Արմինֆո. 2022 թվականի բյուջեի նախագիծն ուղղված է երկրի տնտեսական ներուժի էական աճի ապահովմանը և միանգամայն իրատեսական է։ Նման կարծիք է հայտնել ՀՀ ԿԲ նախագահ Մարտին Գալստյանը՝ ելույթ ունենալով խորհրդարանում հաջորդ տարվա բյուջեի նախագծի վերաբերյալ։
Նրա խոսքով ՝ 2022 թվականին տնտեսական ներուժի աճի գլխավոր նախապայմանը (ՀՆԱ 7 տոկոս աճ) հանդիսանում է պետության կապիտալ ծախսերի եւ մարդկային կապիտալի էական որակական զարգացման ծախսերի զգալի ավելացումը: Արդյունքում՝ զգալիորեն կաճի արտադրողականության մակարդակը տնտեսության բոլոր ճյուղերում։ Որպես արդյունք՝ Կենտրոնական բանկն ակնկալում է ինչպես ներքին, այնպես էլ արտաքին աղբյուրներից եկող համախառն պահանջարկի հետագա վերականգնում ՝ կապված համաշխարհային տնտեսության հետքովիդյան միտումների հետ, ինչն, իր հերթին, կհանգեցնի ներդրումային ակտիվության վերականգնման:
Այս միտումներն, անշուշտ, կհանգեցնեն հարկաբյուջետային քաղաքականության բարելավման, հետագա բյուջետային կոնսոլիդացման (բյուջետային դեֆիցիտի կրճատման ռազմավարություն - խմբ.) ՝ կապված հարկերի հավաքագրման աճի և հարկային վարչարարության հետագա կատարելագործման հետ։
ՀՆԱ-ի նկատմամբ հարկային եկամուտների հարաբերակցության 0.9% աճն էլ, Գալստյանի կարծիքով, որոշակի մակրոտնտեսական նպատակներ է հետապնդում և, առաջին հերթին, կազդի բյուջետային դեֆիցիտի կրճատման վրա։ Իսկ բյուջետային ճեղքվածքի կրճատումը բարենպաստ ազդեցություն կունենա պետության պարտքային բեռի վրա եւ կհանգեցնի այդ ցուցանիշի վերադարձին ՀՆԱ-ի 60 տոկոս օպտիմալ նշագծին, ինչը շատ կարեւոր է օտարերկրյա ներդրողների կողմից Հայաստանի երկրի ռիսկի գնահատման տեսանկյունից:
Գալստյանն ընդգծել է, որ պետության կողմից լայնածավալ ծախսային ծրագրերի արդյունավետ, որակական եւ ժամանակին իրականացումը կկարողանա որոշակի չափով չեզոքացնել գների մակարդակի վրա վերականգնվող համախառն պահանջարկի ազդեցությունը, որոնց աճն այսօր, հիմնականում, պայմանավորված է արտաքին գործոններով եւ կորոնաճգնաժամի պատճառով հետաձգված ներքին պահանջարկով, եւ հաջորդ տարի կապահովի գնաճի տարեկան միջին մակարդակի վերադարձը նպատակային նշագծին՝ ընթացիկ տարվա 9 տոկոսից մինչեւ 4 տոկոս 2022 թվականին: