«Ֆլայ Արնա» ավիաընկերության գլխավոր տնօրենի պաշտոնը կզբաղեցնի Էնթոնի Փրայսը

Արմինֆո.Հայաստանի պետական հետաքրքրությունների ֆոնդի (ԱՆԻՖ) և Էյր Արաբիա ընկերության համատեղ «Ֆլայ Արնա Հայաստանի ազգային ավիաուղիներ» ավիաընկերությունը հայտարարում է  Էնթոնի Փրայսի գլխավոր գործադիր տնօրենի պաշտոնում նշանակվելու մասին։

Ինչպես նշվում է ԱՆԻՖ-ի պաշտոնական հաղորդագրությունում,  Էնթոնի Փրայսը ավիացիոն և զբոսաշրջության ոլորտում ունի ավելի քան 20 տարվա փորձ և ղեկավար պաշտոններ է զբաղեցրել British Airways-ում, Air New Zealand-ում, FlyBMI-ում։ Վերջին տարիներին նա աշխատել է որպես թռիչքների մատակարարման ռազմավարության ղեկավար Agoda ընկերությունում,  որը Booking.com ապրանքանիշի մաս է։ Է. Փրայսի հարուստ փորձը ներառում է նաև Էյր Արաբիա ընկերությունում Եվրոպայի տարածաշրջանային գլխավոր տնօրենի պաշտոնը: Ֆլայ Արնայի նորանշանակ գործադիր տնօրենն ունի բիզնես ծրագրերի խթանման հարուստ փորձ Մեծ Բրիտանիայում, ԱՄՆ-ում, Նոր Զելանդիայում, Թաիլանդում, Հյուսիսային Աֆրիկայում և Եվրոպայում: «Հիմնվելով նախորդ պաշտոններից ձեռք բերված գիտելիքների և փորձի վրա՝ Էնթոնի Փրայսը սերտորեն կաշխատի բոլոր շահագրգիռ կողմերի հետ՝ ապահովելով ընկերության զարգացումը և ստեղծելով կայուն արժեք հաճախորդների ու բաժնետերերի համար», - ասվում է հաղորդագրությունում:

Հիշեցնենք, որ ավելի վաղ հայտնի էր դարձել Ֆլայ Արնա ավիաընկերության տնօրենների խորհրդի անդամների եւ տնօրենների խորհրդի նախագահի նշանակման մասին: Մասնավորապես, ընկերության տնօրենների խորհրդում ընդգրկվել են ԱՆԻՖ-ի գլխավոր տնօրեն Դավիթ Փափազյանը, ԱՆԻՀ-ի օպերացիոն տնօրեն Էդուարդ Մկրտչյանը, Air Arabia - ի գլխավոր տնօրեն Ադել Ալին, Air Arabia - ի տնօրեն Հուսամ Ռայդանը, փորձագետ, անկախ անդամ Նիկո Բուխգոլցը: Ֆլայ Արնա-ի վարչության նախագահի պաշտոնը զբաղեցրել է ԱՆԻՖF-ի գլխավոր տնօրեն Դավիթ Փափազյանը:

Նշենք, որ Ֆլայ Արնա-ն Հայաստանի ազգային ավիաընկերությունն է և Հայաստանի պետական հետաքրքրությունների ֆոնդի և AirArabiaGroup-ի համատեղ ձեռնարկությունը: Air Arabia - ի մասնաբաժինը կազմել է 49% եւ, համապատասխանաբար, ԱՆԻՖ-ինը՝ 51%: Հիմնվելով Երևանի «Զվարթնոց» միջազգային օդանավակայանում՝ Ֆլայ Արնա -ն հետևում է AirArabia-ի հաջող բյուջետային բիզնես մոդելին, որն առաջնահերթություն է տալիս ավիաթռիչքների հարմարավետության, հուսալիության և գնի և որակի օպտիմալ հարաբերակցության ապահովմանը: Ավելի վաղ Air Arabia խմբի գործադիր տնօրեն Ադել ալ Ալին հաղորդել էր, որ Ֆլայ Արնա ընկերությունը նախատեսում է ավիաթռիչքներ սկսել մայիսի վերջին: Նորաստեղծ ընկերության բիզնես ծրագրի համաձայն, Ֆլայ Արնա -ի հիմնական ուղղությունները կդառնան Կենտրոնական Ասիան, Մերձավոր Արեւելքը եւ նրա հարեւան երկրները, ինչպես նաեւ ՌԴ-ի բավականին լայն ընդգրկումը: Հիշեցնենք, որ 2013 թվականին Հայաստանը մնաց առանց ազգային ավիափոխադրողի "Արմավիա" ընկերության սնանկացման պատճառով, որից հետո երկրի ավիաշուկայից դուրս եկավ նաեւ Air Armenia ընկերությունը՝ չդիմանալով ռուսական փոխադրողների հետ մրցակցությանը: