ԵՆԲ-ը պատրաստ է աջակցել գործարար միջավայրի բարելավմանն ուղղված Հայաստանի կառավարության ջանքերին

Արմինֆո. ՀՀ ֆինանսների նախարար Տիգրան Խաչատրյանը նախօրեին ընդունել է Եվրոպական ներդրումային բանկի (ԵՆԲ) տարածաշրջանային գրասենյակի ղեկավար Մացիեյ Ցզուրային:

Նախարարության մամուլի ծառայության հաղորդման համաձայն, Տիգրան Խաչատրյանը բարձր է գնահատել Եվրոպական ներդրումային  բանկի հետ համագործակցությունը եւ կարեւորել տարբեր ոլորտներում ԵՆԲ համաֆինանսավորմամբ իրականացվող Հյուսիս-հարավ ավտոմայրուղու եւ Սիսիան-Ագարակ ճանապարհահատվածի, Երեւանի մետրոպոլիտենի եւ տրանսպորտային համակարգի, ջրային ռեսուրսների եւ ոռոգման ենթակառուցվածքների կառավարման ծրագրերը:

Մացիեյ Ցզուրան շնորհակալություն է հայտնել ջերմ ընդունելության համար եւ ՀՀ նոր կառավարությանը մաղթել հաջողություն հավակնոտ բարեփոխումների օրակարգը կյանքի կոչելու գործում: ԵՆԲ ներկայացուցիչը նշել է, որ տեղյակ է բիզնես միջավայրի բարելավմանը միտված ՀՀ կառավարության քայլերի մասին եւ ընդգծել, որ բանկը պատրաստ է այդ ուղղությամբ եւս օժանդակություն ցուցաբերել հայաստանյան գործընկերներին: Միաժամանակ պարոն Ցզուրան գոհունակություն է հայտնել ՀՀ կառավարության հետ համագործակցության մակարդակի առնչությամբ եւ վստահություն հայտնել, որ համատեղ բոլոր ծրագրերը կշարունակեն նպաստել ՀՀ տնտեսության զարգացմանն ու դիվերսիֆիկացմանը:

Հանդիպման ընթացքում կողմերը քննարկել են երկուստեք հետաքրքրություն ներկայացնող հարցերի լայն շրջանակ:

Եվրոպական ներդրումային բանկը (ԵՆԲ) Եվրոպական միության (ԵՄ) ֆինանսական հաստատությունն է, որի գործառույթն է երկարաժամկետ ֆինանսական աջակցության տրամադրումը ներդրումային ծրագրերին: Այն հիմնադրվել է 1958թ. և ներկայումս գործում է ոչ միայն ԵՄ անդամ պետություններում, այլև՝ ավելի քան 150 երկրներում, որտեղ ԵՆԲ-ը հիմնվում է ԵՄ արտաքին համագործակցության և քաղաքական զարգացման ոլորտների վրա (մասնավոր հատված, ենթակառուցվածքների զարգացում, էներգետիկ անվտանգություն և էկոլոգիական կայունություն)։

2008թ. փետրվարի 12-ին Լյուքսեմբուրգում և փետրվարի 29-ին Երևանում Հայաստանի Հանրապետության և ԵՆԲ-ի միջև ստորագրվել է շրջանակային համաձայնագիր, որով կարգավորվում է ԵՆԲ-ի գործունեությունը Հայաստանի Հանրապետությունում: Համաձայնագրի նպատակն է հեշտացնել Հայաստանին հետաքրքրող ներդրումային ծրագրերի ֆինանսավորումը ՝ վարկերի, երաշխիքների կամ այլ մեխանիզմների միջոցով:

ԵՆԲ-ն իր գործունեությունը Հայաստանում իրականացնում է, հիմնականում, էներգետիկայի, տրանսպորտի, ջրամատակարարման, կոշտ թափոնների կառավարման և շրջակա միջավայրի ոլորտներում: Հայաստանում ԵՆԲ-ի պորտֆելը կազմում է 327 542 044,82 եվրո: ԵՆԲ-ը մասնակցում է 16 ծրագրերի ֆինանսավորմանը Հայաստանում: