Հայաստանի ֆերմերները կարող են ապահովագրել հացահատիկային մշակաբույսերը երաշտից. գյուղապահովագրության ծրագիրն ընդլայնվել է

Արմինֆո. Գյուղապահովագրության համակարգի ներդրման պիլոտային ծրագիրը շարունակում է ընդլայնվել։ Ինչպես հաղորդում է Էկոնոմիկայի նախարարության մամուլի ծառայությունը, այսուհետ ցանկացողները հնարավորություն կունենան հացահատիկային մշակաբույսերը (ցորեն, գարի, վարսակ) ապահովագրել նաև «երաշտ» ռիսկից։

Ապահովագրական այս պրոդուկտը հասանելի կլինի Արագածոտնի, Կոտայքի, Գեղարքունիքի, Լոռու, Շիրակի, Սյունիքի և Տավուշի մարզերի տնտեսավարողների համար։ Պայմանագրերի վաճառքն արդեն մեկնարկել է և կշարունակվի մինչև մայիսի 31-ը, իսկ ապահովագրական գործակալությունների հետ կնքված պայմանագրերը ուժի մեջ կմտնեն հունիսի 1-ից։

Ծրագրում նոր ապահովագրական պրոդուկտի ներառումը հնարավոր է դարձել Ապահովագրությամբ դիմակայման ներդրումային հիմնադրամի (IIF)  և «Սպայկա» ՍՊԸ-ի հետ համագործակցության շնորհիվ։

Ապրիլի 25-ին ՀՀ Էկոնոմիկայի նախարարությունում կայացած հանդիպման ժամանակ նախարարության և «Սպայկա» ընկերության միջև ստորագրվել է Փոխըմբռնման հուշագիր։ Փաստաթուղթը ստորագրել են էկոնոմիկայի նախարարի տեղակալ Արման Խոջոյանը և «Սպայկա» ընկերության զարգացման գծով փոխտնօրեն Կարեն Բաղդասարյանը։

Հուշագրի հիմնական նպատակն է նվազեցնել հայ ֆերմերների խոցելիությունը՝ պայմանավորված արտադրական ռիսկերով և երաշտի վտանգի հետևանքով առաջացող կորուստներով։

«Գյուղատնտեսական ապահովագրության ծրագիրը ոլորտում իրականացվող կարևորագույն նախաձեռնություններից է, ու թեև գյուղապահովագրության ծրագիրը դեռևս գտնվում է պիլոտային փուլում, սակայն այն ռեֆորմային ծրագիր է։ Մենք շնորհակալ ենք մեր գործընկերներին ծրագրում այս բաղադրիչն ընդգրկելու հարցում աջակցություն ցուցաբերելու համար», - ասել է Արման Խոջոյանը։

Կարեն Բաղդասարյանն իր հերթին նշել է հետևյալը․«Գյուղատնտեսությունն առանց ապահովագրության չի կարող զարգանալ, և պարենային անվտանգության ապահովման տեսանկյունից հատկապես կարևոր է հացահատիկային մշակաբույսերի ապահովագրությունը»։

Գյուղատնտեսության ոլորտում ապահովագրական համակարգի ներդրման փորձնական ծրագրի իրականացման հիմնական նպատակն է գյուղատնտեսության ապահովագրության մեխանիզմների հստակեցումը և ամբողջական համակարգի ներդրման արդյունքում գյուղատնտեսության ոլորտում ռիսկերի կառավարմանն ուղղված քաղաքականության իրականացումը: «Երաշտ» ռիսկի դեպքում սուբսիդավորվում է ապահովագրավճարի 60 տոկոսը։

Ծրագրից օգտվելու համար գյուղատնտեսության ոլորտի տնտեսավարողները պետք է դիմեն ստորև նշված ապահովագրական ընկերություններից որևէ մեկին՝ «Ինգո Արմենիա» ապահովագրական ՓԲԸ, «Ռոսգոսստրախ-Արմենիա» ապահովագրական ՓԲԸ, «Սիլ Ինշուրանս» ապահովագրական ՓԲԸ:

Հիշեցնենք, որ գյուղատնտեսական ռիսկերի ապահովագրության ծրագիրը Հայաստանում մեկնարկել է, գործնականում, 2019 թվականի սեպտեմբերից՝ ընդգրկելով Հայաստանի վեց մարզեր։ Ապահովագրագրի գնումը սուբսիդավորվում է պետության կողմից 50-60%-ի չափով ՝ կախված տարերային ռիսկայնությունից, իսկ ամբողջական ապահովագրության դեպքում գործում է 10% զեղչ: Որպես վերաապահովագրող հանդես է գալիս շվեյցարական Swiss Re խոշոր ընկերությունը։ Նշենք, որ  հայկական "Սպայկա" արտադրալոգիստիկ ընկերությունը, որը հիմնադրվել է 2001 թվականին, 2007 թվականից զբաղվում է մրգերի եւ բանջարեղենի արտահանմամբ եւ վաճառքով՝ դեպի Ռուսաստան, ԱՊՀ երկրներ եւ Եվրոպա:

Հարկ է հիշեցնել, որ ՌԴ կառավարությունը որոշում է ընդունել մինչև հունիսի 30-ը ԵԱՏՄ երկրներ հացահատիկային մշակաբույսերի արտահանումը ժամանակավորապես արգելելու մասին։ Խոսքը վերաբերում է ցորենին, տարեկանին, գարուն եւ եգիպտացորենին: Այդ կապակցությամբ Հայաստանի գյուղատնտեսության զարգացման եւ պարենային անվտանգության վարչության պետը նշել է, որ այս փուլում հացահատիկային դեֆիցիտի հետ կապված ռիսկեր Հայաստանում չկան: Համադրելով Ռուսաստանում տվյալ ապրանքային խմբի արտադրության եւ արտահանման ծավալները եւ Հայաստանի պահանջարկի մակարդակը, որը կազմում է բոլորովին փոքր մասնաբաժին, նա պարզաբանել է, որ որեւէ խնդիր չի կարող առաջանալ: Մասնավորապես, ըստ Ղազարյանի, ՌԴ-ում այս տարի արտադրվել է 76 մլն տոննա ցորեն, որից 23 մլն տոննան արտահանվել է, մինչդեռ Հայաստանում պահանջարկի ծավալը կազմում է ընդամենը 300 հազար տոննա:

2022 թվականի սկզբից, ինչպես հաղորդել Է Ղազարյանը, Հայաստանը ներմուծել է 76 հազար տոննա ցորեն, 12 հազար տոննա գարի եւ 22 հազար տոննա եգիպտացորեն: "Եթե համեմատում ենք սպառման տարեկան պահանջարկի հետ, և հաշվի առնելով կուտակված պաշարները, այս փուլում էական ռիսկեր չենք կանխատեսում", - հավելել է նա: Իսկ եթե ցորենի ներկրման արգելքը երկարաժամկետ լինի, պարենային անվտանգության վարչության պետը նշել է ալյուրի, եգիպտացորենի, գարու ներմուծման  սահմանափակումների բացակայությունը: