Իսպանական «Ակցիոնա» ընկերությունը մտադիր է ավելի քան 250 մլն եվրո ներդնել Հայաստանում հողմային էլեկտրակայանների կառուցման գործում

Արմինֆո.Գեղարքունիքի մարզպետ Կարեն Սարգսյանը նախօրեին ընդունել է իսպանական «Ակցիոնա» ընկերության՝ բիզնեսի զարգացման հարցերով տնօրեն Միգել Առարասին, նույն ընկերության՝ Եվրոպայում բիզնեսի զարգացման մենեջեր Սառա Լառռազին և Հայաստանում «Ակցիոնա»-ի պաշտոնական ներկայացուցիչ Աշոտ Առաքելյան Ստեփանյանին:
 

Մարզպետարանի հաղորդագրության համաձայն, հանդիպմանը ներկա էին Գեղարքունիքի մարզպետի տեղակալ Ռուբիկ Նավոյանը, մարզպետի օգնական Մանանա Գալստյանը, Գեղարքունիքի մարզպետարանի շահագրգիռ ստորաբաժանումների ղեկավարներ: Հանդիպման նպատակն էր մարզպետի հետ քննարկել պետություն-մասնավոր գործընկերության շրջանակներում մարզում կառուցվող հողմային կայանների աշխատանքային ընթացքին վերաբերող խնդիրներ, այդ ուղղությամբ մարզպետից ստանալ անհրաժեշտ խորհրդատվություն:

«Այս ծրագիրը ընդգրկում է Գեղարքունիքի և Կոտայքի մարզերի 12 համայնքներ, որից 7 -ը ելնելով իրենց աշխարհագրական դիրքից, ընտրվել են Գեղարքունիքի մարզից: Հողմակայանի կառուցման նախագծային և նախապատրաստական բնույթի մի շարք աշխատանքներ իրականացվել են վերջին 4-5 տարիների ընթացքում: Ծրագրի շրջանակներում նախատեսվում է 37 տուրբինների տեղադրում 202 մեգավատ հզորությամբ և 276 միլիոն դոլար արժողությամբ: Ծրագրի իրականացման իդեալական տարբերակը կլինի այն, որ մենք 2022 թվականին ստանանք շինարարական թույլտվություն, 2023-2024 թվականների ընթացքում իրականացնենք տուրբինների տեղադրման աշխատանքներ, իսկ 2025 թվականից արդեն գործարկենք դրանք: Այս պահին ծրագիրը գտնվում է մշակման վերջնական փուլում և վերը նշվածին հասնելու համար մենք արդեն անհրաժեշտություն ունենք հողային իրավունքների ժամանակավոր և մշտական ձեռքբերման, որի կանոնակարգման հարցում ակնկալում ենք ՀՀ կառավարության, մարզպետարանի և ազդակիր համայնքների աջակցությունը»,- նշել է ընկերության բիզնեսի զարգացման հարցերով տնօրեն Միգել Առարասը: Ծավալված երկկողմ ակտիվ քննարկումներից հետո Գեղարքունիքի մարզպետ Կարեն Սարգսյանը նշել է, որ ծրագիրը մարզի համար շատ գրավիչ է, որը սակայն լի է նաև զգալի բարդություններով: Մարզպետը պատրաստակամություն է հայտնել ՀՀ կառավարության կողմից ծրագրի անհրաժեշտ բաղադրիչներին համարժեք լուծումներ տալուց հետո մարզպետարանի լիազորությունների շրջանակներում ցուցաբերել աջակցություն խնդիրների կարգավորման հարցում՝ աշխատանքներում ընդգրկելով նաև մարզի ազդակիր համայնքների ներուժը:
 

Ավելի վաղ ընկերության ներկայացուցիչ Միգել Առարասն Արմինֆո գործակալությանը հաղորդել էր, որ ընկերությունը մտադիր է Հայաստանում կառուցել 150 մեգավատ ֆոտովոլտային արտադրության օբյեկտներ: Սակայն դրա համար, շարունակել էր Միգել Առարասը, անհրաժեշտ են պետության երաշխիքներ ներդրված միջոցների վերադարձելիության համար։ "Մենք ցանկանում ենք Հայաստան գալ երկար, առնվազն 25 տարով, եւ պետք է վստահ լինենք, որ մեր ներդրումները կպաշտպանվեն", - ասել էր ընկերության ներկայացուցիչը, հավելելով, որ արեւային արտադրությունից բացի, ընկերությունը Սեւանա լճի շրջանում հողմակայան կառուցելու նախագիծ է մշակում: "Տեղը դեռ վերջնականապես որոշված չէ, բայց միանշանակ է, որ կառուցելու ենք հողմակայան տվյալ տարածաշրջանում", - ընդգծել էր Միգել Առարասը, հավելելով, որ Հայաստանում էներգիայի այլընտրանքային աղբյուրների ստեղծման համար ներդրումների ընդհանուր ծավալը կարող է կազմել առնվազն 200 մլն եվրո:

Նշենք, որ իսպանական «Ակցիոնա» ընկերությունը, որը վերականգնվող աղբյուրների միջոցով էլեկտրաէներգիայի արտադրության ոլորտի ձեռնարկությունների շարքում համաշխարհային առաջատար է, ընթացիկ տարում 600-ից մինչեւ 700 մլն եվրո ներդրումներ է կատարում "էներգետիկ պարկերի" կառուցման համար: Ընկերության ղեկավարությունը հույս ունի նույն ծավալներով ամեն տարի ներդնել "այլընտրանքային էլեկտրականության" նախագծերում մինչեւ 2022 թվականը: Այս ժամանակահատվածում ենթադրյալ ներդրումների ընդհանուր ծավալը 3,5 մլրդ եվրո է, որից 2 մլրդ-ը կներդրվի Իսպանիայի սահմաններից դուրս կառուցվող ընկերության օբյեկտներում: "Մենք ուսումնասիրել ենք աշխարհի գրեթե 100 երկրների պայմաններն ու առաջարկությունները, որոնցում հետաքրքրություն է ցուցաբերվել արևային ճառագայթներից և քամուց էներգիա արդյունահանող էլեկտրակայանների կառուցման նկատմամբ: Այժմ մենք պետք է ընտրենք այն նախագծերը, որոնք առաջնահերթ կլինեն մեզ համար", - ասել  ընկերության նախագահը՝ ելույթ ունենալով «Ակցիոնա»-ի բաժնետերերի ժողովում: