Հայաստանը միշտ առանցքային դեր է խաղացել խորհրդային տիեզերական ծրագրում.  ԶԼՄ

Արմինֆո.Հայաստանը միշտ առանցքային դեր է խաղացել խորհրդային տիեզերական ծրագրում։ Այդ մասին ասվում է El Pais պարբերականում իսպանացի լրագրող Նունո Դոմինգեսի հրապարակման մեջ, որում խոսվում է Հայաստանում կայանալիք Starmus փառատոնի մասին։

Ինչպես նշել է լրագրողը, ամռան վերջին՝ աշնան սկզբին, Հայաստանում կանցկացվի Starmus վեցերորդ փառատոնը, որն իր տեսակի մեջ միակ միջոցառումն է, որին կմասնակցեն տիեզերագնացներ, Նոբելյան մրցանակի դափնեկիրներ, ազդեցիկ գիտնականներ, երաժշտական աստղեր: Նախորդ մի քանի միջոցառումներն անցկացվել են Կանարյան կղզիներում։

Փառատոնը հիմնադրվել է Կանարյան կղզիների Աստղաֆիզիկայի ինստիտուտի հետազոտող Գարիկ Իսրայելյանի եւ աստղագետ, Queen խմբի կիթառահար Բրայան Մեյի կողմից: Հայաստանում փառատոնը տեղի կունենա օգոստոսի 31-ից մինչեւ սեպտեմբերի 9-ը եւ նվիրված կլինի Մարսի մակերեւույթին առաջին կառավարվող վայրէջքին, որն իրականացվել է 1971 թվականին Խորհրդային Միության կողմից "Մարս-3" տիեզերանավի օգնությամբ:

Միջոցառմանը կմասնակցեն հայտնի տիեզերագնացներ, ինչպիսիք են կանադացի Քրիս Հեդվիլդը, ամերիկացիներ Չարլի Դյուկը, որը Լուսնի վրա է ոտք դրել 1972 թվականին 36 տարեկանում, եւ Չարլզ Բոլդենը, որը ՆԱՍԱ-ն ղեկավարել է Բարաք Օբամայի օրոք: Նրանց կմիանան Նոբելյան մրցանակի դափնեկիրներ Քիփ Թորնը, Էմանուել Շարպանտիեն եւ Դոննա Սթրիքլենդը: Երաժիշտների թվում կլինեն Sons of Apollo ռոք խումբը, Սերժ Թանկյանը, ջազ դաշնակահար Տիգրան Համասյանը, ռոք երաժիշտ Անդրեյ Մակարևիչը։

Հայաստանն ընտրվել է փառատոնի անցկացման վայր ՝ աստղագիտության, աստղաֆիզիկայի և տիեզերքի ուսումնասիրման գործում ունեցած ավանդի համար։ 20-րդ դարում Հայաստանն առանցքային դեր է խաղացել խորհրդային տիեզերական ծրագրում, և այսօր այստեղ են գտնվում այնպիսի գիտական օբյեկտներ, ինչպիսիք են Բյուրականի աստղադիտարանը և "Արագած" կայանը։

Նախորդ փառատոների ամենահեղինակավոր հյուրերից մեկը բրիտանացի ֆիզիկոս Սթիվեն Հոքինգն էր, որը մահացել է 2018 թվականին: 2016 թվականից Starmus-ը պարգեւատրում է Հոքինգի մեդալով, որով ճանաչվում է գիտության միջազգային հանրահռչակման գործում ունեցած վաստակը: Այս մրցանակը ստացել են Հանս Զիմերը, Նիլ Դեգրաս Թայսոնը, Բազ Օլդրինը և Բրայան Ինոն։

59 տարի առաջ Հայաստանի մայրաքաղաքում ծնված Իսրայելյանն ընդգծում է. "Հայաստանը բացառիկ դեր է խաղացել անցյալում, ներկայում եւ ապագայում, թե ինչպես ենք մենք հասկանում եւ հետազոտում մեր տիեզերքը։ Ես ակնկալում եմ ողջունել մտածողների եւ արարիչների այս նշանավոր խումբը, որպեսզի նրանք ներկայացնեն իրենց գաղափարները":