Չորեքշաբթի, 23 Մարտի 2022 17:44

Արմինֆո. Չնայած հանգամանքին, որ ՀՀ ԿԲ-ն եւ միջազգային ֆինանսական ինստիտուտները վատթարացրել են Հայաստանի ՀՆԱ-ի աճի վերաբերյալ իրենց կանխատեսումները, ՀՀ էկոնոմիկայի նախարարությունը դեռեւս բավարար ներուժ է տեսնում 2022 թվականի պետական բյուջեում ամրագրված 7 տոկոս նպատակային նշագծին հասնելու համար: Այդ մասին մարտի 23-ին հայտարարել է գերատեսչության ղեկավար Վահան Քերոբյանը՝ խորհրդարանում կառավարական ժամի ընթացքում։

 

Նշենք, որ Հայաստանի Կենտրոնական բանկն օրերս վատթարացրել է 2022 թվականի ՀՆԱ - ի աճի կանխատեսումը՝ նախկին 5,3 տոկոսից մինչեւ 1,6 տոկոս, Fitch Ratings միջազգային վարկանիշային գործակալությունը վերանայել է իր կանխատեսումը մինչեւ 1,3 տոկոս՝ նախկին 5,3 տոկոսից, իսկ ԱՄՀ-ը՝ մինչեւ 1,5 տոկոս՝ նախկին 5,3 տոկոսից: Fitch-ը նաեւ կանխատեսում է, որ 2022-ին գնաճը կկազմի միջինը 8,5%, ինչը բարձր է Կենտրոնական բանկի թույլատրելի միջակայքի վերին սահմանից (4% +/- 1,5%), եւ 5%՝  2023 թվականին:

 

Էկոնոմիկայի նախարարը խոստովանում է, որ հանրային ծառայությունների սակագների բարձրացումը (ջուր, գազ, էլեկտրաէներգիա –խմբ.) կհանգեցնի ինֆլյացիայի աճի: Բայց այդ գործոնի ազդեցությունը գերատեսչությունը գնահատում է 1 տոկոսի սահմաններում։ Արդյունքում, ինչպես նշել է Քերոբյանը, ՀՆԱ-ի աճի վրա դրա ազդեցությունը "շատ աննշան" կլինի:

 

Անդրադառնալով ներդրումների առումով սպասումներին՝ Քերոբյանը խոստացել է առաջիկա շաբաթներին կառավարությանը ներկայացնել մի նախաձեռնություն, որը "էական նշանակություն կունենա ներդրումային միջավայրի վրա": "Դա "Գույք եւ ենթակառուցվածքներ ներդրումների համար" ծրագիրն է, որի շրջանակներում ներդրողները լավ մոտիվացված կլինեն", - պարզաբանել է նա:

 

Նշենք, որ "Պետական բյուջեի մասին" ՀՀ օրենքի համաձայն, ՀՆԱ-ի աճը տարվա արդյունքներով ամրագրվել է 7 տոկոսի  չամ, իսկ բարենպաստ արտաքին միջավայրի պայմաններում՝ 9 տոկոս, գնաճը (4% +/- 1,5%):

 

Հիշեցնենք, որ Վահան Քերոբյանը դեռ 2020թ. վերջին հավաստիացնում էր, որ Հայաստանը կարող է 2021թ. արդյունքներով ՀՆԱ-ի աճի երկնիշ ցուցանիշի հասնել և, նույնիսկ, խոստացել էր լքել իր պաշտոնը, եթե այդ ցուցանիշը չապահովվի։ 2021 տնտեսական տարին Հայաստանը փակել է 5,7 տոկոս տնտեսական աճով։ Արդեն 2022 թվականի հունվարին լրագրողների հետ զրույցում նա հայտարարեց, որ կատակել է, երբ խոսել է իր հրաժարականի մասին։ Նրա խոսքով՝ ինքն այդ հայտարարությունն արել է բիզնեսը խանդավառելու նպատակով։