Մեղրիի սահմանային անցակետում շինարարական աշխատանքները կսկսվեն, ամենայն հավանականությամբ, սեպտեմբերին

Արմինֆո.Պետական եկամուտների կոմիտեի նախագահ Ռուստամ Բադասյանն օգոստոսի 3-ին հանդիպել է Վերակառուցման և զարգացման եվրոպական բանկի (ՎԶԵԲ) երևանյան ներկայացուցչության ղեկավար Ջորջ Ախալկացիի գլխավորած պատվիրակության  հետ։ 

Ինչպես հաղորդում է ՊԵԿ մամուլի ծառայությունը, կողմերը գոհունակություն են հայտնել համագործակցության առկա մակարդակից և անդրադարձել համատեղ իրականացվող ծրագրերի հետագա քայլերին ու միջոցառումներին։ Հանդիպմանը քննարկվել է Մեղրիի սահմանային անցակետի արդիականացման ծրագրի ընթացքը և կարևորվել ծրագրի գնման գործընթացի փուլի ավարտը։ Կողմերը հույս են հայտնել, որ շինարարական աշխատանքների բուն գործընթացը կմեկնարկի սեպտեմբերին:

ՊԵԿ նախագահը և ՎԶԵԲ երևանյան ներկայացուցչության ղեկավարն անդրադարձել են նաև ԵՄ ներդրումային պլանի ներքո Սյունիքի մարզում արտաքին տնտեսական գործունեության (ԱՏԳ) կենտրոնի և մաքսային լաբորատորիայի կառուցմանն ուղղված` ՎԶԵԲ միջոցով ֆինանսավորման հնարավորություններին:

Հանդիպման ընթացքում Ռուստամ Բադասյանը հատկապես կարևորել է տնտեսվարողներին մեկ վայրում մաքսային վարչարարության ամբողջ ծառայությունների տրամադրման գործընթացը և փաստել, որ նշված երկու ծրագրերը՝ Մեղրիի մաքսակետի արդիականացումը և ԱՏԳ կենտրոնի հիմնումը, կփոխլրացնեն միմյանց՝ նոր ու բարձր որակ հաղորդելով մաքսային վարչարարության իրականացմանը։

Ս.թ. ապրիլի 8-ին ՊԵԿ-ը տեղեկացրել էր, որ տեղի է ունեցել Մեղրիի սահմանային անցակետի արդիականացման և վերակառուցման միջազգային մրցույթ: Նշվում էր, որ "Մեղրի" սահմանային անցակետի ծրագիրն իրականացվում է Հայաստանի Հանրապետության և Վերակառուցման և զարգացման եվրոպական բանկի միջև ստորագրված վարկային-դրամաշնորհային համաձայնագրին համապատասխան: Նախագծի արժեքը կազմում է մոտ 21 մլն եվրո, շինարարական աշխատանքները կտևեն 30 ամիս։ Անցակետը կլինի գերժամանակակից, անցակետի գործառույթներն ամբողջությամբ ապահովելու համար նախատեսվում է 4000 քմ կառուցապատման մակերեսով երկհարկանի վարչական շենքի, 1500 քմ արևային էլեկտրակայանի կառուցում տանիքի վրա, 40 000 քմ ավտոկայանատեղի, էլեկտրահաղորդման 5 գծերի կառուցում: Անցակետը հագեցած կլինի նաև ժամանակակից ռենտգեն սարքավորումներով։

Ավելի վաղ հաղորդվել էր, որ Վերակառուցման եւ զարգացման եվրոպական բանկը եւ Եվրոպական միությունը Հայաստանին կտրամադրեն 21,1 մլն եվրո Իրանի հետ սահմանակից "Մեղրի" անցակետը արդիականացնելու համար: Այդ գումարից ՎԶԵԲ-ը Հայաստանին կտրամադրի 10,6 մլն եվրոյի վարկ Libor+1% պայմաններով, ինչը կիսամյակային կտրվածքով կազմում է 1,7%: Ֆինանսավորման մեծ մասն ապահովվելու է Եվրոպական հարևանության ծրագրի շրջանակներում ԵՄ կողմից տրամադրվող դրամաշնորհային միջոցների հաշվին՝ 10,6 մլն եվրո և 700 հազար եվրո ։ Համաձայնագիրը ստորագրվել է 2020 թվականի փետրվարի 7-ին։ Ծրագրի իրականացման արդյունքում անցակետը կընդլայնվի ներկայիս 6,6 հա-ից մինչեւ 8,8 հա: Թողունակությունը օրական 300 ավտոմոբիլից կաճի մինչեւ 900: Ողջ նախագիծը նախատեսվում է ավարտել 2022թ. վերջին՝ 2023թ. սկզբին։

Նշենք, որ ԵՄ-ի եւ Եվրոպական ներդրումային բանկի ֆինանսական աջակցությամբ Միավորված ազգերի կազմակերպության զարգացման ծրագրի (ՄԱԶԾ) շրջանակներում իրականացվել է Հայաստանի պետական սահմանի երեք անցակետերի ՝ "Բագրատաշեն", "Բավրա" եւ "Գոգավան" հսկիչ - անցագրային կետերի արդիականացում: Այդ երեք անցակետերի արդիականացման ընդհանուր բյուջեն կազմել է 54.43 մլն եվրո։ Հայաստանում ԵՄ պատվիրակության տեղեկատվության համաձայն, ծրագրի շրջանակներում ՀՀ կառավարությունը ԵՄ-ից ստացել է 30,8 մլն եվրոյի վարկ, 17,2 մլն եվրոյի դրամաշնորհներ: Հայաստանի կառավարության համաֆինանսավորումը կազմել է 4,44 մլն եվրո։ ՄԱԶԾ-ի ֆինանսական ներդրումները կազմել են 1,9 միլիոն եվրո։