Արմինֆո.Շրջակա միջավայրի նախարարության բյուջեն 2022 թվականին 26,5 տոկոսով կկրճատվի: Նոյեմբերի 5-ին այդ մասին հաղորդել է գերատեսչության ղեկավար Ռոմանոս Պետրոսյանը՝ 2022 թվականի պետական բյուջեի նախագծի քննարկմանը նվիրված խորհրդարանական մշտական հանձնաժողովների համատեղ նիստում:
Նախարարությանը 22 միջոցառումների եւ 6 ծրագրերի իրականացման համար, ընդհանուր առմամբ, նախատեսվում է հատկացնել 6 մլրդ 771.7 մլն դրամ (այդ թվում' կառավարման ապարատի ծախսերը)' 2021 թվականի 9 մլրդ 214.7 մլն դրամի դիմաց: Հատկացումների կրճատումը, նախարարի խոսքով, պայմանավորված է Սյունիքի մարզի բնության հատուկ պահպանվող տարածքների աջակցության ծրագրերի պայմանագրային պայմանների ավարտով, որոնք իրականացվում են KFW բանկի դրամաշնորհային ծրագրի շրջանակներում. պայմանագրի գործողության ժամկետը լրանում է այս տարվա վերջին: 5,8 տոկոսով կրճատվել են նաեւ նախարարության պահման բյուջետային դոտացիաները, ինչը պայմանավորված է գերատեսչության հաստիքային միավորների կրճատմամբ։
Մասնավորապես, շրջակա միջավայրի վրա ազդեցության դիտարկման և գնահատման ծրագրի գծով նախատեսված է 1 մլրդ 687.0 մլն դրամ։ Ծրագրի նպատակն է աջակցել շրջակա միջավայրի եւ բնական ռեսուրսների (բացառությամբ օգտակար հանածոների) պաշտպանությանը ' վերջիններիս մասին տեղեկություններ հրապարակելու ճանապարհով:
Համայնքներում բնապահպանական ծրագրերի իրականացման գծով 2022 թվականին նախատեսվում է հատկացնել 108,2 մլն դրամ: Նախագծի նպատակը հանքարդյունաբերության ոլորտում տնտեսական գործունեության արդյունքում շրջակա միջավայրին և բնակչության առողջությանը հասցված վնասի նվազեցումն է: "Ընկերությունների կողմից վճարվող բնապահպանական հարկի նպատակային օգտագործման մասին" ՀՀ օրենքի համաձայն, նախատեսվում է Հայաստանի 7 համայնքներին տրամադրել սուբսիդիաներ՝ բնապահպանական ծրագրերի իրականացման համար:
Բնական ռեսուրսների կառավարման (բնության հատուկ պահպանվող տարածքների կառավարում) ծրագրի համար 2022 թվականին նախատեսված է 1 մլրդ 292,2 մլն դրամ ։ Ծրագրի նպատակն է ապահովել բնական ռեսուրսների և կենսաբազմազանության արդյունավետ կառավարում և պահպանում ՝ ակնկալելով բնական ռեսուրսների աճ և կենսաբազմազանության վերարտադրություն: Նախագծի շրջանակներում նախատեսվում է մաքրել Սևանա լճի շրջանում ջրածածկ անտառային լանդշաֆտների 244 հա, Սևանա լճի ջրհավաք ավազանում իրականացնել կենդանական աշխարհի պաշարների (ձկան և խեցգետնի) գույքագրում, 328,1 հազար քմ մակերեսով ազգային պարկերի և պետական արգելոցների, ինչպես նաև բնության հատուկ պահպանվող տարածքների և Սեւանա լճի շրջանում 3 հանրային լողափերի սպասարկում և պահպանում: Անտառկառավարման ծրագրի համար 2022 թվականին նախատեսված է 1 980,7 մլն դրամ: