Համաշխարհային բանկը ներկայացրել է Հայաստանի ջրային ոլորտի ենթակառուցվածքների զարգացման վերաբերյալ ուսումնասիրություն

Արմինֆո.ՀՀ տարածքային կառավարման և ենթակառուցվածքների նախարար Գնել Սանոսյանն ընդունել է Համաշխարհային բանկի հայաստանյան գրասենյակի տնօրեն Կարոլին Գեգինատի գլխավորած պատվիրակությանը։

Ինչպես հաղորդում է ՏԿԵՆ մամուլի ծառայությունը, դեռևս մեկ ամիս առաջ ձեռք բերված պայմանավորվածության համաձայն Համաշխարհային բանկի ներկայացուցիչները նախարարին են ներկայացրել իրենց կատարած հետազոտությունը ջրային ոլորտում ենթակառուցվածքների զարգացման՝ մասնավորապես ոռոգման և ջամբարաշինության, խմելու ջրի համակարգերի զարգացման հեռանկարների, ՋՕԸ-ների արդյունավետ կառավարման, ինչպես նաև կենտրոնացված կառավարումից դուրս մնացած բնակավայրերի խմելու ջրի մատակարարման խնդիրների վերաբերյալ։

Նախարարը բարձր է գնահատել կատարված աշխատանքը, ՀԲ-ի տեսլականը՝ առկա խնդիրները լուծման վերաբերյալ։  Նախարարը ընդգծել է, որ որոշ հստակեցնումներից հետո արդեն հնարավոր կլինի անցնել գործնական քննարկման։

Հիշեցնենք, որ հարցազրույցներից մեկում էկոնոմիկայի նախարար Վահան Քերոբյանը, խոսելով երկրի ջրային քաղաքականության մասին, ընդգծել էր, որ Հայաստանում ոռոգման հետ կապված լուրջ խնդիրներ կան։ Մասնավորապես, ըստ նրա, այսօրվա դրությամբ երկրում հաջողվում է ոռոգել հողերի ընդամենը 25 տոկոսը, ինչը չափազանց ցածր ցուցանիշ է։ "Եվ այստեղ մենք մեծ խնդիրներ ունենք լուծելու։ Առաջին հերթին, անհրաժեշտ է բարձրացնել ջրային ռեսուրսների օգտագործման արդյունավետությունը", - ասել էր նախարարը, նշելով, որ ջրային ոլորտի բարեփոխումները երկրի կառավարության օրակարգում են։ Դրա հետ մեկտեղ, նա պատմել էր, որ այսօր հաջողվում է հավաքել տարվա ընթացքում առաջացած ջրային ռեսուրսների ընդամենը 10 տոկոսը: «Մենք կորցնում ենք ջրային ռեսուրսների զգալի մասը՝ մինչեւ ջուրը ֆերմերային տնտեսություններին հասցնելը», - ասել էր Քերոբյանը:

Հիշեցնենք, որ ավելի վաղ ԱրմԻնֆո-ի թղթակցի հետ զրույցում ջրային ռեսուրսների հայտնի մասնագետ Քնարիկ Հովհաննիսյանը հայտարարել էր, որ տարվա ընթացքում մեր տարածքում ձևավորվում է մոտ 7 մլրդ խմ ծավալով ջրային հոսք, դրանից 3.8 մլրդ խմ մակերեւութային հոսք է, իսկ 3.2 մլրդ խմ ստորգետնյա հոսք է, որը ներկայացված է բարձրորակ ջրերով, որոնք օգտագործում են տնային տնտեսությունները և արտադրությունը:

Նա պարզաբանել է, որ այդ ողջ մեծ զանգվածից, կոպիտ հաշվարկով, մենք օգտագործում ենք ընդամենը 2.5 մլրդ խմ, ողջ մնացածը թողնում ենք մեր հարեւաններին՝ ջրամբարների ոչ պատշաճ վիճակի պատճառով։ "Մենք, մեր հերթին, պետք է կարողանանք ջրամբարներ կառուցել, պահել այն հոսքը, որը ձևավորվում է մեր տարածքում։ Եթե մեր ռեսուրսները մենք կարողանանք ճիշտ օգտագործել, մեզ ոչ մի տաքացում չի սպառնում, ոչ մի "ջրային սով", - փաստել է Քնարիկ Հովհաննիսյանը։

Այս համատեքստում նա ընդգծել է, որ երկրի ջրային քաղաքականությունը պետք է լինի ողջամիտ, գիտականորեն հիմնավորված։ «Այլ կերպ ասած՝ օգտագործիր այն, ինչ ձեռքի տակ է, և այլ բան մի փնտրիր: Այո, դրանք թանկարժեք գործընթացներ են, երկարաժամկետ նախաձեռնություններ են, բայց դրանք այսօր խիստ անհրաժեշտ են", - ասել է բնապահպանը։