւը համաշխարհային բանկային ոլորտում, եւ մեծ հեղինակություն է վայելում ՝ յուրօրինակ ֆինանսական "Օսկար": Հեղինակավոր ամենամյա մրցանակը շնորհվում է թեկնածուների (բանկերի, բրոքերային եւ դիլերային ընկերությունների) գործունեության վերլուծության արդյունքներով, որոնք Euromoney-ի ֆինանսական վերլուծաբանների կողմից անցկացվում են ավելի քան 100 երկրներում՝ արդեն 29 տարի անընդմեջ: "Գերազանցության" մրցանակը ներառում է 20 անվանակարգ ըստ բանկային հատվածի և կապիտալի շուկայի: