Արմինֆո.Եթե ավելի վաղ բիզնեսի Հայաստան տեղափոխման հայտերի շուրջ 98 տոկոսը ստացվում էր ՏՏ ոլորտում աշխատող գործարար հատվածից, այսօր ճյուղային հատվածն ընդլայնվել է' ընդգրկելով արտադրությունը, լոգիստիկ ծառայությունները եւ այլն: Այդ մասին ԱրմԻնֆո-ի հետ հարցազրույցում հաղորդել Է BWB (Business Without Borders) նախաձեռնության հիմնադիր Մհեր Ղազարյանը:
Նա ընդգծել է, որ բիզնեսի Հայաստան տեղափոխման հիմնական հոսքը գրանցվել է մարտի սկզբին, իսկ այժմ արդեն որոշակի դանդաղում է նկատվում: Վկայակոչելով Իրավաբանական անձանց պետռեգիստրի տվյալները՝ Ղազարյանը հաղորդել է, որ ՌԴ, Ուկրաինայի և Բելառուսի քաղաքացիները Հայաստանում գրանցել են, ընդհանուր առմամբ, 2 439 ՓԲԸ, ՍՊԸ, ԱՁ և հիմնադրամներ, ինչը բավականին փոքր ցուցանիշ է: "Բայց դա դեռ սկիզբն է", - նկատել է փորձագետը։
Այս առումով նա կարեւորել է պետության դերը հայկական շուկայի նկատմամբ օտարերկրյա բիզնեսի հետաքրքրության բարձրացման գործում։ Որպես օրինակներից մեկը՝ Ղազարյանն ընդգծել է, որ հարկային ոլորտում որպես ՏՏ հատվածի տեղափոխման լավ ազդակ կարող էր ծառայել զրոյական եկամտահարկի ռեժիմի երկարաձգումը։
Միաժամանակ, նա մատնանշել է բանկային համակարգում առկա որոշակի խնդիրները։ "Մարդիկ սովոր են արագ գործարքների, ավելի ժամանակակից ապրանքների: Մեր բանկերն առայժմ կաղում են այդ ուղղությամբ։ Կան, անշուշտ, այնպիսիք, որոնք կարող են առաջարկել լավ հավելվածներ: Բայց, ընդհանուր առմամբ, այն ծառայություններն ու լուծումները, որոնք բիզնեսն ստացել է Ռուսաստանում, չի կարող ստանալ Հայաստանում։ Օրինակ, Ռուսաստանում սովորական գործարքը կարելի է իրականացնել մեկ հպումով, այստեղ դա ավելի երկար գործընթաց է", - նշել է նա։
Ընդ որում, BWB-ի հիմնադիրը չի բացառել, որ հայկական շուկայում օտարերկրյա գործարարների հայտնվելը կարող է հանգեցնել որոշակի փոփոխությունների, այդ թվում ՝ բանկային սպասարկման, բիզնես մշակույթի եւ այլ ոլորտներում:
Օտարերկրացիներից ստացվող հարցումների կապակցությամբ, ինչպես նշել է Ղազարյանը, հնարավոր է, հայկական բանկերը մտածեն գործընթացների եւ ընթացակարգերի որոշակի փոփոխությունների մասին: Որպես բանկային հատվածի կարեւոր ապրանքներից մեկը փորձագետը նշել է հիփոթեքային փոխառությունները ոչ ռեզիդենտների համար, որը կարող է ձեռք բերվել կառուցապատողների եւ բանկերի համատեղ նախագծերի շրջանակներում: Այս համատեքստում BWB-ի հիմնադիրը կարեւորել է օտարերկրյա բիզնեսի հարցումներին ժամանակին արձագանքելը, ինչը կբացառի վերջիններիս հետաքրքրությունը այլ շուկաների նկատմամբ՝ որպես բիզնեսի տեղափոխում:
Նշենք, որ Իրավաբանական անձանց պետական ռեգիստրի գործակալության տվյալներով ՝ փետրվարի 24-ից մինչեւ ապրիլի 22-ը Հայաստանում ՌԴ քաղաքացիների ֆիզիկական և/կամ իրավաբանական անձանց մասնակցությամբ գրանցվել է 752 ՍՊԸ , 6 ՓԲԸ, 4 հիմնադրամ, իսկ ՌԴ 1563 քաղաքացիներ գրանցվել են որպես ԱՁ: Բելառուսի Հանրապետության քաղաքացիների կողմից գրանցվել է 29 ՍՊԸ, 6 ՓԲԸ, 4 հիմնադրամ, 60 ԱՁ: Ուկրաինայի քաղաքացիները գրանցել են 11 ՍՊԸ եւ 14 ԱՁ:
Նշենք, որ BWB նախաձեռնության առաքելությունն է օգնել մասնավոր անձանց եւ կորպորացիաներին ՝ շարունակելու եւ ընդլայնելու իրենց բիզնեսը Հայաստանում։ Նախաձեռնությունը տրամադրում է խորհրդատվություն և ուղեկցում բիզնեսի տարբեր ձևերի ՝ ՓԲԸ, ԱՁ, ՍՊԸ և այլն հիմնման եւ տեղափոխման գործում, խորհրդատվություն բանկային հաշիվների բացման և բանկային ծառայություններին հասանելիություն ստանալու վերաբերյալ, հարկման, հարկային և հաշվապահական հաշվառման վարման, միգրացիայի և կացության կարգավիճակ ստանալու հարցերի վերաբերյալ, ներդրումային հնարավորությունների վերաբերյալ, օգնություն է ցուցաբերում առևտրային և այլ պայմանագրերի կազմման հարցում: Նախաձեռնության հիմնադիրն է Մհեր Ղազարյանը, խորհրդատվական խորհրդի անդամներ են Արթուր Ղազարյանը և Րաֆֆի Սեմերջյանը: BWB-ի ծառայությունների մասին ավելի մանրամասն տեղեկատվություն է ներկայացված պաշտոնական կայքում՝ http://bwbinitiative.com/: