Արմինֆո.2020 թվականին ագրոապահովագրության փորձնական ծրագրի շրջանակներում Հայաստանում կնքվել է 1 345 ապահովագրական պայմանագիր, 2021 թվականին այդ ցուցանիշն աճել է երեք անգամ՝ կազմելով 4 300: Այդ մասին մամուլի ասուլիսի ժամանակ հաղորդել է ՀՀ էկոնոմիկայի նախարարության Գյուղատնտեսական ծրագրերի մշակման վարչության պետ Իրա Փանոսյանը։
Նա հիշեցրել է, որ ագրոապահովագրության ծրագրի գործարկումը սկսվել է երկու գյուղատնտեսական մշակաբույսերից եւ մի քանի տարածաշրջաններից, իսկ այսօր ծրագիրն ընդգրկում է ռիսկեր հանրապետության ողջ տարածքում՝ 11 մշակաբույսերի համար:
Մասնավորապես, 2020 թվականին ապահովագրության մակերեսը կազմել է 2 300 հա, 2021 թվականին տարածքն ավելացել է մինչեւ 5 830 հա, ինչը, վարչության ղեկավարի խոսքով, շատ գովելի է: "Սա կարեւոր ցուցանիշ է, քանի որ արտադրանքը նոր է, եւ այստեղ ֆերմերների վստահության հարց կա: Սա վկայում է, որ ապրանքը կայացել է: Մենք հետեւում ենք ողջ գործընթացին՝ սկսած համաձայնագրերի կնքումից, վերջացրած փոխհատուցումների վճարմամբ, որպեսզի հետագայում կատարելագործենք ծրագիրը եւ մշակենք ապրանքներ՝ ֆերմերների պահանջներին համապատասխան", - ասել է Փանոսյանը։
Ագրոապահովագրողների ազգային գործակալության համակարգող Շողեր Պողոսյանը, իր հերթին, նշել է, որ այս տարի հաջողվել է գերազանցել նախատեսված ապահովագրական վճարների հավաքագրման բիզնես ծրագիրը: Մասնավորապես, ըստ նրա, ագրոապահովագրության ծրագրին մասնակցող 3 ապահովագրական ընկերություններ հավաքել են 475 մլն դրամ ապահովագրավճար, 320 մլն դրամ կազմել են ապահովագրական փոխհատուցումները:
Մամուլի ասուլիսի ընթացքում նաև նշվել է, որ հաջորդ տարվա փետրվարին նախարարությունը կհայտարարի ագրոապահովագրության ծրագրում փոփոխությունների մասին, որոնք կվերաբերվեն նաեւ գյուղմթերքների ցանկի ընդլայնմանը:
Հիշեցնենք, որ գյուղատնտեսական ռիսկերի ապահովագրության ծրագիրը Հայաստանում մեկնարկել է, փաստացի, 2019 թվականի սեպտեմբերից եւ դեռեւս աշխատում է փորձնական ռեժիմով ՝ ընդգրկելով Հայաստանի վեց մարզեր: ԱԸ (Ռոսգոսստրախ, Ինգո Արմենիա եւ Սիլ Ինշուրանս) ապահովագրերի վաճառքին ձեռնամուխ են եղել 2020 թվականի սկզբին: Ապահովագրի գնումը սուբսիդավորվում է պետության կողմից 50-60%-ի չափով ՝ կախված տարերային ռիսկայնությունից, իսկ ամբողջական ապահովագրության դեպքում գործում է 10% զեղչ: Որպես վերաապահովագրող հանդես է գալիս շվեյցարական Swiss Re խոշոր ընկերությունը։ Ստեղծվել է ագրոապահովագրողների ազգային գործակալությունը (AINA), որի վրա դրված են ՝ ագրոապահովագրության ստանդարտ ապրանքների, պետական սուբսիդավորման գործընթացի պայմանների և կարգավորման մշակում, շուկայի ուսումնասիրություն և արդիական հաշվարկներ, վնասի գնահատողների ուսուցում և որակավորման բարձրացում, գործընկեր ապահովագրական ընկերությունների նկատմամբ վերահսկողություն:
Նշենք, որ ֆինանսական կարգավորիչը՝ ի դեմս Հայաստանի Կենտրոնական բանկի, մտադիր է աստիճանաբար ընդլայնել ագրոապահովագրության ծրագիրը ինչպես գյուղատնտեսական մշակաբույսերի ավելի մեծ սպեկտրի ընդգրկման, այնպես էլ ապահովագրության ենթակա ռիսկերի առումով: Իսկ առայժմ ընկերություններն աշխատում են ծիրանի, խնձորի և տանձի, խաղողի այգիների, գարնանացան եւ աշնանացան հացահատիկային մշակաբույսերի ցանքատարածքների ապահովագրության հատվածներում, իսկ ապահովագրման ենթակա ռիսկեր են սահմանվել կարկուտը, ցրտահարությունը եւ հրդեհները: