Հինգշաբթի, 21 Հոկտեմբերի 2021 19:06

Արմինֆո.Հայաստանի էկոնոմիկայի նախարարությունում մտահոգված են աճող գնաճով։ "Գնաճը կլանում է մեր ջանքերի մեծ մասը։ Մենք պետք է զսպենք գնաճը մեր զինանոցում առկա գործիքակազմով", - հոկտեմբերի 21-ին լրագրողների հետ զրույցում հայտարարել է էկոնոմիկայի նախարար Վահան Քերոբյանը։

 

Հիշեցնենք, որ 2021թ. սեպտեմբերին սպառողական գները 2020թ. սեպտեմբերի համեմատ  բարձրացել են 8,9%-ով (նախորդ տարվա 1.4% գնաճի եւ նախաքովիդյան 0,5%  գնաճի դիմաց): 2021թ. սեպտեմբերին սպառողական գնորի 0,1%-ով նվազումն ուղեկցվում էր դոլարի նկատմամբ դրամի 0,7% արժեվորմամբ, իսկ հունվար-սեպտեմբերին 3,6% գնաճի ֆոնին դիտվել է դոլարի նկատմամբ դրամի 5,9% արժեվորում (մեկ տարի առաջ 1.4% գնանկման և դրամի 1,8% արժեզրկման դիմաց): Դոլարի նկատմամբ դրամի հաշվարկային փոխարժեքը 2021թ. սեպտեմբերին կազմել է միջինը 488,1 դրամ/1դոլար՝ 0,3%-ով գերազանցելով մեկ տարվա վաղեմության մակարդակը (486,7 դրամ/1դոլար): Ինչպես ավելի վաղ հայտարարել էր ՊԵԿ նախագահը, օգոստոսի դրությամբ գրանցված աշխատատեղերի թիվը կազմել է 642 292, հարկային բազան' 139,1 մլրդ դրամ, իսկ միջին աշխատավարձը հասել է 216 655 դրամի: "Թվերը մեծապես գերազանցում են 2019-2020թթ. ցուցանիշները", - նշել էր նա:

 

Քերոբյանի խոսքով՝ իրավիճակի կարգավորման համար Հայաստանի Կենտրոնական բանկը նույնպես կիրառում է իր զինանոցում առկա գործիքակազմը: "Սակայն երբեմն դա սպառնալիքի տակ է դնում մեզ համար շատ կարեւոր տնտեսության ճյուղերը, մասնավորապես, արտահանումը, դոլարի փոխարժեքի ցածր արժեքի պատճառով, ինչը շատ է անհանգստացնում մեզ եւ մեր արտահանողներին",- ասել է էկոնոմիկայի նախարարը:

 

Այս փուլում, ինչպես նշել է նախարարը, ԿԲ-ի հետ համատեղ աշխատանք է տարվում գնաճը զսպելու նպատակով՝ չվնասելով տնտեսությանը։ Բացի այդ, Էկոնոմիկայի նախարարությունն աշխատում է հիմնական առևտրային գործընկերների հետ՝ հայրենական տնտեսվարող սուբյեկտներին իրենց համար քիչ թե շատ շահավետ գնով արտադրանքի մատակարարումներով ապահովելու համար։

 

Անդրադառնալով սպառման շուկայում, մասնավորապես, կարտոֆիլի գների բարձրացմանը, Քերոբյանը հաղորդել է, որ այն պայմանավորված է արտահանման ռեկորդային աճով. 2021 թվականի սկզբից երկրից արտահանվել է շուրջ 30 հազար տոննա կարտոֆիլ։ Սպառման հիմնական շուկան մնում է Եվրասիական տնտեսական միությունը։ Ինչպես նշել է էկոնոմիկայի նախարարը, գերատեսչությունն իրավունք չունի տեղի ֆերմերներին զրկել եկամուտներն ավելի բարձր գնով արտահանելու հնարավորությունից: Նախարարը նշել է, որ այսօրվա դրությամբ Հայաստանը մրգերի եւ բանջարեղենի արտահանման գծով արդեն 25-30 տոկոսով գերազանցել է նախորդ տարվա ցուցանիշը. արտահանումը կազմել է 180 հազար տոննա: Մինչդեռ, ամբողջ 2020թ. կամ 2019թ. ընթացքում ցուցանիշը կազմել է մոտավորապես 145 հազար տոննա: Մինչեւ տարեվերջ գերատեսչությունը հույս ունի ապահովել 200 հազար տոննա եւ ավելի մակարդակի ցուցանիշ: