Արմինֆո.Կառավարող խմբակցության պատգամավորները հրաժարվել են մեկնաբանել, թե արդյոք կան ռուս-ուկրաինական ճգնաժամի հետ, մասնավորապես, ցորենի մատակարարման խախտումների առնչությամբ Հայաստանի համար հնարավոր հետեւանքների հետ կապված ռիսկեր:
Մարտի 7-ին խորհրդարանում կայացած ճեպազրույցի ժամանակ լրագրողը հետաքրքրվել է, թե ինչպես է Հայաստանը չեզոքացնելու դրա հետ կապված ռիսկերը, քանի որ հանրապետությունը ցորեն է ներմուծում, հիմնականում, Ռուսաստանից եւ Ուկրաինայից:
"Ցորենի պաշարների մասին տեղեկատվությունը գաղտնի է եւ հրապարակման ենթակա չէ", - ասել է ԱԺ արտաքին հարաբերությունների մշտական հանձնաժողովի նախագահ Էդուարդ Աղաջանյանը: "Եթե խոսքը գնում է ռիսկերի մասին, որոնք կարող են ծագել ռուս-ուկրաինական ճգնաժամից, այդ թվում՝ Հայաստանին վերաբերող, ցորենը ռիսկերից մեկն է։ Հետևաբար, ես չեմ կարող հասկանալ, թե ինչու է լրագրողական հանրությունը կամ դրա մի մասը կենտրոնացել դրա վրա, որովհետև կան այլ խնդիրներ, գուցե, ավելի կարևոր, ավելի ռիսկային, քան ցորենը", - նշել է նա։
"Քաղաքացիական պայմանագիր" խմբակցության պատգամավոր Վահագն Ալեքսանյանն, իր հերթին, նշել է, որ ժամանակակից աշխարհում ռիսկերը ամենուր են: "Վստահ եմ, որ Էկոնոմիկայի նախարարությունն ամեն ինչ անում է, որպեսզի ռիսկերը կառավարելի լինեն: Բայց մենք չենք կարող բացառել, որ աշխարհում ինչ-որ պահի ինչ-որ բանի ճգնաժամ կարող է առաջանալ", - նշել է նա։
Նշենք, որ օրերս խորհրդարանում ընդդիմադիր պատգամավորի նույն հարցին այդպես էլ չէր պատասխանել վարչապետ Նիկոլ Փաշինյանը, կենտրոնանալով այն բանի վրա, որ խորհրդարանականն իր հարցում հերթական անգամ գործող իշխանություններին մեղադրել էր Արցախի տարածքների 75%-ի հանձնման համար, որտեղ մնացել են նաև ցորենի պահուստները"։
Մինչդեռ, Ռուսաստանը եւ Ուկրաինան ցորենի խոշոր արտադրողներ են. նրանց, ընդհանուր առմամբ, բաժին է ընկնում համաշխարհային արտահանման մոտ 30 տոկոսը: Ինչպես հայտարարում են փորձագետները, Սեւ ծովում նավահանգիստների փակումը, ի թիվս այլ հետեւանքների, կհանգեցնի այն բանին, որ Ուկրաինայից ծովով ցորենի մատակարարումն անհնար կլինի անորոշ ժամանակահատվածում: Արդեն մարտի սկզբին ցորենի գինը հասել է վերջին 14 տարվա ռեկորդային ցուցանիշի (2008թ. մարտից)՝ 10,59 դոլար բուշելի դիմաց։ Ինչպես հաղորդել է «Կոմերսանտը», վկայակոչելով Commerzbank-ի վերլուծաբան Կարստեն Ֆրիչին, նավագնացության ընկերություններն այլեւս չեն ընդունում Ռուսաստանից կամ Ռուսաստան առաքելու պատվերներ: "Եվ, ամեն դեպքում, հիմա գրեթե ոչ մի գնորդ չի ցանկանա ռուսական ցորեն պատվիրել։ Դա նշանակում է, որ ցորենի համաշխարհային արտահանման մինչեւ 30 տոկոսը կտրված է շուկայից՝ ավելի կամ պակաս չափով", - պարզաբանել է վերլուծաբանը։