Արմինֆո. Հայաստանի տնտեսությունն իրեն կայուն է զգում։ Առաջին հեռուստաալիքով հեռարձակված հարցազրույցում նման կարծիք է հայտնել էկոնոմիկայի նախարար Վահան Քերոբյանը։
Այդ առնչությամբ նա նշել է, որ տնտեսական ակտիվությունը 4 ամսվա արդյունքներով բարձր է եղել ծրագրված ցուցանիշներից, բացի այդ, գերազանցել է միջազգային կազմակերպությունների հոռետեսական կանխատեսումները:
Քերոբյանը նաեւ հիշեցրել է առաջին եռամսյակում ՀՆԱ-ի 8,6 տոկոս աճի մասին, ինչը, նրա խոսքով, բավականին բարձր ցուցանիշ է: Այդ կապակցությամբ նա նշել է, որ աճի շարժիչ ուժ հանդիսացող ծառայությունների ոլորտը ծավալները մեծացրել է ոչ միայն ներքին սպառման, այլ զբոսաշրջության հաշվին, մասնավորապես, Հայաստան տեղափոխված օտարերկրյա քաղաքացիների շնորհիվ։
Դրա հետ մեկտեղ, նա նշել է մշակող արդյունաբերության, շինարարության հատվածի, արտահանման եւ ներմուծման աճի բարձր տեմպերը:
Ընդ որում, պաշտոնյան նշել է, որ առկա տնտեսական աճն իրական է, այլ ոչ թե անվանական։ "Դա արդեն գնաճի մակարդակով ճշգրտված աճ է", - նշել է նա:
Նշենք, որ վիճակագրության տվյալների համաձայն, 2022 թվականի հունվար-ապրիլ ամիսներին Հայաստանում տնտեսական ակտիվությունն աճել է տարեկան 9,4 տոկոսով՝ արտահանման եւ ներմուծման, համապատասխանաբար, 25,2 եւ 39,1 տոկոսով աճի ֆոնին: Հատկանշական է, որ տնտեսական ակտիվության ներկայիս աճը բարձր է եղել նախաքովիդյան նույն ժամանակահատվածի տեմպերից ։ 2022թ. հունվար-ապրիլ ամիսներին աճ են արձանագրել բոլոր ոլորտները, ընդ որում, առավելապես, ծառայությունների ոլորտն ու էներգահամալիրը, մինչդեռ, մեկ տարի առաջ հենց ծառայությունների ոլորտն էր անկման մեջ։
2022թ. ապրիլին 2021թ. ապրիլի համեմատ տնտեսական ակտիվությունն աճել է 8,8%-ով (2021թ.ապրիլին 2020թ. ապրիլի համեմատ 23,2% - ի դիմաց)։ Աճ է դիտվել է բոլոր հատվածներում. ծառայությունների ոլորտում՝ 27,1%, շինարարական ոլորտում՝ 15,6%, առևտրի ոլորտում՝ 8,6%, էներգահամալիրում՝ 5,8%, արդյունաբերական հատվածում՝ 1,2%։
Արդյունաբերական արտադրանքի գների ինդեքսը 2022 թվականի հունվար-ապրիլին 2021 թվականի նույն ժամանակահատվածի համեմատ աճել է 10,8% - ով, 2022 թվականի ապրիլին՝ 2021 թվականի ապրիլի համեմատ ' 9,4%-ով:
Հիշեցնենք, որ ավելի վաղ Առաջատար տեխնոլոգիաների ընկերությունների միության (ԻՏՁՄ) գործադիր տնօրեն Հայկ Չոբանյանը նշել էր, որ վերջին տվյալների համաձայն, ռուս-ուկրաինական հակամարտության պատճառով Հայաստան է տեղափոխվել շուրջ 70 հազար մարդ:
