Ֆրանսիայի զարգացման գործակալությունը եւ ԵՄ-ը վերսկսել են աջակցությունը Հայաստանում  "Ջերմ օջախ" ծրագրին

Արմինֆո.Ֆրանսիայի զարգացման գործակալությունը և Եվրոպական Միությունը համագործակցում են Հայաստանում բարձր էներգաարդյունավետ բնակարանների համար նախագծի շուրջ: Այդ մասին ասվում է Հայաստանում Ֆրանսիայի դեսպանության ֆեյսբուքյան էջում զետեղված հաղորդագրությունում:

«Ցրտաշունչ ձմռանը գտնվելով վատ մեկուսացված տներում՝ ցածր և միջին եկամուտ ունեցող հայաստանյան ընտանիքներն ապրում են դժվարին պայմաններում: Ահա թե ինչու, Ֆրանսիայի զարգացման գործակալությունը և Եվրամիությունը վերջերս վերսկսել են իրենց աջակցությունը Ազգային հիփոթեքային ընկերության (NMC) կողմից ղեկավարվող «Ջերմ Օջախ» ծրագրին: Այն նպաստում է էներգաարդյունավետության աշխատանքների ֆինանսավորմանն առավել խոցելի ընտանիքների համար, հատկապես գյուղական վայրերում և երկրոդային քաղաքներում», - ասվում է հաղորդագրությունում:

Հիշեցնենք, որ դեռեւս 2021 թվականի մայիսին Ազգային հիփոթեքային ընկերության եւ Ֆրանսիայի զարգացման գործակալության միջեւ "Ջերմ օջախ" էներգաարդյունավետ բնակարանային շինարարության ծրագրի ֆինանսավորման շրջանակներում ստորագրվել էր 20 մլն եվրոյի վարկային համաձայնագիր: Այս նախագիծը ծրագրի առաջին փուլի շարունակությունն է: Նախագծի երկրորդ փուլում ֆինանսավորման ծավալը կրկնապատկվում է։ Միջոցները (275 հազար դրամից մինչեւ 3 մլն դրամ) նոր ծրագրի շրջանակներում կտրամադրվեն մատչելի պայմաններով,  առնվազն, 5 տարի մարման ժամկետով: Ընդհանուր առմամբ, ծրագրի իրականացման ընթացքում վարկերից օգտվել է մոտ 8000 տնային տնտեսություն։ Ծրագիրը նախատեսված է ցածր և միջին եկամուտ ունեցող ընտանիքների համար։