Ուրբաթ, 10 Դեկտեմբերի 2021 18:31

Արմինֆո. 2022 թվականին Ամերաբանկում կորպորատիվ վարկավորման աճի տեմպերը կարագանան։ Այդպիսի կարծիք է հայտնել Ամերիաբանկի մանրածախ բանկինգի տնօրեն Արման Բարսեղյանը՝ մամուլի ասուլիսի ժամանակ  պատասխանելով ԱրմԻնֆո-ի թղթակցի հարցին:

 

Նա, մասնավորապես, նշել է, որ Հայաստանի իրական հատվածի հետ աշխատանքի գործընթացը երկրում ցածր տնտեսական ակտիվության տպավորություն չի առաջացնում, այլ, ավելի շուտ, հակառակը։ Այդ կապակցությամբ Բարսեղյանը մատնանշել է ներդրումների ծավալները մի շարք ոլորտներում, օրինակ, բնակարանաշինությանում, արևային էներգետիկայում, գյուղատնտեսությունում։ "Ոչ ոք չի խոսում այն մասին, որ մենք հիմա տնտեսական բում ենք ապրում, կամ ամեն ինչ ընթանում է մեր ծրագրած սցենարով ։ Բայց, հաշվի առնելով կորպորատիվ հատվածի վարկավորման ակտիվությունն այս տարի, կարծում ենք, որ այդպես էլ կավարտենք 2021-ը", - պարզաբանել է նա, ընդ որում, ուշադրություն դարձնելով արդեն այժմ նախաքովիդյան եւ նախապատերազմական մակարդակին մոտեցող կորպորատիվ վարկավորման տեմպերին:

 

Միաժամանակ, Բարսեղյանը հատուկ ընդգծել է, որ Ամերիաբանկի բիզնես վարկերի պորտֆելի շուրջ 70%-ը բաժին է ընկնում առցանց ռեժիմով տրամադրված փոխառություններին: Նրա գնահատմամբ ՝ այս ցուցանիշն աճի միտում ունի։ Իսկ "կանաչ" վարկերի, այդ թվում ՝ էներգետիկ նախագծերի (ՀԷԿ, արևային էլեկտրակայաններ, էներգաարդյունավետություն և վերականգնվող էներգետիկա) վերաբերյալ նա նշել է, որ դրանք պորտֆելում պատկառելի մասնաբաժին են զբաղեցնում։

 

Նշենք, որ Ամերիաբանկը Հայաստանի խոշորագույն բանկն է առանցքային ցուցանիշներով, երկրի ամենակայուն ֆինանսական հաստատություններից մեկը' հստակ ձեւակերպված թվային օրակարգով, արագ աճող բիզնեսով, որն առանձնահատուկ շեշտադրվում է կանաչ ֆինանսավորման վրա: 2009թ. - ից Ամերիաբանկը ֆինանսավորել է ավելի քան 250 մլն դոլարի ծրագրեր վերականգնվող էներգետիկայի ոլորտում' ներառյալ արևային, ֆոտոէլեկտրական և հողմային էներգիան: 2021 թվականի նոյեմբերին Ամերիաբանկը և ՕՊԵԿ Միջազգային զարգացման հիմնադրամը (ՕՊԵԿ հիմնադրամ) ստորագրեցին 30 մլն դոլարի երկարաժամկետ առաջնային փոխառության շուրջ համաձայնագիր' ի աջակցություն Հայաստանում մասնավոր հատվածի զարգացման: Այդ գումարի շուրջ 50% - ը կուղղորդվի փոքր եւ միջին ձեռնարկությունների ֆինանսավորմանը՝ ապահովելով ֆինանսների հասանելիություն եւ թույլ տալով ձեռնարկություններին ստանալ անհրաժեշտ միջոցներ իրենց բիզնեսի զարգացման, աշխատատեղերի ստեղծման եւ պահպանման համար, իսկ վարկի մյուս կեսը կուղղվի կանաչ նախագծերին աջակցմանը, էներգաարդյունավետության բարձրացմանը եւ Հայաստանում ածխածնի արտանետումների կրճատմանը:

 

ԱրմԻնֆո-ի պատրաստած Հայաստանի բանկերի ֆինանսական վարկանիշի  30.09.2021 թ. տվյալներով, Ամերիաբանկի ակտիվները գերազանցում են 1 տրիլիոն դրամը, եւ այդ սահմանի անցումն առայժմ միակն է Հայաստանի բանկային շուկայում: Ամերիաբանկն առաջատարն է ակտիվների գծով' 1.1 տրլն դրամ ($2.2 մլրդ), վարկային ներդրումների գծով' 649.2 մլրդ դրամ ($1.3 մլրդ), ընդհանուր կապիտալի գծով' 124.1 մլրդ դրամ ($256.3 մլն), ընդհանուր պարտավորությունների գծով' 954.8 մլրդ դրամ ($1.97 մլրդ), զուտ շահույթի գծով' 9 ամսում 14.5 մլրդ դրամ ($29.9 մլն): Բացի այդ, Ամերիաբանկն առաջատար եռյակում է կորպորատիվ եւ մանրածախ վարկավորման TOP-3-ում ($914 մլն եւ $426 մլն), ժամկետային ավանդների գծով ($573 մլն), միջազգային կառույցների ներգրավմամբ ($461 մլն), իսկ ցպահանջ պարտավորությունների գծով զբաղեցնում է առաջատար դիրք ($586.2 մլն):

 

Տնտեսության ճյուղերի վարկավորման գծով Ամերիաբանկը ևս TOP-3-ում է, որի հիմնական շեշտը դրվում է ՓՄՁ սուբյեկտների և արդյունաբերական հատվածի ֆինանսավորման վրա, ուր, ընդհանուր առմամբ, ուղղվել է բանկի վարկային պորտֆելի շուրջ 40% - ը կամ $512 մլն-ը: Բանկային հատվածի կողմից ՓՄՁ և արդյունաբերական հատվածի վարկավորման ընդհանուր ծավալում Ամերիաբանկին բաժին է ընկնում 16-20%: Հատկանշական է, որ այսօրվա դրությամբ Ամերիաբանկը Հայաստանի միակ բանկն է, որի մեծամասնական բաժնետերերից են ինստիտուցիոնալ ներդրող' ի դեմս Վերակառուցման եւ զարգացման եվրոպական բանկի (EBRD), եւ Ասիական զարգացման բանկը (ADB):