Հինգշաբթի, 27 Հունվարի 2022 16:08

Արմինֆո.Հայաստանի ռեստորանային բիզնեսի համախառն շրջանառությունը նվազել է 20 տոկոսով։ Այդ մասին կառավարության նիստի ավարտին լրագրողների հետ ճեպազրույցում հաղորդել է էկոնոմիկայի նախարար Վահան Քերոբյանը՝ մեկնաբանելով քովիդյան սահմանափակումների ազդեցությունը հանրային սննդի ոլորտում։

 

Նախարարի հնչեցրած ցուցանիշները, նրա հավաստմամբ, հիմնված են մի քանի օրվա ընթացքում ստացված տվյալների վրա։ Ընդ որում, Վահան Քերոբյանը նշել է, որ ոլորտի մի շարք ընկերություններում իրացումը փոքր-ինչ նվազել է՝ հաշվի առնելով նրանց հաճախորդների բազան: Սակայն, դրա հետ մեկտեղ, կան նաեւ հաստատություններ, որոնք զգալիորեն տուժել են։

 

Ռեստորանների այցելուների թվի և շրջանառության նվազումը Քերոբյանը պայմանավորել է նաև կորոնավիրուսային հիվանդության տարածման արագացված տեմպերով ՝ "օմիկրոն" շտամմով:

"Մենք ուշադիր հետեւում ենք իրավիճակին եւ կապի մեջ ենք ինչպես տնտեսվարող սուբյեկտների, այնպես էլ Առողջապահության նախարարության մեր գործընկերների հետ", - նշել է նա:

 

Այնուամենայնիվ, նախարարը ճիշտ է համարել "օմիկրոնի" ագրեսիվ տարածման պատճառով չպատվաստված քաղաքացիների համար սահմանափակումներ մտցնելու մասին ընդունված որոշումը:

Նրա խոսքով, սահմանափակումները, անշուշտ, կազդեն տնտեսության վրա, սակայն այդ համատեքստում Քերոբյանն ընդգծել է , որ եթե կորոնավիրուսի հետ կապված իրավիճակը դուրս գա վերահսկողությունից, ապա դա կազդի ոչ միայն տնտեսության, այլեւ մարդկանց առողջության եւ կյանքի վրա:

 

Հիշեցնենք, որ հունվարի 22-ից ուժի մեջ են մտել կորոնավիրուսի դեմ չպատվաստված քաղաքացիների համար սահմանված սահմանափակումները։ Առողջապահության նախարարության որոշման համաձայն, հասարակական սննդի, հյուրանոցների, թանգարանների, թատրոնների, կինոթատրոնների եւ այլ մշակութային միջոցառումների վայրեր այցելելիս չպատվաստված քաղաքացիները պետք է մուտքի մոտ տրամադրեն կորոնավիրուսի բացասական ՊՇՌ-թեստի բացասական պատասխան (ոչ ուշ, քան 72 ժամ), կամ պատվաստումների հավաստագրի QR-կոդը: Այս պահանջները չեն անդրադառնա 18 տարին չլրացած անձանց, հղիների, հակացուցումներ ունեցող քաղաքացիների կամ վերջին 90 օրվա ընթացքում կորոնավիրուսով հիվանդացած անձանց վրա:

 

Ս. թ. հունվարի 24-ի դրությամբ Հայաստանում կորոնավիրուսի դեմ, ընդհանուր առմամբ, պատվաստվել է 1 825 382 մարդ, որոնցից առաջին բաղադրիչով պատվաստվել է 999 891 քաղաքացի և, համապատասխանաբար, երկրորդով՝  819 841-ը: Բուստերային չափաբաժին ստացած քաղաքացիների թիվը հաշվետու ամսաթվի դրությամբ հասել է 5 650-ի։