ՀՀ կենտրոնական բանկը դարձել է SBFN միջազգային հեղինակավոր հարթակի անդամ

Արմինֆո.ՀՀ կենտրոնական բանկը 2021 թ-ի նոյեմբերի 24-ից Կայուն բանկային և ֆինանսական հարթակի (SBFN) միջազգային հեղինակավոր հարթակի անդամ է։ Այդ մասին հաղորդել է ԿԲ հասարակայնության հետ կապերի ծառայությունը:

Հարթակը ստեղծվել է Միջազգային ֆինանսական կորպորացիայի կողմից և օգնում է անդամներին մոբիլիզացնել տեղեկատվություն, ռեսուրսներ և գործնական աջակցություն՝ ազգային նախաձեռնությունների մշակման և իրականացման նպատակով, որոնք նպաստում են ազգային, տարածաշրջանային և գլոբալ մակարդակներում կայուն ֆինանսավորման զարգացմանը: SBFN-ը զարգացող շուկաների ֆինանսական հատվածի կարգավորողների համար ստեղծված կամավոր հարթակ է՝ գիտելիքի փոխանակման և կայուն ֆինանսավորման կարողությունների զարգացման նպատակով: Հարթակին ներկայումս անդամակցում է 66 հաստատություն` թվով 44 զարգացող երկրներից:

Հարթակի անդամները պարտավորվում են զարգացնել կայուն ֆինանսները՝ միջազգային լավագույն փորձին համապատասխան՝ նպատակ ունենալով բարելավել բնապահպանական, սոցիալական և կառավարչական (ESG) ռիսկերի կառավարումը, և ուղղել կապիտալի հոսքերը դեպի կլիմայի դրական ազդեցություն ունեցող գործունեություն:

Նշենք, որ SBFN-ը ֆինանսական հատվածի կարգավորող մարմինների, կենտրոնական բանկերի, ճյուղային ասոցիացիաների եւ զարգացող երկրների բնապահպանական կարգավորող մարմինների կամավոր համայնք է, որոնք հանձնառու են կայուն ֆինանսավորման խթանման ֆինանսական շուկայի զարգացման, ամրապնդման եւ կայունության ազգային առաջնահերթությունների համար: Նրանց մոտեցումները հիմնված են առաջավոր միջազգային փորձի վրա, որն արտացոլում է ազգային պայմաններն ու առաջնահերթությունները։ SBFN-ի անդամների թվում են Արգենտինան, Բրազիլիան, Չինաստանը, Եգիպտոսը, Վրաստանը, Հնդկաստանը, Իրաքը, Ղազախստանը, Ղրղզստանը, Մեքսիկան, Պակիստանը, Ֆիլիպինները, Հարավային Աֆրիկան, Թաիլանդը, Թուրքիան, Ուկրաինան եւ Վիետնամը: Այսօր համագործակցությունում ընդգրկված բոլոր 44 երկրներին բաժին է ընկնում ավելի քան 43 տրլն դոլար կամ զարգացող շուկաներում բանկային ակտիվների 86 տոկոսը, եւ նրանք կարող են առանցքային դեր խաղալ կայուն զարգացման նպատակների (ԿԶԳ) եւ կանաչ աճի ազգային օրակարգի հասնելու գործում:

SBFN-ի անդամ երկրները նաեւ հիմնական վանանդ են ներդրում գլոբալ կանաչ պարտատոմսերի թողարկման գործում: 2020թ. դեկտեմբերի դրությամբ SBFN -ի  անդամ 7երկրներ Ասիա-խաղաղօվկիանոսյան տարածաշրջանում թողարկել են 146 մլրդ դոլար արժողությամբ կանաչ պարտատոմսեր կամ տարածաշրջանում կանաչ պարտատոմսերի ամբողջ թողարկման 66% - ը: Աֆրիկյան տարածաշրջանում SBFN – ի մասնակից 6 երկրները (Եգիպտոս, Գանա, Քենիա, Մարոկկո, Նիգերիա եւ Հարավային Աֆրիկա) թողարկել են 3.924 մլրդ դոլարի կանաչ պարտատոմսեր  կամ տարածաշրջանում կանաչ պարտատոմսերի թողարկման 99% - ը: Լատինական Ամերիկայի տարածաշրջանում SBFN-ի  անդամ 10 երկրներ թողարկել են 21,47 մլրդ դոլարի կանաչ պարտատոմսեր կամ տարածաշրջանում կանաչ պարտատոմսերի թողարկման 98,7%-ը: