Արմինֆո. Ծաղկաձորի "Գոլդեն Փելիս" հյուրանոցը կկառավարի Ֆրանսիական Accor խումբը' աշխարհահռչակ" MERCURE " ապրանքանիշով: Այդ մասին Facebook-ի իր էջում հաղորդել է ԱԺ "Քաղաքացիական պայմանագիր" խմբակցության պատգամավոր Վաղարշակ Հակոբյանը։
«Սիրելի՛ հայրենակիցներ, ամիսներ առաջ մեծ քննարկումների տեղիք տվեց պետության կողմից Ծաղկաձորում գտնվող արդեն նախկին «Գոլդեն Փելիս» հյուրանոցի վաճառքը։ Այսօր հատուկ այց եմ կատարել «Գոլդեն Փելիս» հյուրանոց, հետևել եմ համալիր շինարարական աշխատանքներին, ինչպես նաև ամենայն մանրամասնությամբ ծանոթացել լայն թափով ընթացող կոնստրուկտիվ մեծամասշտաբ աշխատանքներին և պետության հանդեպ ներդրումային պարտավորությունների իրականացման գործընթացին Կոմերցիոն տնօրեն՝ Կարապետ Տեր-Հակոբյանի ուղեկցությամբ։ Հանրահայտ հյուրանոցի նախագիծն այժմ վերականգնման և վերակառուցման փուլում է:
Ամիսներ առաջ կնքվեց պայմանագիր նաև համաշխարհային նշանակության «MERCURE» բրենդի հետ, որով «Գոլդեն Փելիս» հյուրանոցը դառնում է «MERCURE» համաշխարհային ցանցի մի մասը, որը արձանագրում է այն նշանակալից փաստը, թե որքան կարևոր է այդ բրենդի մեր երկրում լինելը», - գրել է պատգամավորը։
Հիշեցնենք, որ Ծաղկաձորում գտնվող "Գոլդեն Փելիս" հյուրանոցը վաճառվել է այս տարվա փետրվարին "Ինտեր-Ինվեստ Պրոյեկտ" ՍՊԸ-ին: Աճուրդին մասնակցելու համար ներկայացվել էր մեկ հայտ, որն էլ բավարարվել է: Ընկերությունը գույք ձեռք բերելու նպատակով ներկայացրել էր 5 մլրդ դրամի գնային առաջարկ, ինչպես նաև 4.5 մլրդ դրամ արժողությամբ լրացուցիչ ներդրումային ծրագիր, որն իրականացվելու է առաջիկա 5 տարիների ընթացքում: 2019-2020 թվականներին, կազմակերպվել էր, ընդհանուր առմամբ, 6 աճուրդ, սակայն դրանք չեն կայացել հայտերի բացակայության պատճառով: Յուրաքանչյուր չկայացած աճուրդից հետո գույքի արժեքը նվազել է. եթե 2019 թվականի հունիսին դրա շուկայական գինը եղել է 7,5 մլրդ դրամ, ապա դրա վերջին գինը կազմել է 5,9 մլրդ դրամ: 2019 թվականի սեպտեմբերի 26-ին ՀՀ կառավարությունը որոշեց որպես նվիրատվություն ընդունել Մաքսային ծառայության նախկին ղեկավար Արմեն Ավետիսյանին պատկանող "Գոլդեն Փելիս" հյուրանոցը: Նախկին պաշտոնյան նման առաջարկով էր հանդես եկել այն բանից հետո, երբ ԱԱԾ-ը բացահայտել էր նրան պատկանող երեք հյուրանոցների ապօրինի շինարարության փաստը։
Նշենք, որ «MERCURE» հյուրանոցների ցանցն ունի 700-ից ավելի հյուրանոց (60236 համար) աշխարհի 50 երկրներում։ Այն հիմնադրվել է 1973 թվականին, իսկ երկու տարի անց հանձնվել է ֆրանսիական Accor խմբին։
