Ֆրանսիան նախատեսում է Հայաստանում գործունեություն ծավալել արևային էներգիայի ոլորտում

Արմինֆո. էկոնոմիկայի նախարար Վահան Քերոբյանը հանդիպում է ունեցել Հայաստանի Հանրապետությունում Ֆրանսիայի Հանրապետության նորանշանակ արտակարգ և լիազոր դեսպան Անն Լույոյի հետ։ Հանդիպման հիմնական նպատակն էր նախանշել 2022 թվականին երկու երկրների տնտեսական համագործակցության  առաջնահերթ ուղղությունները։

Նախարարության մամուլի ծառայության հաղորդման համաձայն, հանդիպման սկզբում նախարար Քերոբյանը կարևորել է երկու երկրների համագործակցությունը տնտեսության մի շարք ոլորտներում։ «Մեր երկրների հումանիտար և քաղաքական հարաբերությունները բարձր մակարդակի վրա են և կարող են բարենպաստ պայմաններ ստեղծել տնտեսական հարաբերությունների խորացման համար։ Մենք  պատրաստ ենք  անել առավելագույնը մեր երկրների համագործակցության տնտեսական ուղղությունը զարգացնելու համար», - ասել է Վահան Քերոբյանը։

Դեսպան  Անն Լույոն  ընդգծել է  դեկտեմբերի 9-ին Փարիզում կայացած  հայ-ֆրանսիական տնտեսական համագործակցության աշխատանքային խմբի առաջին համատեղ նիստի շրջանակում ստորագրված Հայ-ֆրանսիական տնտեսական համագործակցության 2021-2026թթ. ճանապարհային քարտեզի կարևորությունը և նշել, որ տնտեսության  ոլորտում երկու երկրները շատ անելիքներ ունեն։

Հանդիպմանը ներկա էր նաև Հարավային Կովկասում Զարգացման ֆրանսիական գործակալության (ԶՖԳ) ներկայացուցչական գրասենյակի տնօրեն Ռաֆայել Ժոզան, ով տեղեկացրել է, որ Զարգացման ֆրանսիական գործակալությունն առաջիկայում նպատակ ունի օժանդակել Հայաստանին մշակույթի ու տնտեսական զարգացման ոլորտներում։ Նա  կարևորել է իրենց կողմից կառուցվող Վեդու ջրամբարի՝ որակային առումներով շատ օրինակելի նախագիծ լինելը և նշել, որ նման նախագծերը նպատակ ունեն զբաղվածություն ապահովել մարզերում, ինչպես նաև նպաստել գյուղական համայնքերի զարգացմանը։

Ռաֆայել Ժոզայի խոսքով, գործակալությունը հետաքրքրված է նաև հաղորդակցության և գյուղական ճանապարհների վերակառուցման նախագծերում ներդրումների իրականացմամբ։

Հանդիպման ընթացքում նախարարը հակիրճ ներկայացրել է  Հայաստանի կառավարության նոր ծրագրի տնտեսական հատվածով նախատեսված միջոցառումները։ Որպես առաջնահերթ խնդիրներ՝ նա առանձնացրել է ոռոգման ջրի, ջրային ռեսուրսների կառավարման, հողային բարեփոխման անհրաժեշտությունը։ Վերոնշյալ ոլորտներում համագործակցությունը հետաքրքրել է ֆրանսիական կողմին:

Դեսպանի տեղեկացմամբ, նրանք նախատեսում են Հայաստանում գործունեություն ծավալել նաև արևային էներգիայի ոլորտում և տեղադրել արևային պանելներ ջրամբարների վրա։

Համագործակցության ոլորտները քննարկելիս՝ Վահան Քերոբյանը խոսել է Հայաստանում կանաչ ջրածնի արտադրություն սկսելու հետաքրքրվածության մասին։ Ընդգծելով, որ այս հարցն այժմ էկոնոմիկայի նախարարության ուշադրության կետրոնում է, նա առաջարկել է ֆրանսիական կողմին դիտարկել այս ոլորտում համատեղ նախագծերի իրականացման հնարավորությունները։

Հանդիպման ավարտին դեսպանը տեղեկացրել է Վահան Քերոբյանին, որ 2022 թվականի  տարեսկզբին Ֆրանսիայում նախատեսվում է տնտեսական համաժողովի անցկացում և հրավիրել հայկական կողմին մասնակցելու համաժողովին։ Նախարարն ընդունել է դեսպանի հրավերը և տեղեկացրել, որ անձամբ կմասնակցի համաժողովին։

ՀՀ վիճակագրական կոմիտեի տվյալներով՝ Հայաստանի և Ֆրանսիայի միջև առևտրային շրջանառությունը

2021 թվականի 10 ամիսների ընթացքում աճել է 5,3% - ով ՝ կազմելով 76,7 մլն դոլար։ Ընդ որում, արտահանումն աճել է 2.3 անգամ, մինչեւ 9.3 մլն դոլար՝ ներմուծման 2,1%, մինչեւ 67.4 մլն դոլար

 անկման դեպքում:

Նշենք, որ Զարգացման ֆրանսիական գործակալությունը հիմնադրվել է 1998 թվականին եւ հանդիսանում է Ֆրանսիայի Հանրապետության ֆինանսական մեխանիզմի երկկողմ զարգացման օպերատոր: Գտնվելով Ֆրանսիայի արտաքին գործերի, Էկոնոմիկայի եւ ֆինանսների նախարարությունների, անդրծովյան տարածքների եւ ներքին գործերի նախարարությունների ենթակայության տակ՝ գործակալությունը առեւտրաարդյունաբերական պետական հաստատություն է, եւ զարգացած երկրներում, եւ ֆրանսիական անդրծովյան տարածքներում պայքարում է աղքատության դեմ եւ նպաստում տնտեսական աճին: ԶՖԳ հետ

Հայաստանի Հանրապետության արդյունավետ համագործակցությունը սկսվել է դեռևս 2012 թվականից: ՀՀ ֆինանսների նախարարության կայքում հրապարակված տվյալների համաձայն, 2021 թվականի հոկտեմբերի 5-ի դրությամբ մեր երկրում ԶՖԳ պորտֆելը կազմում է 125.5 մլն եվրո: